E Punto di Bista Bíblico

Nos Mester Bai Reunionnan Cristian?

“ÁNTES mi tabata bai misa, pero awor no mas.” “Ami ta pensa cu bo por adorá Dios tur caminda, no ta precis den un iglesia.” “Ami ta kere den Dios i den Bijbel, pero mi no ta kere den baimentu di iglesia.” Bo a yega di tende e tipo di expresionnan ei? Mas i mas, hende awe ta bisa cosnan asina, foral den paisnan occidental. Hende cu tabatin custumber di bai misa no ta haña cu esei ta necesario mas. Kico Bijbel ta bisa tocante baimentu di iglesia?

E palabra “iglesia” i “iglesianan” ta aparecé mas cu 110 biaha den King James Version. Otro traduccionnan tambe ta usa e términonan aki. E palabra griego traducí “iglesia” ta nificá literalmente “un yamada,” of cu otro palabra, un grupo di hende reuní. Por ehempel, Echonan 7:38, den King James Version, ta bisa cu Moises tabata “den e iglesia den desierto,” esta, entre e nacion congregá di Israel. Na un otro ocasion e Scritura ta declará cu “a surgi un pèrsekushon grandi contra e iglesia,” refiriendo na e comunidad di cristiannan den Jerusalem. (Echonan 8:1, Beibel Santu) Den un di su cartanan, Pablo ta saludá “e iglesia ku ta reuní na [Filemon] su cas,” e congregacion local cu tabata reuní einan.—Filemon 2, Beibel na papiamentu koriente.

Ta keda claro cu e término “iglesia” manera Bijbel ta us’é ta designá no un lugá di adoracion, sino mas bien un grupo di adoradó. Reconociendo esaki, Clemente di Alehandria, un maestro religioso di siglo 2, a skirbi: “No e lugá, sino e congregacion dje scogínan, ami ta yama Iglesia.” Pero, cristiannan mester ta presente na un sitio of edificio specífico pa nan adoracion por ta aceptabel pa Dios?

 Adoracion den e Nacion di Israel

E Ley di Moises a rekerí pa tur homber hudiu ta presente na un lugá specífico pa tres fiesta anual. Hopi hende muher i mucha tambe a asistí. (Deuteronomio 16:16; Lucas 2:41-44) Na cierto ocasionnan e sacerdote i levitanan a siña e multitudnan congregá, lesando for dje Ley di Dios. Nan ‘a splik’é, pone nificacion na dje, i a duna comprendimentu na e lesamentu.’ (Nehemías 8:8) Pa añanan sabático, Dios su instruccion a declará: “Congregá e pueblo, e hombernan i e muhernan i e chikitinnan i bo residente stranhero cu ta den bo portanan, afin cu nan por scucha i afin cu nan por siña, ya cu nan mester teme Jehova boso Dios i percurá pa cumpli cu tur e palabranan dje ley aki.”—Deuteronomio 31:12.

Ta n’e tempel na Jerusalem so un persona por a ofrecé sacrificio na Dios i ricibí instruccion for dje sacerdotenan. (Deuteronomio 12:5-7; 2 Crónicanan 7:12) Cu tempu, nan a establecé otro casnan di adoracion na Israel: e snoanan. Esakinan tabata lugánan pa lesamentu dje Scritura i pa haci oracion. Tog, ainda e tempel na Jerusalem tabata e lugá principal di adoracion. Loke e escritor bíblico Lucas a skirbi, ta ilustrá esaki. E ta mencioná un señora di edad cu tabata yama Ana, kende “nunca no tabata falta den e tempel, rindiendo sirbishi sagrado anochi i di dia cu yunamentu i súplica.” (Lucas 2:36, 37) Adoracion berdadero huntu cu otro personanan deboto tabata e punto central den Ana su bida. Otro hudiunan temeroso di Dios a haci mescos.

Adoracion Berdadero Despues di Cristo Su Morto

Despues di Jesus su morto, su siguidónan no tabata bou dje Ley di Moises mas, ni no a ser rekerí di nan pa adorá na e tempel. (Galationan 3:23-25) Tog, nan a sigui reuní huntu pa haci oracion i studia e Palabra di Dios. Nan no tabatin edificionan elaborá, sino mas bien a usa casnan privá i lugánan público. (Echonan 2:1, 2; 12:12; 19:9; Romanonan 16:4, 5) E reunionnan ei dje cristiannan di promé siglo tabata liber di ritual i buya, i tabatin un simplesa bunita.

Meimei dje decadencia moral dje Imperio Romano, e principionan bíblico cu tabata ser instruí na e reunionnan ei a briya manera diamanta. Algun incrédulo cu pa promé biaha a asistí, no por a haci nada otro cu sclama: “Dios realmente ta meimei di boso.” (1 Corintionan 14:24, 25) Sí, Dios realmente tabata meimei di nan. “P’esei, en berdad, e congregacionnan [“iglesianan,” BS, SAB] a sigui ser hací firme den fe i aumentá na cantidad dia tras dia.”—Echonan 16:5.

Un cristian dje tempu ei por tabatin Dios su aprobacion dor di adorá na tempelnan pagano of riba su mes? Bijbel ta duna instruccion bon cla riba e asuntu aki: Adoradónan aprobá tabatin cu bira parti dje único iglesia (esta congregacion) berdadero, e “un solo curpa” di adoradónan genuino. Esakinan tabata e disipelnan di Jesus, conocí como cristiannan.—Efesionan 4:4, 5; Echonan 11:26.

Kico di Awe?

En bes di animá nos pa adorá den un iglesia, Bijbel ta animá nos pa adorá huntu cu e iglesia, “e congregacion dje Dios bibu,” e pueblo cu ta “adorá cu spiritu i cu berdad.” (1 Timoteo 3:15; Juan 4:24) Reunionnan religioso aprobá pa Dios mester instruí hende “den actonan santu di conducta i echonan di debocion na Dios.” (2 Pedro 3:11) Nan mester yuda esnan presente bira cristiannan maduro, cu por “distinguí tantu loke ta bon como loke ta malu.”—Hebreonan 5:14.

Testigonan di Jehova ta haci esfuerso pa sigui e modelo dje cristiannan di promé siglo. Mas cu 91.400 congregacion rond mundu ta reuní regularmente pa studia Bijbel i animá otro, nan ta haci esei den Salonnan di Reino, casnan privá i otro sitionan. Esaki ta na armonia cu e palabranan di apostel Pablo: “Laga nos considerá otro pa incitá otro na amor i na obranan excelente, sin bandoná nos reunimentu huntu.”—Hebreonan 10:24, 25.