Con pa Haci un Tera Secu Bira Fructífero

DJE CORESPONSAL DI SPIERTA! NA INDIA

Con por haci e terenonan secu di Ladakh, un distrito den e parti nort di India, mas productivo? Esei tabata e pregunta cu Tsewang Norphel, un ingeniero civil penshoná, tabata haci su mes tur ora. E exceso di awa cu ta basha for dje gletsjernan natural situá na haltu den e cerunan di Himalaya ta cuminsá core den luna di juni, i no na april ora awaceru ta scars i e cunukeronan tin mester di awa pa muha nan cunucunan. Norphel a bini cu un solucion ingenioso: Traha gletsjer artificial na nivelnan mas abou, caminda ijs ta cuminsá dirti mas trempan den aña.

Segun e revista di India The Week, Norphel cu su tim a cuminsá cu desviá un riu cu ta bini di ceru pa un canal cu hende a traha di 200 meter largu i cu tin 70 boca. For di esakinan awa ta core na un velocidad slow i controlá baha n’e barica di ceru i e ta vris promé cu e yega e murayanan cu nan a traha pa wanta ijs n’e parti mas abou dje barica di ceru. Gradualmente e ijs ta acumulá, formando asina un gletsjer artificial, i cu tempu e ta tapa e murayanan. Siendo cu e gletsjer ta den sombra dje ceru, e ta dirti solamente ora e temperatura subi den april. Asina e ta suministrá e awa cu e cunukeronan tin tantu mester di dje durante e temporada ei.

E idea di traha gletsjer artificial tabatin éxito? De facto, e idea di Norphel a resultá asina útil cu ya caba nan a traha dies di e gletsjernan ei na Ladakh, i tin plan na caminda pa traha mas. Un dje gletsjernan ei cu nan a traha na un haltura di 1.500 meter ta suministrá mas o ménos 34 miyon liter di awa. I cuantu e ta costa? “Pa crea un gletsjer artificial ta tuma mas o ménos dos luna i ta costa Rs 80.000 [1.860 dollar], di cua e mayoria ta salario,” segun The Week.

Ora hende usa nan ingeniosidad corectamente, esei sigur por resultá den beneficio. Djis pensa riba loke humanidad lo por logra bou di direccion dje Reino celestial di Dios! Bijbel ta primintí: “E desierto i e region sin awa lo tin gran alegria, i e yanura di desierto lo ta gososo i lo florecé manera asafran. . . . Den e desierto awa lo a brota, i riunan den e yanura di desierto.” (Isaías 35:1, 6) Lo ta ki un deleite pa por participá den haci nos tera bunita!

[Rekonosementu pa Potrèt na página 31]

Mountain High Maps® Copyright © 1997 Digital Wisdom, Inc.

Arvind Jain, The Week Magazine