Un Palu Cu Lo Pone Bo Para Ketu

DJE CORESPONSAL DI SPIERTA! NA ECUADOR

MEIMEI di december e temporada di awaceru no a cuminsá ainda na e yanuranan na costa di Ecuador. Stòf cu ta cubri e ceritunan ondulá a duna e vegetacion un aparencia dòf. Den shelu, un masa sólido di nubia shinishi a duna e dia un aparencia tristu segun cu un grupo di biahero tabata den auto riba caretera, bayendo direccion west pa océano Pacífico. Di ripiente, tur wowo a keda clabá riba un palu cantu di caminda. E auto a para di ripiente. Ta cua palu nan a mira?

Un kibrahacha den pleno flor! Un sclamacion a kibra e momento di silencio: “Esta bunita! Boso a yega di mira un color radiante asina? Ami a mira hopi palu di flor color ros, puus, corá of oraño, pero esaki ta surpasá nan tur, di tantu cu e ta briya!”

Despues di admirá su beyesa color di oro, nan finalmente a ranca bai. Nan no a realisá cu esaki tabata djis e principio. Un poco mas leu, nan a bin topa un otro palu di kibrahacha den pleno flor i despues un otro mas. A parce como si fuera e ceritunan tabata cubrí cu pidanan di rayo di solo color di oro! Tabata e temporada anual dje palu di kibrahacha, ora cu e mondinan sin color ta yena cu un explosion di color.

Sin embargo, e beyesa dje palu cu ta florea aki no ta limitá na un solo pais. De echo, e palu aki ta nace na hopi parti di Sur i Centroamérica. E ta conocí tambe cu nombernan manera araguaney, guayacan, guayacan geel, trompet di oro i palu di trompet, refiriendo na su flornan color di oro den forma di trompet. E nomber científico ta Tabebuia chrysantha (conocí tambe como Tabebuia billbergii).

Tambe kibrahacha ta producí un palu di grano fini for di cua ya pa hopi aña hende ta traha mueble di calidad haltu. E scarcedad dje palu cu esaki a trece cuné, a haci cu den algun pais tabata necesario pa pon’é bou di leynan protectivo. Esaki ta pa sigurá cu tantu hende local como bishitantenan por sigui disfrutá di su beyesa único ora e ta florea, aunke esei ta pa solamente un par di dia i solamente un biaha pa aña.

Sin duda, e palu di kibrahacha ta un tributo bibu na e artista mas grandi di tur: nos Magnífico Creador, e arkitecto dje maraviyoso tera riba cua nos ta biba.