Caminda Camel i Brumby Ta Core Liber

DJE CORESPONSAL DI SPIERTA! NA AUSTRALIA

E INTERIOR di Australia. Ki imágennan ta bini na bo mente ora bo tende di e lugá aki? Un pais yen di kángaru cu ta bula-bula i cu un tipo di abestrus sin hala cu yama emu, desiertonan di stòf corá i dianan intensamente cayente? Te na cierto grado bo tin rason, pero tambe e ta un pais yen di sorpresa.

Bo tabata sa cu na Australia bo ta haña e último tounan di camel salbahe cu a keda riba tera, e tou di mas grandi di cabai salbahe na mundu i un plaga di buricu sin igual riba e planeta? E yegada i sobrebibencia di e animalnan resistente ei ta un historia no masha conocí tocante e bestianan aki su abilidad di awante i di adaptá na cambio, i un historia di interesnan na conflicto cu otro. Un recuerdo bibu di tempu di antaño.

Edificá Riba Lomba di Camel

Durante e último cuater décadanan, algun criadó di baca cu ta biba den interior tabatin mésun keho cu un cowboy a expresá den e buki The Camel in Australia: “Aki mi a mira con 5 camel prácticamente a ruiná 10 kilometer di waya di tranké . . . Un caminda nan no solamente a kibra e waya, sino a kibra staca cu tur.”

Waya di tranké caru no por resistí e pianan  largu i e curpa grandi di un camel decididu. Tog, ta e mésun pianan fuerte aki a haci posibel cu por a traha e coneccionnan indispensabel pa bida cu ta pasa dor dje interior secu dje continente aki.

Camelnan importá for di India na 1860, a compañá e exploradónan Burke i Wills riba nan hazaña di crusa Australia di zuid pa nort. E criaturanan exótico a bira e compañeronan preferí dje aventureronan di ántes debí na nan forsa i resistencia superior. Cu un eficiencia asombroso pa loke ta uso di combustibel, nan ta carga 300 kilo di peso pa 800 kilometer largu usando solamente 15 liter di awa.

Como bestianan cu bo por dependé maraviyosamente riba dje, camelnan a yuda transportá cuminda i ekipo pa stadnan di oro na frontera, tambe nan a yuda construí e liñanan telegráfico cu ta pasa riba tera for di Adelaide pa Darwin, i midi tereno pa e coneccion di trein Trans-Australiano cu a conectá Sydney cu Perth. Cubriendo un área di 4 miyon kilometer cuadrá, nan a habri un caminda cu ainda ta difícil pa mashinnan moderno sigui.

Pa 1922 tabatin un máximo di 22.000 camel di cas, pero ora cu auto a tuma over, hopi camel a haña nan libertad. Liber pa move rond i reproducí, segun informe awor mas cu 200.000 camel ta considerá e desiertonan di Australia como nan cas, i algun hende ta calculá cu denter di seis aña e poblacion lo bira dòbel.

Pero no a laga tur e camelnan aki core liber. Un bocero dje Asociacion Central Australiano di Camel a bisa Spierta!: “Australia ta e único continente na mundu cu tin tou di camel liber di malesa, i p’esei tur aña un cantidad chikitu ta ser exportá pa parkenan di bestia na Merca i Asia.” Organisadónan  local di tour tambe ta ofrecé bishitantenan e oportunidad pa subi riba lomba di camel i redescubrí e naturalesa interior di Australia—un interior caminda yen di otro bestia di carga cu a ser liberá ta biba.

Kico Ta un Brumby?

E promé flota di barcunan ingles a baha su carga di prizonero, soldá i cabai na costa di Australia na 1788. Historia di cabai den e pais aki, mescos cu di su compañero humano, ta tantu romántico como trágico.

Como un medio principal pa dominá e frontera nobo, cabai a hiba e promé pioneronan na e cuater skinanan dje continente. No a dura mashá cu cabainan perdí i fugitivo a forma tounan salbahe, i e cabainan aki a bira conocí como brumby. E palabra “brumby” a bini podisé dje palabra di aborígen di Queensland, baroomby cu ta nificá “salbahe.”

E spiritu salbahe i liber di cabai brumby a stimulá e imaginacion di poëtanan manera A. B. (Banjo) Paterson, i su balada “E Homber di Snowy River” a ankra e brumby den curason di hopi australiano. E cantidad di cabainan a aumentá despues di Promé Guera Mundial ora e demanda pa waler—un rasa di cabai criá specíficamente p’e Brigada Australiano di Cabai Liviano i cu e ehército di India  tabata usa—a baha i a laga nan den libertad. Ta ser calculá cu awor tin 300.000 cabai salbahe ta core liber riba e continente.

Segun cu nan ta core rond, nan patanan ta bati e capa frágil di suela manera martin di un smid i ta kibra e oriya di buracunan di awa. Ora secura dal aden, nan ta muri di hamber of sed. Den un pais cu ya caba tin un poblacion demasiado grandi di tou di baca, e cabainan brumby aki a bira un carga intolerabel. P’esei pa reducí nan cantidad, miles ta ser matá legalmente tur aña. Ta procesá algun pa hende come, otronan ta ser bendí como cuminda pa bestia.

Pero si ta cantidad nos ta wak, ta brumby su primu, esta buricu, ta esun cu di berdad ta core liber. Dor cu e ta mas fructífero cu e cabai salbahe i a plama den un área mas grandi cu e camel, el a bira víctima di su propio éxito.

E Solucion Estilo di Hudas

Mescos cu cabai, a importá buricu tambe pa promé bes na final di siglo 18 pa hala carga of pa ploeg cunucu, i e buricunan aki a adaptá nan mes mashá lihé. Nan a laga nan en masa den libertad durante añanan ’20 di siglo 20, i nan poblacion a bira 30 bes mas tantu cu e tounan di buricu cu di naturalesa ta salbahe.

Diseñá pa biba den desierto, buricu, mescos camel, ta stop di soda ora e no por haña awa i e por soportá un pérdida di líkido cu ta igual na 30 porciento di su peso di curpa. (Hopi otro mamífero lo muri si nan perde 12 pa 15 porciento di nan peso.) Nan ta preferá di come yerba di sabana berde, pero nan por bona comiendo mata cu baca lo no mishi cuné. Pa e añanan ’70 di siglo 20, tabatin mas cu 750.000 buricu riba mitar dje continente. E aumento aki a bira un peliger pa ecologia i e industria di baca; mester a tuma medida.

Den nortwest di Australia so, for di 1978 te cu 1993, a mata na un manera sistemático i legal mas cu 500.000 buricu pa reducí nan cantidad. Actualmente den loke nan ta yama e programa di Hudas tin 300 buricu ekipá cu radio transmisor. Ora laga nan liber pa uni cu nan tou, helicopter ta busca e buricunan aki, i ta mata nan compañeronan legalmente i den forma compasivo. Ora e buricu Hudas bira amigu cu un otro grupo, ta localisá esakinan tambe i likidá nan.

Un funcionario pa proteccion di agricultura na west Australia, a bisa Spierta!: “Esaki ta un problema di término largu.” El a spierta: “Si laga un grupo chikitu di buricu cu por reproducí, den un lapso corticu di tempu e cantidad di buricu lo bira manera e tabata den e añanan ’70 di siglo 20. Hopi bes hende no ta comprendé di con ta mata e bestianan aki segun ley i ta laga nan caminda nan cai muri. Pero hende no ta realisá con inaccesibel e áreanan aki ta. Aki no tin caminda, i bo por alcansá mayor parti dje área solamente cu helicopter. Ta intervencion di hende a causa e problema, pues nos tin cu purba limitá e daño mas humanamente posibel.”

Fuerte i Fructífero

Ta comprendibel si awor bo ta imaginá cu den e centro di Australia bo ta haña un tráfico mal pega di animalnan di carga indeseá. Pero e interior di Australia ta hopi grandi. E animalnan aki ta core rond riba un área dje tamaño di Europa i casi mes remoto cu luna, pues, un tereno cu tin similaridad di tur dos sitio. Pa detectá unda e tounan ta so, ya ta un desafio caba, ban corda pa controlá nan.

Distinto for di hopi especie nativo cu ta den peliger di extincion, e animalnan fuerte i fructífero aki ta birando un parti permanente dje paisahe. Liber di yagdónan natural i isolá for di malesa, nan ta core liber den e interior di Australia!

[Plachi na página 16]

Un 200.000 camel ta core rond liber den e desiertonan di Australia

[Plachi na página 16]

Agriculture Western Australia

[Plachi na página 16, 17]

Brumby ta core liber na rand dje desierto Simpson

[Plachi na página 17]

Un caravana di camel transportando lana, 1929

[Rekonosementu]

Image Library, State Library of New South Wales

[Plachi na página 18]

Ta hunta brumby pa coge nan n’e estilo di interior

[Rekonosementu]

© Esther Beaton

[Plachi na página 18]

Pegando un radio transmisor na un buricu Hudas

[Rekonosementu]

Agriculture Western Australia