Soño Ta Mensahe for di Dios?
E Punto di Bista Bíblico
Soño Ta Mensahe for di Dios?
NAN di cu ta den soño e inventor Elias Howe a haña e idea pa diseñá mashin di cose. E compositor Mozart a bisa cu ta den soño el a haña hopi dje temanan di su música. Asina tambe e kímico Friedrich August Kekule von Stradonitz a pretendé cu ta den un soño el a descubrí e structura di molekuul di gasolin. E ocurencianan ei sigur no ta único. Atrabes di historia hopi cultura a atribuí loke hende soña na podernan sobrenatural. Algun cultura ta pensa cu e mundu ei, ora bo ta lantá, i esun den soño ta mésun real.
Bijbel ta contené vários relato cu ta describí soño como un fuente importante di informacion, un forma di comunicacion divino. (Huesnan 7:13, 14; 1 Reynan 3:5) Por ehempel, Dios a comunicá cu Abraham, Jacob i Josef mediante soño. (Génesis 28:10-19; 31:10-13; 37:5-11) E rey babilónico Nabucodonosor a ricibí soñonan profético for di Dios. (Daniel 2:1, 28-45) Esei pues ta un motibu válido pa kere cu asta awendia soño ta mensahe for di Dios?
Soño for di Dios
Den Bijbel, soño inspirá dor di Dios semper tabata duná pa un motibu specífico. Ta berdad sí cu tin biaha e persona cu a soña no por a comprendé e nificacion dje soño mesora. Sin embargo, den hopi caso, e “Revelador di secreto” mes a percurá p’e splicacion pa asina no tabatin duda tocante e nificacion dje soño. (Daniel 2:28, 29; Ámos 3:7) Soño for di Dios no tabata algu vago i sin coherencia lógico, loke hopi bes ta caracterisá soñonan normal.
Tabatin bes cu Dios a usa soño pa protehá personanan cu ta hunga un papel clave den e realisacion di su propósito. Esnan cu a ricibí e soñonan aki no necesariamente tabata sirbidó di Dios. Por ehempel, e astrólogonan cu a bishitá e mucha Jesus no a regresá cerca e asesino Herodes manera el a Mateo 2:7-12) Esaki a duna Josef, Jesus su tata di criansa, suficiente tempu pa hui bai Egipto huntu cu su famia, manera el a ser instruí den un soño cu e tambe a haña. Esaki a scapa bida dje mucha Jesus.—Mateo 2:13-15.
pidi nan. Di con? Nan a ricibí un spiertamentu den un soño. (Siglonan promé, un fárao egipcio a soña tocante shete tapushi di maishi salú i shete baca gordo na contraste cu shete tapushi di maishi bashí i shete baca flacu. Cu yudansa divino, Josef a interpretá e soñonan corectamente: Egipto lo a disfrutá di shete aña di abundancia siguí pa shete aña di hamber. Sabiendo esaki di antemano, e egipcionan tabatin chens di prepará i stock cuminda. Esaki a hunga un papel importante den conserbá e desendientenan di Abraham i hiba nan Egipto.—Génesis, capítulo 41; 45:5-8.
Rey Nabucodonosor di Babilonia tambe a soña. E soño a predicí e subida i caida di futuro potencianan mundial cu lo tabatin un impacto directo riba e pueblo di Dios. (Daniel 2:31-43) Despues, e tabatin un otro soño cu a predicí con e mes lo bira loco i despues recuperá. E soño profético aki tabatin un cumplimentu mas amplio, i a señalá na establecimentu dje Reino Mesiánico, mediante cua Dios lo cumpli cu su boluntad.—Daniel 4:10-37.
Kico di Awe?
Sí, Dios a comunicá cu algun hende via soño. Pero Bijbel ta indicá cu esaki a sosodé masha rara bes. Nunca soño no tabata e medio principal di comunicacion divino. Tabatin hopi sirbidó fiel di Dios cu nunca no a ricibí mensahe for di Dios den soño. Por compará Dios su uso di soño pa comunicá cu hende cu e echo cu El a parti laman Corá. Nos sa cu el a yega di hacié, pero esei sigur no ta su forma usual di trata cu su pueblo.—Éxodo 14:21.
Apostel Pablo a reconocé cu den su tempu Dios su spiritu tabata obra riba su sirbidónan den hopi manera extraordinario. Pablo a bisa: “Na un ta ser duná via e spiritu abla di sabiduria, na un otro abla di conocimentu segun e mésun spiritu, na un otro fe mediante e mésun spiritu, na un otro donnan di curacion mediante e mésun spiritu, na un otro mas hacimentu di obranan poderoso, na un otro profetisamentu, na un otro dicernimentu di expresionnan inspirá, na un otro diferente lenga, i na un otro interpretacion di lenga.” (1 Corintionan 12:8-10) Maske e no a mencioná soñonan inspirá dor di Dios specíficamente, aparentemente un cantidad di cristian a ricibí soño inspirá dor di Dios como un dje donnan di spiritu, cumpliendo asina cu Joël 2:28.—Echonan 16:9, 10.
Sin embargo, relacioná cu e donnan special aki e apostel a bisa: “Sea cu tin donnan di profetisá, nan lo ser eliminá; sea cu tin lenga, nan lo caba; sea cu tin conocimentu, lo e ser eliminá.” (1 Corintionan 13:8) Evidentemente, entre e donnan cu lo a “ser eliminá” tabatin e vários formanan di comunicacion divino. Despues di morto di e apostelnan, Dios a stop di duna e donnan special aki na su sirbidónan.
Awe ainda expertonan ta purba comprendé e proceso di soña i kier sa si e tin funcion práctico. Bijbel no ta revelá nada tocante esei. Pero, sí Bijbel tin un spiertamentu pa esnan cu ta insistí di busca comunicacion divino den loke nan ta soña. Na Zacarías 10:2 Bijbel ta bisa: “E practicantenan di divinacion, . . . soñonan sin balor ta loke nan ta sigui papia.” Tambe Dios ta spierta contra buscamentu di señal. (Deuteronomio 18:10-12) En bista dje spiertamentunan aki, cristiannan awe no ta verwagt cu nan lo ricibí guia divino den nan soñonan. En bes di esei, nan ta mira soño djis como algu cu nan ta experenciá ora nan ta drumi.