Hóbennan Sa Puntra . . .

Ki Malu Tin den Sluip Sali for di Cas?

“Nos tabata sluip sali meianochi i bai na un kofi shop pa ta huntu cu un par di gai. Despues nos a cuminsá ta ‘hang around’ n’e ceru. Tur e muchanan tabata huma, aunke ami sí no a hacié nunca. Nos tabata sinta porna- da i papia tocante kico-cu-ta, scuchando música ‘heavy metal.’ Caba nos tabata bai cas 5’or di mainta promé cu mi mayornan lanta.”—Tara. *

“Ora mi tata a sali bai traha i mi mama tabata na soño, ami tabata sluip sali di porta dilanti. Como cu e porta tabata di metal, mi tabata lagu’é habrí ya e no ta tende mi cer’é. Mi tabata keda henter anochi huntu cu mi amigunan. Anto mainta ora solo sali, mi tabata purba sluip drenta cas bek. Tin biaha mi mama tabata ripará cu mi a sali i e tabata cera mi afó.”—Joseph.

SLUIP SALI—e ta zona excitante i dushi. Ta un chens pa bo experenciá bida riba bo mes pa un par di ora, un chens di haci loke bo kier i ta cu ken cu bo kier sin tin cu duna cuenta na niun hende. Ademas, probablemente bo a tende bo pareunan broma dje cosnan cu nan ta haci i e pret cu nan ta pasa ora nan sluip sali for di cas anochi. P’esei kisas e tentacion pa abo purba djoin nan ta masha grandi.

Den un encuesta di 110 alumno di scol secundario na Nort América, 55 a admití di a sluip sali por lo ménos un biaha. Mayoria di nan a haci esei pa promé bes na edad di 14 aña. E problema ta asina serio cu algun experto ta recomendá pa mayornan instalá sistemanan di alarma electrónico den nan cas pa prevení nan yunan di sali sin bisa nan. Di con asina tantu hóben ta risca di sinti e furia di nan mayornan dor di sluip sali for di cas?

Di Con Algun Hóben Ta Sluip Sali

Tin biaha hóbennan ta sluip sali djis pasobra nan ta sinti nan mes laf i nan kier pasa un tiki pret cu nan amigunan. E buki Adolescents and Youth ta splica cu hóbennan kisas ta sluip sali “debí na un of otro restriccion—laga nos bisa dor cu anochi nan mester ta na cas cierto ora trempan of dor cu nan ta na straf i no mag sali—cu a stroba nan di bai un evenemento social. E hóben lo bai di tur manera i tin biaha ta logra bini cas bek sin cu su mayornan ripará.” Un hobencita di 16 aña a splica su motibunan pa sluip sali. E di: “Mi ta sinti como si fuera mi ta un baby i cu mi no tin libertad di hiba mi bida manera mi kier. E ora cu mi mester ta na cas ta hopi mas trempan cu di tur otro mucha. I mi mayornan no kier laga mi bai e lugánan cu mi amigunan ta bai . . . Pues ta claro cu mi ta bai di tur manera anto gaña nan.” Joseph, mencioná na principio, a cuminsá sluip sali na  edad di 14 aña ora cu el a bai un concierto di rap cu su mayornan a prohibié di bai.

Ta berdad cu mayoria hóben no ta sluip sali pa bai haci malu. Tara, un dje hóbennan citá na principio, a bisa: “E promé cos den bo mente no ta: ‘Laga nos ban haci un picá serio.’ Gewoon mi kier tabata huntu cu mi ruman muher, i e kier a sali i pasa pret cu su amigunan.” Joseph a bisa: “Nos tabata djis ‘hang around.’ Ami kier a papia i ta huntu cu mi amigunan.” Pero aunke sinta pornada huntu cu bo amigunan rara bes ta hiba na crímennan grandi, hopi hóben sí ta haña nan den problema serio.

E Riesgonan

Dr. Lynn E. Ponton, un profesional di salú mental, ta argumentá: “Ta normal cu tienernan ta tuma riesgo.” Dr. Ponton ta sigui splica cu ta normal i podisé asta sano cu hóbennan kier bira independiente, kier purba cosnan nobo i kier ta den situacionnan nobo i interesante. Ta un parti di crecementu. Pero hopi hóben ta tuma riesgo fuera di tur límite razonabel, foral ora nan ta leu for di bista di nan mayornan. E revista Teen ta bisa: “Un combinacion di preshon di pareunan, sinti bo laf, energia cu no tin manera pa us’é i podisé un of otro catalisador manera un cerbes . . . por hiba tienernan na tuma e riesgo ekibocá, i paga cu nan bida.” Un encuesta a mencioná algun dje actividadnan riscante aki di tienernan cu a incluí core auto duru, vandalismo, core auto burachi i hortamentu.

Una bes bo cuminsá desobedecé den cosnan menor, ta fácil pa bo sigui pa malechonan mas serio. Ta manera Jesus a bisa na Lucas 16:10: “E persona inhustu den lo mínimo ta inhustu tambe den loke ta hopi.” No ta un sorpresa anto cu sluip sali cu amigunan por hiba na picánan grave. Tara a cometé fornicacion. Joseph a cuminsá bende droga, polis a arest’é, i el a bai cerá. Un hóben cristian cu yama John a cuminsá usa droga i horta auto. Lamentablemente, hopi hóben ta cosechá tambe e consecuencianan físico di tal comportacion: embaraso indeseá, malesa transmití sexualmente of adiccion na alcohol of droga.—Galationan 6:7, 8.

E Daño

E daño na bo emocionnan por ta hopi mas destructivo cu e daño na bo curpa. Un concenshi cu ta molestiá bo por ta masha doloroso. (Salmo 38:3, 4) Joseph ta bisa: “Tin un dicho: bo no sa kico bo tin, sino te ora bo perd’é. Tin biaha mi ta pensa bek i mi no por kere cu mi tabata asina ciegu.”

No mester pasa por haltu tampoco dje posibel daño na bo reputacion. Eclesiástes 10:1 ta bisa: “Muskita morto ta loke ta haci zeta di trahadó di ungwento hole stinki i bomba. Asina un poco bobedad ta haci cu hende cu ta precioso debí na sabiduria i gloria.” Den tempu antiguo un ungwento of perfume balioso por a ser ruiná dor di algu asina chikitu manera un muskita. Di igual manera, bo reputacion cu bo  a traha duru pa gana, lo por ser ruiná dor di djis “un poco bobedad.” I si bo ta un cristian, tal mal comportacion sin duda lo stroba bo di ricibí privilegionan den congregacion. Al fin i al cabo, con bo por animá otro hende pa sigui principionan bíblico ora cu nan sa cu bo mes no ta haci esei?—Romanonan 2:1-3.

Finalmente, considerá e dolor cu bo ausencia ta causa bo mayornan ora nan ripará esei. Un mayor a papia dje horor di descubrí cu su yu muher di 15 aña no tabata na cas. E mama ta describí con e cu su esposo tabata ‘for di nan mes di preocupacion’ ya cu nan no tabata sa unda nan yu muher a bai. Bo kier causa tal dolor i pena na bo mayornan?—Proverbionan 10:1.

Con pa Haña Mas Libertad

Ta di comprendé cu por ta frustrante si ta parce cu bo mayornan ta demasiado estricto. Pero sluip sali ta realmente e solucion? Casi sin faya, nan lo gara bo un dia. Asta si bo ta suficiente astuto pa coge bo mayornan cabes abou, Jehova Dios sí ta mira bo echonan, asta esnan cu bo haci den scuridad djanochi. (Job 34:21) Tardi of trempan lo bo keda exponé, i probablemente esei lo kibra tur confiansa cu bo mayornan kisas tabatin den bo promé cu esei. E resultado? Lo bo perde gran parti di net e cos cu bo tabata kier: libertad!

Corda: Pa disfrutá di libertad bo tin cu merecé e confiansa di bo mayornan. I e mihó manera pa haci esei ta simplemente dor di obedecé nan. (Efesionan 6:1-3) Si bo ta sinti cu den un of otro manera bo mayornan ta irazonabel, papia franco—i respetuosamente—cu nan. Por ta masha bon cu nan lo considerá loke bo ta bisa. Di otro banda, kisas bo ta haña cu nan tin bon motibu pa restringí bo un poco. Asta si bo no ta di acuerdo, no lubidá nunca cu nan ta stima bo i tin bo mihó interes na pechu. Sigui desaroyá e confiansa cu nan tin den bo, i na su debido tempu lo bo haña e libertad cu bo ta deseá. *

“No Bai cu Nan”

Den tempu antiguo, hopi bes hóbennan temeroso di Dios tabata ser tentá pa djoin nan pareunan den comportacion desenfrená. P’esei Sálomon a urgi hóbennan: “Mi yu, si pecadónan trata di seducí bo, no consentí. . . . No bai cu nan den e caminda.” (Proverbionan 1:10, 15) Haci caso dje conseho ei ora asina yamá amigunan ta purba convencé bo pa sluip sali for di cas. Mas aleu Sálomon ta spierta: “Spiertu ta esun cu a mira e calamidad i a sconde su mes, pero esun inexperto a sigui padilanti i mester sufri e castigu.”—Proverbionan 22:3.

Si ya caba bo a cuminsá ta sluip sali, stop! Único cos cu bo ta logra ta di haci bo mes daño a largu plaso. Laga bo mayornan sa kico bo tabata haci, i aceptá loke sea ta e castigu of restriccion cu kisas nan ta duna bo. Si ta necesario, scoge amigunan nobo, amigunan cu lo tin un bon influencia riba bo. (Proverbionan 13:20) Busca maneranan mas sano i ménos riscante pa pasa bon.

Mas importante ainda, traha riba bo spiritualidad dor di lesa Bijbel i asistí na reunionnan cristian. E salmista a puntra: “Con un hóben lo limpia su caminda?” E ta contestá: “Dor di mantené su mes alerto conforme cu [Dios su] palabra.” (Salmo 119:9) Segun cu poco-poco bo ta rehací bo mente pa haci loke ta corecto, lo bo yega na e conclusion cu aunke sluip sali por ta pret i excitante, simplemente e no ta bal e riesgonan.

[Nota]

[Komentario na página 27]

“Mi mayornan no kier laga mi bai e lugánan cu mi amigunan ta bai . . . Mi ta bai di tur manera anto gaña nan”

[Plachi na página 26]

Sluip sali ta hiba hopi bes na problemanan serio