E Naturalesa di Guera Moderno

DEN purá nan a prepará un campamentu di refugiado pa atendé 1.548 refugiado cu a yega di ripiente for di un pais bisiña na África. Tentnan blou i color di kaki tabata pará riba un tereno yen di lodo cu nan a habri meimei di un mondi di mata di coco. No tabatin coriente ni paña di cama, i no tabatin awa di kranchi ni baño. Awa tabata yobe. E refugiadonan tabata usa pida palu pa coba canal chikitu pa evitá cu awa ta drenta den e tentnan. Dos agencia internacional di auxilio a traha manera loco pa mehorá e calidad di bida.

Anteriormente, e refugiadonan a probechá dje oportunidad pa subi un barcu di carga cu tabata casi cai for di otro, pa hui di e guera civil cu ta asotá nan pais pa años. E guera no a ser bringá cu fila di tanki di guera of cu avionnan cu ta tira bom pisá. El a cuminsá ora cu mas o ménos 150 soldá armá cu rifle automático, di un forma arogante a invadí e pais. Durante e añanan cu a sigui, e soldánan a capturá pueblo tras pueblo, exigiendo pago di civilnan, reclutando mas soldá, i matando ken cu a oponé nan. Finalmente, nan a conkistá henter e pais.

Entre e refugiadonan den e campamentu tabatin un muher hóben cu yama Esther. “E cos mas pió cu a pasa mi den mi bida tabata ora mi a perde mi esposo den e guera aki,” el a bisa. “Nan a tir’é mata. Tin asina hopi temor. Bo ta tende un hende grita, i bo ta pensa cu un hende ta bin mata bo. Ki ora cu bo mira un hende cu un scopet, bo ta pensa cu e ta bai mata bo. Nunca mi tabata trankil. Ta aki so mi ta drumi anochi. Na cas, mi no por a drumi. Aki mi ta drumi manera un baby.”

“Asta den e tentnan muhá aki?,” un coresponsal di Spierta! a puntr’é.

 Esther a hari. “Asta si mi tin cu drumi den e lodo aki, lo mi drumi mihó cu for di caminda mi a bini.”

Ambrose cu tin dies aña, a pasa gran parti di su bida ta hui for di áreanan di guera huntu cu su famia. “Lo mi tin gana di mira pas i bai scol bek,” el a bisa. “Ta mucha grandi mi ta birando.”

Kpana di nuebe aña, tin wowo bruin bunita. Ora a puntr’é kico tabata e promé cos cu e ta corda, el a contestá sin vacilá: “Guera! Bringamentu!”

E tipo di guera cu e hendenan aki a hui di dje ta comun den e último añanan. Segun un fuente, di e 49 conflictonan grandi cu a tuma lugá desde 1990, 46 a ser bringá cu arma leve so. Distinto for di un spada of un lansa, cu ta rekerí abilidad i forsa pa us’é eficasmente den combate, armanan chikitu a haci bringamentu den guera posibel pa tantu amateur como profesional. * Hopi bes ta tiener i mucha ta ser reclutá i forsá pa plunder, mutilá i mata.

Hopi di e conflictonan aki ta ser bringá, no entre pais cu pais sino den e paisnan mes. Nan no ta ser bringá riba un campo di bataya dor di soldánan entrená, sino mayoria bes dor di civilnan den stad, pueblo i pueblitonan. Pa motibu cu gran parti di e bringamentu ta ser hací dor di esnan cu no tin entrenamentu militar, nan no ta wori mashá cu violacion di reglanan tradicional di guera. Como consecuencia, atakenan violento contra homber, muher i mucha cu no ta armá, ta masha gewoon. Nan ta calculá cu den gueranan di awendia mas cu 90 porciento di esnan matá ta civil. Den e tipo di gueranan ei arma chikitu i arma leve ta hunga un papel importante.

Naturalmente, no ta scopet ta causa conflicto directamente, hende tabata bringa hopi promé cu nan a inventá polbu. Sin embargo, teniendo un stock di arma por animá bringamentu en bes di negociacion. Arma tin tendencia di alargá e duracion di guera i intensificá e dramamentu di sanger.

Maske e armanan usá den e gueranan djawendia ta leve, nan ta trece consecuencianan pisá. Durante añanan ’90 di siglo 20, e tipo di armanan ei a mata mas cu cuater miyon hende. Mas cu 40 miyon hende a bira refugiado of mester a muda obligatoriamente. Armanan chikitu a manca sociedadnan asotá pa guera afectando nan políticamente, socialmente, económicamente i afectá e medio ambiente. Esaki ta costa e comunidad internacional miles di miyones di florin na auxilio di emergencia, cuido di refugiado, mantencion di pas i intervencion militar.

Di con armanan chikitu a bin ta hunga un papel asina grandi den conflictonan moderno? Di unda nan ta bini? Kico lo por haci pa limitá of eliminá nan impacto mortal? Nos lo considerá e preguntanan aki den e siguiente artículonan.

[Nota]

[Rekonosementu pa Potrèt na página 3]

UN PHOTO 186797/J. Isaac