Glorificando Pas en bes di Guera

SEGUN E RELATO DI DOROTHY HORLE

Na 1919, mi a nace den un famia italiano católico na Wilmington, Delaware, Merca. Nunca mi mayornan no tabata bai misa, pero nan tabata manda ami cu mi dos ruman muhernan sí. E misanan imponente cu nan arkitectura, estatua i gloria espléndido a impresioná mi.

SEGUN cu añanan tabata pasa mi a perde interes den catolicismo. E iglesia no a pone énfasis riba Bijbel, e buki cu mi tata tabatin un respet profundo p’e i tabata lesa regularmente. Mi tabatin problema cu e boletinnan di misa cu tabata mencioná esnan cu a duna cen i e montante cu nan a duna. Tambe tabatin hopi rumor tocante pastornan inmoral. Pa ora mi tabatin 15 aña, mi no tabata un católico activo mas. Esaki a duna mi mas tempu pa dedicá na entrenamentu di arte.

Un Carera den Arte

Na 1940 ora mi tabatin 21 aña, mi a casa cu William Horle, un yoncuman cu a gusta pinta tur cos cu tabatin di haber cu asuntunan militar: aeroplano, soldá, scopet i barcu. Bill a gusta cu mi tabata un artista, i el a cumpra mi promé set di verf di zeta pa mi. Mi a cuminsá siña e técnicanan dje artistanan famoso.

Despues cu nos tabatin dos aña casá, Bill a cuminsá cu e hobi di crea miniaturanan militar di chumbu. Popchi di soldá? Di ningun manera! Su deseo tabata pa producí berdadero obranan di arte. Otro artistanan a traha cu plestik, palu of cu yesu, pero chumbu a pas bon cu Bill su entrenamentu como makinista.

E tabata diseñá un figura, traha un malchi i despues procesá e figura den chumbu. Cu tempu el a bira masha ábil den pega e partinan procesá huntu, soldeer, schuur i lombra nan. Despues el a cambia di malchi di yesu pa malchi trahá di componentenan dental. Esaki a pone cu e por a traha detayenan mas fini.

Despues cu cada pida metal sólido tabata cla, mi tarea tabata pa caba di complet’é. Mediante investigacionnan extensivo, nos a haña descripcion di uniformnan militar bieu—incluso nan boton, strepi, color i badgenan cu ta indicá rango.

Cu yudansa di vergrootglas, mi por a hunta zeta i verf cu a ser prepará pa usa riba metal. Esaki a yuda duna bida na nos estatuanan chikitu. For di nos bodega chikitu na Filadelfia, Pennsylvania, nos a crea indjan mericano, soldá di guera civil, marinir mericano, cabai i ginetenan di Napoleon, ‘mamluk’ di Egipto, ‘zouave’ di Algeria i otronan.

Anto Cuerpo di Marina Mericano a pidi Bill pa crea un representacion dje promé unidad di marinir riba cabai stacioná na Peking  (awor Beijing), China, promé cu 1939. Nos a traha sin stop riba dje, i na 1954 nos a present’é na e Instituto Smithsonian na Washington, D.C. Algun aña despues, presidente Lyndon Johnson a puntra si tabatin mag di traslad’é pa Cas Blancu. Claro cu nos a bai di acuerdo.

Nunca nos a bende nos estatuanan chikitu, pero Bill a duna hende cientos di nan. Hopi buki tocante modelonan di soldá a papia bon di nos. Nos obranan a ser exhibí n’e Feria Mundial na 1965 na Flushing Meadow, na Queens, New York. Museonan a pidi pa nos modelonan. Bruce Catton, un historiadó di guera civil mericano, a usa vários di nos makèt di esenanan militar i estatuanan chikitu como ilustracion den su bukinan.

Preguntanan Tocante Bida A Surgi

Sin embargo, pa ora mi tabatin 40 aña, cosnan a cuminsá cambia pa mi. Mi a cuminsá haci pregunta tocante Dios. Riba un dia di Pascu di Nacementu, cincu mucha católico a kima muri den un cas, miéntras nan mayornan tabata den misa. Mi a pensa: ‘Con Dios por a laga un cos asina sosodé riba su fecha di cumpleaño?’ Mi a wak un buki cu a conta dje atrocidadnan di e Holocausto hudiu. Esakinan i otro sucesonan teribel a pone mi puntra: ‘Unda Dios ta? E no ta haciendo loke e ta supose di haci!’

Debí na mi tata su ehempel di ántes, mi a sinti cu Bijbel mester tin e contesta. Pues, mi a bai e pastorí católico cerca di mi cas na Filadelfia i a traha un cita cu e pastor pa papia di Bijbel. Mi a warda i warda, pero e no a aparecé. Pa cuater siman largu, tur siman, mi a bai e pastorí pero nunca mi no a haña un combersacion cu e pastor.

Un anochi, den desesperacion profundo, mi a wak na shelu i a resa: “Mi no sa ken bo ta. Mi no sa cu cua religion bo ta asociá, pero mi sa cu bo t’ei riba. Por fabor, laga mi conocé bo!” Poco tempu despues, Testigonan di Jehova a bini na mi porta.

De bes en cuando mi a yega di mira e Testigonan parkeer nan auto, baha i bai na diferente cas. Aunke mi no tabata sa nada di nan ni pakico nan a yama na porta, mi tabata curioso pa sa kico ta nan mision.

E dia ei na 1961, ora e Testigonan a yama, mi tabata down pasobra mi no tabata logrando nada den mi búskeda di Dios. Segun cu mi tabata frega e porta dilanti di mi cas, un señora di edad medio cu yama Marge Brion a subi e trapinan di porch i a cumindá mi. Na promé instante mi a ignor’é. Pero segun cu e tabata papia di e tera cu lo ser transformá den un bunita paradijs, mi tabata scuch’é cu sumo atencion. Finalmente el a puntra: “Bo ta scucha mi?”

Mi a ripití tur loke el a bisa, incluso e versículo di Bijbel cu el a cita for di Isaías 55:11.  E ora ei mi a bira cara p’e, gar’é na su brasa i a bisa: “Bin paden!” El a duna mi mi promé Bijbel i yudansa pa studia Bijbel, For di paradijs perdí te na paradijs recobrá. Tambe el a ofrecé mi un consideracion regular di Bijbel, e mésun clase di studio cu mi a spera cu Iglesia Católico lo a duna mi.

Studiando dos bes pa siman, mi a progresá rápidamente den mi studio di Bijbel. Den un tempu corticu tabata bisto cu mi a haña e berdad. Siña conocé e nomber di Dios, Jehova, tabata un experencia masha emocionante pa mi. (Salmo 83:18) Imaginá bo, esaki tabata e Dios cu mi a anhelá di conocé desde mi infancia! Tambe mi a comprendé cu su Yu, Jesucristo, no ta un parti místico di un tres divino persona. (Juan 14:28) No a dura mashá cu mi tabata asistí n’e reunionnan cristian di Testigonan di Jehova i tabata anhelá pa bira un proclamadó di tempu completo dje mensahe di Bijbel.

Tumando Decisionnan Importante

Awor mi tabata dilanti dje prueba di mas grandi. Lo mi kibra e tim artístico di William i Dorothy Horle? Con mi por a sirbi e Dios di pas i su Yu, e Prins di Pas, miéntras cu mediante arte mi ta glorificá guera? (Isaías 9:6) Jehova no a primintí cu lo e haci “gueranan stop te n’e extremidad di tera”? (Salmo 46:9) Pues, pakico sigui cu algu cu Dios lo caba cuné? I Isaías no a profetisá cu e pueblo di Dios lo a “bati nan spada haci ploeg” i no siña di guera mas? (Isaías 2:4) Mi a pensa hopi i a haci oracion largu i intenso. Mi decision tabata: “Mi no por a verf nan mas!” Dia 25 di april 1964, mi a simbolisá mi dedicacion na Jehova Dios mediante bautismo bou di awa.

Hopi bes Bill tabata bisa cuantu ta duel e cu morto lo tin cu separá nos un dia. Ora mi a cuminsá studia Bijbel mi tabata bis’é: “Bill, nos por biba pa semper den Dios su mundu nobo!” (Isaías 25:8; Revelacion 21:4, 5) El a kere cu mi a bira loco. Ora mi a splik’é cu mi concenshi no ta permití mi sigui verf e estatuanan militar, el a rabia i a menasá di bai laga mi. I despues el a hacié.

Bill a producí e estatuanan militar su so pa hopi aña. Pero e no a muda bai leu i semper el a sostené ami cu nos yu homber Craig, cu a nace na 1942. Na 1988 Bill a bolbe cas, i nos a keda huntu pa dies aña te na su morto.

Miéntras tantu, na 1966, mi a realisá mi meta di bira pionero. Desde e tempu ei, nunca mi a wak atras. Mi tabatin e privilegio di studia Bijbel cu mi ruman muher mas grandi. El a aceptá e siñansanan di Bijbel, i a keda un Testigo activo te cu awe. Mi tata a scucha e mensahe di Bijbel i denter di dos siman el a cuminsá asistí n’e reunionnan na Salon di Reino. Na edad di 75 aña el a bautisá, i a keda fiel na Dios te dia el a muri na edad di 81 aña. Mi mama tambe a aceptá Jehova como su Dios, sin embargo, el a muri promé cu el a haci su dedicacion. E tabatin casi 94 aña.

Atrabes di añanan, mi a haña hopi bendicion di Jehova, e Dios di pas. Awor na edad di 81 aña, ainda mi ta traha pionero, aunke mi tin problema pa cana. Mi tin mésun sintimentu cu Pablo, kende a skirbi: “Mi ta gradicidu na Cristo Jesus nos Señor, cu a duna mi poder, pasobra el a considerá mi fiel, asignando na mi un ministerio.” (1 Timoteo 1:12) Ki un ministerio glorioso e tabata! Hopi di esnan cu mi a studia cuné a haci nan propio sacrificio pa sirbi nos Dios misericordioso.

Ta duel mi mashá cu no ta henter mi famia a reaccioná n’e berdad di Bijbel. Cu tempu podisé mas di nan lo aceptá. Pero den mi caso e palabranan di Jesus a resultá cierto, esta, cu su disipelnan lo a “haña shen biaha mas tantu awor den e periodo di tempu aki, cas i ruman homber i ruman muher i mama i yu.” (Marco 10:30) Sí, Jehova a haci mi ricu. Ta ki un onor i goso pa cambia fama i guera, pa Dios i pas!

[Plachi na página 22]

Huntu cu general L. C. Shepherd, Jr., na 1954

[Rekonosementu]

Defense Dept. photo (Marine Corps)

[Plachi na página 23]

(Tamaño real)

[Plachi na página 24]

Na edad di 81 aña, mi tin mas cu 30 aña trahando pionero