Hóbennan Sa Puntra . . .

Con Mi Por Bis’é Cu Mi No Ta Interesá?

“E zomer aki un ruman homber di mi congregacion a enamorá di mi. Nunca mi a ègt gust’é. E problema ta cu mi no tabata sa con pa bis’é cu mi no ta interesá, sin lagu’é sinti malu.”—Elizabeth. *

“MI TIN mag di siña conocé bo mas mihó?” Un yoncuman a yega di haci bo e pregunta ei? Como mucha muher, * kisas lo bo a sinti contentu i satisfecho—asta sumamente emocioná! Di otro banda, tambe kisas bo a sinti bo asina confundí cu bo no tabata sa kiko pa bisa.

Ora un hende ta expresá interes romántico den bo, esei por producí confusion emocional. Esaki ta specialmente e caso ora bo tin edad pa casa i ta den posicion pa reaccioná riba e tipo di atencion ei! * Sin embargo, e manera cu bo ta reaccioná ta dependé hopi di ken ta haci e pregunta. Si e ta un persona emocionalmente madurá, i bo ta sinti bo atraé na dje, lo ta fácil pa bisa sí. Sin embargo, kico si claramente e no ta cualificá pa ta un bon casá? Of kico si e tin bon cualidadnan, pero abo simplemente no ta interesá den dje?

Tambe, considerá e situacion di un mucha muher cu a sali cu un yoncuman pa un poco tempu pero cu a realisá cu e no kier pasa e resto di su bida cuné. Pero en bes di kibra cuné, e ta sigui sali cuné. “Con mi por bis’é cu mi no ta interesá?” e ta puntra.

Ora Bo No Tin Interes Romántico den e Persona

Den tempu di e patriarcanan, aparentemente hende tabata casa cu personanan cu nan mayornan a scoge. (Génesis 24:2-4, 8) Den paisnan occidental mayoria cristian ta liber pa scoge nan futuro casá. Bijbel tin solamente un rekisito: un cristian mester casa “solamente den Señor.”—1 Corintionan 7:39.

Pero, esei kier men cu bo mester casa cu cualkier compañero cristian cu expresá interes den bo of cu ken bo tin un tempu corticu ta sali cuné? Wel, considerá e ehempel bíblico di un mucha muher di cunucu di e pueblito  Sunem na Medio Oriente. Sálomon, su rey, a mir’é i a enamorá di dje. Sin embargo, ora el a purba di conkist’é, e mucha muher no solamente a rechas’é sino tambe a roga e muhernan di palacio cu tabata sirbi e rey: “No trata di lanta ni excitá amor den mi te ora e sintié incliná pa esei.” (Cantica di Sálomon 2:7) E mosa sabí aki no tabata kier pa otronan preshon’é pa tuma un decision basá solamente riba emocion. Gewoon e no tabata interesá den un romance cu Sálomon, dor cu e tabata enamorá di un wardadó di carné humilde.

Awe esaki ta siña esnan cu ta pensa pa casa un les importante: Bo no por tin amor romántico pa ken cu ta. Pues, asta despues di a sali cu un hende pa un tempu, un mucha muher por descubrí cu e no ta interesá den un relacion amoroso cuné. Kisas e mucha muher ta sinti asina debí na un debilidad cu e ta mira den e caracter dje otro persona. Of kisas e persona no ta atraé. Lo ta bobo pa ignorá e sintimentunan aki. Djis ignorá e sintimentunan aki lo no pone nan bai. * “Tabatin asina hopi duda tocante dje den mi mente,” Tamara a bisa dje mucha homber cu e tabata sali cuné. “No tabata djis duda tocante cosnan di poco importancia, sino duda cu realmente tabata molestia mi te n’e punto cu mi tabata sinti mi tenso i nervioso ora mi tabata cuné.” Despues el a realisá cu pa motibu di e dudanan aki ta mihó pa terminá e relacion.

Di Con Ta Difícil pa Bisa Cu Bo No Ta Interesá

Sin embargo, no ta dje fácil ei pa bisa un yoncuman cu bo no ta interesá den dje. Manera Elizabeth, mencioná na principio, kisas bo tin miedu di lagu’é sinti malu. Ta berdad cu nos mester ta sensitivo pa sintimentu di otro hende. Bijbel ta animá cristiannan pa ‘bisti nan mes cu tierno cariño di compasion’ i pa trata otro hende manera nan kier pa otronan trata nan. (Colosensenan 3:12; Mateo 7:12) Pero esaki ta nificá cu bo mester laga e yoncuman kere numa djis pa bo no decepcion’é of lagu’é sinti malu? Tardi of trempan lo e descubrí loke realmente bo ta sinti, i e echo cu bo no tabata onesto i a posponé e momento dje berdad solamente lo aumentá e dolor. Asta mas pió lo ta si bo casa cu e yoncuman djis pasobra bo tin duele di dje. Lástima ta un fundeshi swak pa edificá un matrimonio ariba.

Pero, miéntras tantu kisas bo ta lucha cu e pensamentu: ‘Si mi no casa cuné, por ta lo mi no tin un di dos oportunidad.’ Manera un artículo den e revista Teen a bisa, un mucha muher lo por razoná: “E no ta ‘esun,’ pero a lo ménos e ta disponibel, i di berdad mi no kier keda so.” Ta berdad cu e deseo pa compañerismo ta fuerte. Sin embargo, pa satisfacé e deseo aki di un forma corecto ta nificá mas cu djis tin un hende banda di bo. E ta encerá haña un persona cu di berdad bo por stima i cu ta capas pa cumpli cu e responsabilidadnan bíblico di matrimonio. (Efesionan 5:33) Pues no tuma decision purá en cuanto un futuro casá! Hopi hende a arepentí di a casa purá.

Tin algun mucha muher tog ta sigui sali cu un yoncuman maske nan ta mira bon cla cu e tin fayonan serio. Nan ta razoná cu ‘si mi dun’é un poco mas tempu, e por cambia.’ Esei realmente ta sabí? Al fin i al cabo, mal custumber i forma di comportá tin rais profundo i ta sumamente difícil pa cambia. Asta si e haci algun cambio di ripiente i drástico, con bo por ta realmente sigur cu e cambionan aki ta permanente? Un muher hóben  cu yama Karen, cu tabata den un situacion asina, sabiamente a dicidí pa kibra cu e yoncuman ora el a ripará cu nan no tabatin e mésun metanan. E ta admití: “Tabata duru, pasobra mi a gust’é físicamente. Pero mi tabata sa cu ta esei ta e cos corecto pa haci.”

Trata cu Cuidou

No tin duda cu no ta fácil pa bisa un persona cu bo no ta interesá. Mescos cu un pakete cu un artículo delicado aden, e situacion mester ser tratá cu cuidou. Ata akí un par di sugerencia cu ta útil.

Papia dje asuntu cu bo mayornan of cu un otro ruman maduro den e congregacion. Nan por laga bo mira si loke bo ta spera kisas no ta dje realístico ei.

Papia cla i sea franco. No laga ningun duda den su mente relacioná cu loke bo ta sinti. Djis bisa “No danki” lo desanimá mayoria pretendiente. Si ta necesario, usa términonan un poco mas fuerte ora bo ta bisa e persona no, por ehempel: “Dispensá mi, pero di berdad mi no ta interesá.” Tene cuidou pa no duna e impresion cu kisas lo bo por cambia di pensamentu si e insistí. Si bo splik’é bon cla cu bo no ta sinti amor romántico p’e, esei lo mester prevení cualkier confusion i lo ta mas fácil p’e recuperá di e decepcion.

Balansá onestidad cu tacto. Proverbionan 12:18 ta declará: “Ta existí esun cu ta papia sin pensa manera e hincánan di un spada.” Maske ta importante pa bo ta franco, Bijbel ta bisa nos cu nos expresionnan mester ta “sasoná cu salu.”—Colosensenan 4:6.

Pega na bo decision. Amigunan cu bon intencion, i cu probablemente no ta comprendé e motibunan di bo decision, por preshoná bo pa dun’é un chens mas. Pero na final di cuenta ta abo tin cu biba cu bo decision, no bo amigunan cu bon intencion.

Actua na armonia cu bo palabranan. Anteriormente boso dos kisas tabata bon amigu, i ta masha natural pa deseá pa cos bolbe ta manera ántes. Pero mayoria bes esei no ta práctico ni posibel. Su sintimentunan pa bo a bira romántico. Ta realístico pa pensa cu e por djis ignorá e sintimentunan ei i pretendé cu nada no a pasa? Kier men, maske ta bisto cu ta mihó pa boso trata otro cordialmente, no ta sabí pa papia regularmente na telefon of pasa hopi tempu huntu na actividadnan social, ya cu probablemente esei solamente lo aumentá su sufrimentu. Esei por ser compará cu hunga cu su sintimentu, i lo no ta bondadoso di bo parti.

Apostel Pablo a urgi cristiannan pa “papia berdad” cu otro. (Efesionan 4:25) Por ta cu ta duru pa haci esei, pero e por yuda boso tur dos pa sigui padilanti cu boso bida.

[Nota]

[Komentario na página 13]

Bo no por tin amor romántico pa ken cu ta

[Plachi na página 14]

Papia cla i ser franco ora di expresá bo sintimentunan