Bijbel Ta Historia Auténtico?

NAN a censurá gobernante. Nan a castigá sacerdote. Nan a reprendé e pueblo comun pa nan maldad. Nan a asta pone nan propio fayo i picánan den registro público. Nan a ser persiguí, i algun a asta ser asesiná dor cu nan a papia i skirbi e berdad. Ken nan tabata? E profetanan di Bijbel, di cua hopi a contribuí na e Scritura Santu.—Mateo 23:35-37.

Den su buki The Historian and History (E Historiadó i Historia), Page Smith ta skirbi: “[E hebreonan] tabata mes sin misericordia cu nan héroenan cu nan tabata cu nan malechornan, cu nan mes i cu nan adversarionan, pasobra nan tabata skirbiendo cu Dios su bista riba nan i nan no tabatin nada di gana i hopi di perde si nan a sconde algu.” Tambe Smith a skirbi cu “compará cu e cronologianan monótono dje reynan guerero di Siria of Egipto, e relato dje tribulacionnan i triunfonan di un pueblo scogí dor di Dios . . . ta un relato fasinante. E cronistanan hebreo a descubrí un dje elementonan mas esencial di historia: cu e ta ser presentá dor di hende real, cu tur nan falta i imperfeccionnan.”

E escritornan bíblico tabata tambe meticulosamente exacto. Despues di analisá Bijbel den lus di historia i arkeologia, e escritor Werner Keller a bisa den e introduccion di su buki The Bible as History (Bijbel Como Historia): “En bista dje cantidad abrumador i bon confirmá di evidencia cu tin disponibel awor, . . . e solo frase aki a sigui bati den mi cabes: ‘Despues di tur cos, tog Bijbel tin rason!’”

Historia Dinámico cu Lesnan Poderoso

E escritornan bíblico pa gran parti tabata hende comun: cunukero, wardadó di carné, piscadó. Sin embargo, loke nan a skirbi atrabes di un periodo di un 1.600 aña, a influenciá mas hende cu cualkier otro skirbimentu, sea antiguo of moderno. Ademas, nan skirbimentu a ser atacá for di tur skina, pero en bano. (Isaías 40:8; 1 Pedro 1:25) Awe hende por lesa e Bijbel completo of en parti na mas o ménos 2.200 idioma, hopi mas cu cualkier otro buki! Di con Bijbel ta asina distinto? E siguiente referencianan bíblico ta yuda contestá e pregunta ei.

“Tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.”—2 Timoteo 3:16, 17.

“Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.”—Romanonan 15:4.

“E cosnan aki a sigui sosodé nan [e israelitanan] como ehempel, i nan a ser skirbí como spiertamentu pa nos [cristiannan] riba ken e fin dje sistema di cosnan a yega.”—1 Corintionan 10:11.

Sí, como un registro divinamente inspirá i conserbá tocante hende real—di cua algun  a agradá Dios i otronan no—Bijbel ta elevá riba tur otro buki. E ta leu di ta un lista secu di haci esaki i no haci esaya, of un coleccion di relatonan corticu interesante, bon pa entretené mucha. Ta cierto cu Dios a usa escritor humano, pero ta mas mihó so esei a haci Bijbel, dunand’e un atraccion caluroso cu a toca curason di lectornan pa generacion tras di generacion. Arkeólogo William Albright a declará: “E profundo perspicacia moral i spiritual di Bijbel, cu ta forma un revelacion único di Dios na hende transmití mediante experencia humano, ta mes cierto awe cu nan tabata dos of tres mil aña pasá.”

Pa ilustrá con relevante Bijbel ta, sin importá den ki tempu bo ta biba, laga nos bai bek te na principio di historia humano—caminda ta Bijbel so por hiba nos—i considerá algun les clave for dje buki di Génesis.

Lesnan Oportuno for di un Relato Antiguo

Entre otro cosnan, e buki di Génesis ta revelá e comienso dje famia humano, cu nomber i tur sobrá cos. Riba e tópico aki ningun otro obra di historia ta asina specífico. Kisas bo ta puntra: ‘Pero di ki balor ta awe pa sa ken tabata nos antepasadonan original?’ E tin un balor inmenso, pasobra dor di revelá cu tur hende—sin importá color, tribu of nacion—ta bini dje mésun mayornan, Génesis ta eliminá cualkier base pa racismo.—Echonan 17:26.

Tambe Génesis ta ofrecé guia riba moralidad. E ta contené e relato tocante Sódoma, Gomora i nan stadnan bisiña, cu Dios a destruí debí na perversion sexual grave dje habitantenan. (Génesis 18:20–19:29) Versículo 7 dje buki bíblico di Hudas ta bisa: “Sódoma i Gomora i e stadnan cerca nan, despues cu nan . . . a cometé fornicacion den exceso i a bai tras di carni pa uso innatural, ta poní dilanti nos como un ehempel spiertador.” E hendenan di Sódoma i Gomora no  a ricibí ningun ley moral di Dios; sin embargo, mescos cu tur hende, nan tabatin e facultad di concenshi cu Dios a duna nan. Pues, Dios debidamente por a tene e hendenan ei responsabel pa nan echonan. (Romanonan 1:26, 27; 2:14, 15) Mescos awe, Dios lo tene tur hende responsabel pa nan echonan, sea cu nan ta aceptá su Palabra, Bijbel Santu, of no.—2 Tesalonicensenan 1:8, 9.

Un Les di Historia Tocante Sobrebibencia

Un relieve riba e Arca di Tito na Roma ta mustra soldánan romano bayendo cu artículonan sagrado for dje tempel na Jerusalem despues di destruccion dje stad na aña 70 E.C. Mas cu un miyon hudiu a ser matá. Sin embargo, cristiannan obediente a sobrebibí, danki na Jesus su spiertamentu di antemano: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca. E ora ei laga esnan den Hudea cuminsá hui p’e cerunan, i laga esnan cu ta meimei di dje retirá, i laga esnan den cunucu no drent’é; pasobra esakinan ta dianan pa haci husticia.”—Lucas 21:20-22.

Leu di ta djis historia antiguo, e tribulacion di Jerusalem a prefigurá aspectonan di un tribulacion mas grandi cu pronto lo cubri henter mundu. Pero atrobe lo tin sobrebibiente. Esakinan ta ser describí como “un multitud grandi . . . for di tur nacion i tribu i pueblo i lenga.” Nan ta “sali for dje tribulacion grandi” debí na nan fe den Jesus su sanger dramá, un fe basá firmemente riba historia i profecia bíblico.—Revelacion 7:9, 14.

Historia Cu Nunca Lo Ripití

Awe nos ta biba den e tempu cu e Poder Mundial Anglo-Americano a subi esenario, e último di profecia bíblico. Segun e patronchi di historia, lo e bini na un fin mescos cu e otro podernan mundial promé cuné. Pero con? Di acuerdo cu Bijbel, e fin dje poder aki lo ta berdaderamente único. Señalando padilanti na aña 1914 E.C., Daniel 2:44 ta bisa dje “reinonan,” esta, e podernan político na mando: “Den e dianan dje reynan ei e Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní.”

Sí, e Reino di Dios—su gobiernu celestial encabesá pa Cristo Jesus—lo eliminá tur rastro di gobernacion humano opresivo na Armagedon, e culminacion dje “tribulacion grandi” mencioná anteriormente. Despues di esei, e Reino aki lo “no pasa na ningun otro  pueblo,” loke ta nificá cu nunca lo e ser tumbá of cu hende lo vota pa bah’é for di mando. Su dominio lo ta “te na cabamentu dje tera.”—Salmo 72:8.

Por fin lo bini un paro na e ciclo cruel di dominacion di religion falsu, política opresivo i comercio golos. Salmo 72:7 ta primintí: “E hustu lo spruit, i e abundancia di pas te cu luna no t’ei mas.” No ta egoismo i orguyo, sino Dios su cualidad principal—amor—lo yena e planeta. (1 Juan 4:8) Jesus a bisa: “Stima otro.” Relacioná cu esaki, e historiadó Will Durant a bisa: “Al final e les cu mi a siña di historia ta mescos cu esun di Jesus. . . . Amor ta e cos mas práctico na mundu.”

Dios su amor pa hende a impuls’é pa inspirá e skirbimentu di Bijbel. Ta Bijbel so di berdad ta iluminá pasado, presente i futuro. Por fabor, aceptá su mensahe cu ta duna bida dor di invertí un poco tempu den studia Bijbel. Cu e meta ei i obedeciendo Jesus su mandamentu, Testigonan di Jehova ta compartí e ‘bon nobo di reino’ cu nan próhimo. Pronto e bon nobo aki lo ta mas cu profecia. Lo e bira historia bibu.—Mateo 24:14.

[Komentario na página 9]

“Despues di tur cos, tog Bijbel tin rason!”—WERNER KELLER

[Komentario na página 11]

“E profundo perspicacia moral i spiritual di Bijbel . . . ta mes cierto awe cu nan tabata dos of tres mil aña pasá.”—WILLIAM ALBRIGHT, ARKEÓLOGO

[Plachinan na página 9]

Piedra Moabita: Ta contené rey Mesa su version dje conflicto entre Moab i Israel (2 Reynan 3:4-27), nomber di vários lugá bíblico i e nomber di Dios skirbí cu letter di hebreo antiguo. [Rekonosementu]

Musée du Louvre, Paris.

Moneda di denario di plata: Duplicado tin e imágen i inscripcion di Tiberio César (Marco 12:15-17).

Crónica di Nabonido: Un tabla skirbí na spijkerschrift cu ta confirmá e forma repentino cu Babilonia a cai den man di Ciro. (Daniel, capítulo 5)

[Rekonosementu]

Potret sacá pa cortesia di British Museum.

Tabla di piedra: Riba dje tin nomber di Poncio Pilato na latin.

[Rekonosementu]

Potret © Israel Museum, Jerusalem; cortesia di Israel Antiquities Authority.

Rol di Laman Morto den fondo: Un estudio dje texto di Isaías a duna prueba cu e buki aki casi no a cambia durante un periodo di 1.000 aña cu hende a copié na man.

[Rekonosementu]

Shrine of the Book, Israel Museum, Jerusalem.

[Plachinan na página 10]

Un relieve riba e Arca di Tito ta confirmá e destruccion di Jerusalem na aña 70 E.C.

[Rekonosementu]

Soprintendenza Archeologica di Roma