Guera No A Stop Nos di Predicá

SEGUN E RELATO DI LEODEGARIO BARLAAN

Na 1942, durante Segundo Guera Mundial, Hapon i Merca tabata ankrá den bataya pa haña Filipínas, mi pais natal. Ami tabata na Tabonan un pueblito den ceru, caminda gueriyeronan local cu tabata bringa contra Hapon tabatin mi prezu. Nan a bati mi, acusá mi di ta spion, i a menasá di ehecutá mi. Laga mi splica con mi a haña mi den e situacion aki i con mi a sobrebibí.

MI A nace dia 24 di januari 1914, den e stad di San Carlos, Pangasinan. Den añanan ’30, Tata a manda mi scol pa studia agricultura. Riba diadomingo mi tabata bai misa, i e pastor tabata papia tocante e Evangelionan—Mateo, Marco, Lucas i Juan. Como resultado, mi kier a lesa nan.

Un dia mi a bai n’e conbento pa cumpra un ehemplar dje Evangelionan cu placa cu mi a haña di benta di algun berdura. Pero nan a duna mi un foyeto titulá E Caminda pa Shelu, i e no tabata contené e Evangelionan. Esaki a desapuntá mi. Despues, pa satisfacé mi deseo pa obtené e Evangelionan, mi a biaha bai Manila. Ei mi tio, cu tabata un Testigo di Jehova, a duna mi un ehemplar di un Bijbel completo.

Na Manila mi a topa vários Testigo, kende nan abilidad di cita textonan bíblico a impresioná mi. Cerca nan mi a haña contesta satisfactorio  pa hopi pregunta. Cu tempu mi tio, Ricardo Uson, a hiba mi na un reunion na e oficina di sucursal di Testigonan di Jehova. Ora nos tabata acercando e lugá, mi a cende un sigaria. “Benta e cos ei afó,” mi tio di. “Testigonan di Jehova no ta huma.” Pues mi a benta e sigaria afó i nunca mas mi a huma. Mi a topa Joseph Dos Santos, e superintendente di sucursal, i tambe algun otro Testigo. Awe, despues di asina hopi década, ainda mi ta corda e excelente ruman hombernan cristian ei.

Un Deseo pa Sirbi Dios

Pa october 1937, miéntras mi tabata un studiante di Colegio Agricultural Los Baños, mi a stop di bai misa. Na lugá di esei, mi tabata lesa Bijbel huntu cu e literatura cu mi tio a duna mi. Un grupo di Testigo di Jehova a bishitá e campus dje scol, i como resultado dje combersacionnan cu un di nan, Elvira Alinsod, mi a haña un deseo fuerte di sirbi Jehova Dios.

Ora mi a bisa mi instructornan cu mi tin planeá di kita for di scol, nan a puntra: “Ken lo mantené bo?” Mi a splica nan cu mi tabatin sigur cu si mi sirbi Dios, é lo mantené mi. Despues di a kita for di scol, mi a bai na e oficina di Sociedad Watch Tower i a presentá mi mes como un boluntario, splicando: “Mi a lesa e publicacionnan Lealtad, Rikesanan i Unda e Mortonan Ta? Awor mi kier sirbi Jehova tempu completo.” Nan a manda mi bai e provincia Cebu pa djoin tres pionero, manera ta yama ministernan di tempu completo di Testigonan di Jehova.

Mi Ta Cuminsá Predicá

Dia 15 di juli 1938, Salvador Liwag a topa mi na pir ora mi a yega na e isla di Cebu. E siguiente dia, mi a cuminsá den e ministerio di cas pa cas. Niun hende no a entrená mi. Mi a djis duna e doño di cas un karchi di testimonio cu a splica nos trabou. De echo, mi tabata sa dos palabra so na cebuano, e idioma local. Asina mi promé dia den e ministerio a cuminsá.

Ora nos a cuminsá testificá den un pueblo nobo, tabata nos custumber pa bai stadhuis promé. Ruman Liwag a testificá na e alcalde; Pablo Bautista na e hefe di polis; i Conrado Daclan na e hues. Ami a papia cu e hefe di postkantoor. Caba nos tabata bishitá e parada principal di bus, e baraknan di polis, e tiendanan i e scolnan. Ademas, nos tabata bishitá hende na nan cas. Nos a presentá e buki pa yuda studia Bijbel titulá Enemigunan. Segun cu mi a imitá e manera cu mi compañeronan tabata duna testimonio, mi a siña papia cebuano poco-poco, i mi a cuminsá laga buki. Den tres luna nos a cubri henter e provincia di Cebu: 54 pueblo. E ora ei mi a puntra ruman Liwag: “Mi por bautisá awor?”

“Ainda no, ruman,” el a contestá. Pues nos a bai un otro isla, Bohol, i a predicá einan pa un luna i mei, cubriendo 36 pueblo mas. Atrobe mi a pidi pa ser bautisá. “Ainda no, ruman Barlaan,” mi a tende. P’esei despues di a caba cu Bohol i tambe e isla Camiguin, nos a bai na e isla grandi Mindanao i a predicá na Ciudad Cagayan de Oro.

Pa e tempu aki Virginio Cruz a djoin nos grupo. Anteriormente e tabata un maestro di scol público i a kita for di scol pa bira pionero. Nos a muda bai otro pueblonan i cu tempu a yega lago Lanao. Miéntras nos tabata einan mi a bolbe puntra si mi por a bautisá. Por fin, dia 28 di december 1938, despues di a traha pionero pa seis luna, ruman Cruz a bautisá mi den e awanan di lago Lanao na e pueblo di Lumbatan.

Recompensá pa Mi Confiansa den Dios

Despues mi a djoin tres pionero na Negros Occidental. Nan tabata Fulgencio de Jesus, Esperanza de Jesus i Natividad Santos, kende nos a yama Naty. Huntu nos a predicá den hopi pueblo den e provincia ei. Di berdad nos mester a pone nos confiansa den Jehova, ya cu tabatin biaha casi nos no tabatin cen. Un biaha nos kier a haña piscá pa come cu nos aros. Mi a topa un homber na playa i a  puntr’é si mi por a cumpra piscá cerca dje, pero nan a hiba tur loke e tabatin plasa. Sin embargo, el a ofrecé mi unu cu el a apartá pa su mes. Mi a puntr’é cuantu e ta costa. E di: “No wori. Bo por bai cuné.”

Mi a gradicié. Pero ora mi a bira bai, mi a realisá cu un solo piscá lo no ta suficiente pa cuater hende. Pasando banda di un riu chikitu, mi a keda sorprendí di mira un piscá riba un piedra, muhá di awa ainda. Mi a pensa: ‘Por ta e ta morto.’ Mi a bai cog’é i a keda sorprendí di nota cu e tabata bibu. Mi a gar’é tene duru, cordando mesora riba e promesa di Jesus: “Sigui busca, anto, promé e reino i Su husticia, i tur e otro cosnan aki lo ser agregá na boso.”—Mateo 6:33.

Predicando Meimei di Guera

Ora nos grupo di pionero a crece bira nuebe, nos a forma dos grupo. Esun di nos a ser asigná na Cebu. Awor tabata december 1941, i Segundo Guera Mundial tabata andando na Filipínas. Miéntras nos tabata den e pueblo di Tuburan, un teniente filipino a bini meianochi na nos kamber. “Yunan, lanta ariba,” el a bisa. “E soldánan ta busca boso.” Nan tabata sospechá nos di ta spion hapones, di manera cu nan a interogá nos pa e resto di anochi.

Despues, nan a encarcelá nos den e prizon municipal. E forsanan armá mericano na Ciudad Cebu a pidi nos duna nan un ehemplar di cada un di nos bukinan pa asina nan por a determiná si nos tabata spion hapones. Hopi habitante local a bishitá nos den prizon, kaweta pa mira con esnan acusá di ser spion hapones tabata. Algun di nan a haci pregunta, i nos a duna nan un testimonio tocante e Reino di Dios.

Despues di a pasa cincu dia den prizon, e hefe di polis a ricibí un telegram for dje sede dje ehército mericano cu a dun’é instruccion pa libra e Testigonan di Jehova. Sin embargo, el a bisa nos pa no predicá mas pasobra awor tabata tempu di guera. Nos a splica cu nos no por stop di predicá pasobra nos tabatin un comision for di Dios pa haci e trabou aki. (Echonan 5:28, 29) E hefe a rabia i a bisa: “Si boso sigui predicá, lo mi laga e hendenan mata boso.”

Den e dianan cu a sigui, e hefe di polis a busca manera di bolbe arestá nos. Cu tempu un peloton di soldá dje ehército mericano a para nos, i un teniente cu yama Soriano a puntra hermana Santos: “Lo boso stop di predicá?”

“No,” el a contestá.

“Suponé cu nos pone boso dilanti un peloton di fusilamentu?” el a puntra.

“Esei lo no cambia nos decision,” e ruman a splica.

E ora ei, nan a pone nos tur den un truck di carga i a hiba nos Ciudad Cebu, caminda nos a aparecé dilanti coronel Edmund. Teniente Soriano a introducí nos na dje bisando:  “Esakinan ta Testigonan di Jehova. Nan ta spion hapones!”

“Testigonan di Jehova?” e coronel a puntra. “Mi tabata conocé Testigonan di Jehova bon na Merca. Nan no ta spion! Nan ta neutral.” Anto el a bira bisa nos: “Como cu boso ta neutral, boso lo no ser librá.” Despues cu nan a tene nos den un depósito pa algun tempu, coronel Edmund a papia atrobe cu nos i a puntra: “Ainda boso ta neutral?”

“Sí señor, asina mes,” nos a contestá.

“E ora ei, boso lo no ser librá,” e di, “pasobra si nos libra boso, boso lo sigui predicá, i esnan cu boso combertí lo bira neutral. I si tur hende haci esei, anto niun hende lo no bringa.”

Liber pa Predicá Atrobe

Despues nan a transferí nos pa e prizon na Ciudad Cebu. Dia 10 di april 1942, e haponesnan a invadí e stad. Bomnan tabata cai tur caminda, i un candela grandi a start! E wardadó di prezu a mira hermana Santos, kende su cel tabata cerca dje parti dilanti di prizon. “Ai! E Testigonan di Jehova ta paden ainda!” el a grita. “Habri e porta, i laga nan sali!” Nos a gradicí Jehova pa Su proteccion.

Mesora nos a coge rumbo pa e cerunan pa busca compañeronan Testigo. Nos a localisá unu den e pueblo Compostela. Anteriormente el a hiba delantera den e trabou di predicá, pero awor el a dicidí di stop i muda bai Ciudad Cebu i haci negoshi bendiendo vários mercancia. Sin embargo, nos decision tabata pa sigui predicá e Reino di Dios, maske kico sosodé.

Nos tabatin hopi ehemplar dje foyeto chikitu Consolá Tur Esnan Cu Ta Yora, i nos a traha duru pa pone nan den man dje hendenan. Sin embargo, hopi hende a purba spanta nos dor di bisa cu si e haponesnan mira nos, nan lo kita nos cabes afó. Poco tempu despues, un movementu di gueriya anti-hapones a ser organisá, i e persona cu a stop di predicá i bai haci negoshi den Ciudad Cebu a ser arestá. Nos a bira tristu ora nos a tende cu el a ser acusá di ta un spion hapones i cu nan a ehecut’é.

Acusá di Ta Spion

Miéntras tantu nos a sigui predicá den e cerunan. Un dia nos a tende cu tin un señora interesá, pero pa yega cerca dje nos tabatin cu pasa vários punto di control di gueriya. Nos a yega na e pueblito di Mangabon, caminda e señora tabata biba, pero un peloton di soldá a haña nos i a grita: “Cu ki propósito boso a bini aki?”

“Nos ta Testigonan di Jehova,” mi a contestá. “Boso kier tende e mensahe cu nos ta trece mediante e tocadisco?” Ora cu nan a reaccioná faborabel, mi a toca e discurso E Balor  di Conocimentu. Despues, nan a listra nos i interogá nos, caba nan a hiba nos na e sede dje gueriya na e pueblito di Tabonan. Nos a haci oracion na Jehova pidié su proteccion, pasobra segun informenan casi tur hende cu nan a hiba einan tabata ser ehecutá.

Nan a mantené nos bou di vigilancia i a maltratá nos. Ta esei tabata e situacion cu mi a describí den e introduccion, ora cu nan a bati mi i e teniente a mustra riba mi i a bisa: “Bo ta un spion!” Nan a sigui maltratá nos pa un tempu, pero en bes di ser ehecutá, nos a ser sentenciá na trabou forsá.

Mi ruman homber Bernabe tabata un dje pioneronan encarcelá na Tabonan. Tur mainta nos como prizonero mester a canta “Dios Bendicioná Merca” i “Dios Bendicioná Filipínas.” En bes di esei, e Testigonan a canta “Ken Ta na Banda di Señor?” Un biaha, e oficial encargá a grita: “Ken cu no canta ‘Dios Bendicioná Merca’ lo ser cologá na e palu di acacia ei!” Pero apesar di tal menasa, niun di nos no a ser matá. Cu tempu, nan a transferí nos pa otro campamentunan. Finalmente, mi documentonan pa ser librá a yega, fechá juli 1943. Pa e tempu ei, mi tabata un prizonero pa ocho luna i dies dia.

Predicando pa Bida Largu

Nos deseo di mira e personanan interesá na ken nos a predicá anteriormente, a impulsá nos pa cana 60 kilometer pa bai e stad di Toledo. Ei nos a establecé reunionnan regular, i cu tempu hopi hende a bautisá. Finalmente e guera a terminá na 1945. Dos aña despues, casi nuebe aña despues di mi bautismo, mi por a asistí na mi promé congreso, cu a ser tené na Santa Ana Racetrack na Manila. Rond di 4.200 persona a reuní pa e discurso público “E Goso di Tur Pueblo.”

Promé cu e guera a cuminsá, nos tabatin rond di 380 Testigo na Filipínas, pero pa 1947, tabatin rond di 2.700! Desde e tempu ei mi a sigui disfrutá di hopi privilegio den Jehova su sirbishi. Di 1948 pa 1950, mi a sirbi como superintendente biahero den e region di Surigao. Na 1951, mi a casa cu Natividad Santos, kende a predicá cu curashi huntu cu nos grupo durante guera. Despues di nos matrimonio nos a sirbi den e trabou biahero den henter Mindanao di 1954 pa 1972.

Na 1972 nos a bira pionero special pa asina nos por ta mas cerca di nos mayornan di edad i yuda nan. Aunke nos tur dos ta den nos ochent’i picu aña, nos ta sigui traha pionero. I entre nos dos nos a dedicá mas cu 120 aña na e ministerio di tempu completo. Ki un goso e tabata pa nos mira e cantidad di esnan cu ta proclamá e bon nobo dje Reino di Dios na Filipínas crece bira te mas cu 130.000! Ta nos deseo pa yuda hopi hende mas comprendé cu e Reino di Dios ta e único speransa pa disfrutá di berdadero pas i felicidad riba tera.

[Komentario na página 22]

Nan tabata sospechá nos di ta spion hapones, di manera cu nan a interogá nos pa e resto di anochi

[Plachi na página 23]

Na 1963, huntu cu nos amigunan riba e isla Bohol. Mi casá i ami ta di cuater i di cincu for di man drechi

[Plachi na página 24]

Ami cu mi casá awe

[Rekonosementu pa Potrèt na página 20]

Potret den fondo: U.S. Signal Corps photo