Hóbennan Sa Puntra . . .

Di Con Mi Tin Cu Siña Conocé Mi Welonan?

“Tempu ami cu mi mama tabatin problema pa comunicá cu otro, Wela a yuda nos resolvé esei.”—Damaris.

“ATRABES di historia, welonan tabata e clave pa armonia i continuidad di famia.” Asina dr. Arthur Kornhaber ta skirbi den su buki Grandparent Power! (Poder di Welonan!) E ta agregá: “Como maestro, yudante di mayornan, historiadó, cuidadó, consehero i asta entretenedó, nan funcionnan sicológico, social i spiritual tabata di sumo importancia. Mi a puntra mi mes con bini nos sociedad a ignorá e papel poderoso i multifacético aki dje welonan.”

Den tempu di antaño, welonan tabata e piedra di fundeshi di bida di famia, foral entre adoradónan di Jehova Dios. Bijbel a manda e israelitanan respetá i apreciá hende di edad. (Levítico 19:32) Nan a considerá welonan foral digno di onor.—1 Timoteo 5:4.

Lamentablemente, tempu a cambia. Distancia largu hopi bes ta separá famia, i hopi hóben tin tiki contacto cu nan welonan. Actitudnan tambe a cambia. Den hopi parti di mundu, hende di edad—incluso famia—no ta ser tratá mas cu e debido respet. (2 Timoteo 3:1-3) Loke nan tabata yama un brecha entre generacion ta parce awor mas manera un abismo. Hopi hóben ta considerá cu nan welonan ta anticuá i cu nan no ta comprendé mundu moderno. Nan no por imaginá nan cu e hendenan di edad aki lo por comprendé e preshon i problemanan cu hóbennan ta confrontá awe.

Si ta asina bo ta sinti, sea prepará pa reconsiderá esei! Pasobra ta di gran balor pa siña conocé bo welonan, foral si nan ta hende temeroso di Dios. I si bo no a siña conocé nan, por ta masha bon cu bo ta perdiendo algu importante. Con asina?

Un Fuente di Sabiduria i Conseho

Hopi hóben a descubrí cu welonan por sirbi como un proteccion durante e añanan tempestuoso di hubentud. E revista Seventeen a remarcá: “Teniendo décadanan di experencia di bida, hopi bes nan por yuda bo mas mihó pa trata cu problema, cu bo amigunan di bo edad, kendenan ta luchando cu e mésun preocupacionnan cu bo tin. Abo i bo pareunan ta pasando den e angustia di  boso promé cambionan di bida; boso welonan a pasa dor di hopi cambio asina. Hopi bes nan ta sabí i tambe inteligente.” E conseho aki simplemente ta ripití loke Bijbel a bisa siglonan pasá, esta: “Cabei blancu ta un corona di bunitesa ora e ser hañá den e caminda di husticia.”—Proverbionan 16:31.

Ta cierto cu bo welonan kisas a lanta den un mundu basta distinto for di esun cu awor bo ta biba aden. Pero bo por tin sigur cu na un momento of otro, nan tabatin e mésun sintimentunan cu abo ta luchando cuné awor. Miéntras abo por ta relativamente inexperto ainda den trata cu tal sintimentu, bo welonan tabatin henter un bida pa siña trata cu nan. (Proverbionan 1:4) E homber hustu Job a puntra: “No tin sabiduria entre esnan di edad i comprendimentu den largura di dianan?” (Job 12:12) Sí, i ta p’esei welonan hopi bes por ta un berdadero bentaha ora un hóben tin mester di poco conseho balansá, animacion of apoyo.

Por ehempel, e wela dje hóben Damaris tabata biba huntu cu Damaris i su mama den e mésun apartamento den stad. Damaris ta corda: “Tempu ami cu mi mama tabatin problema pa comunicá cu otro, Wela a yuda nos resolvé esei. El a mustrá mi un otro manera pa mira cosnan.”

Alexandria a experenciá algu similar ora su famia a muda i e tabatin cu cambia scol. “Mi maestro nobo tabata streng i de bes en cuando e tabata perde su dominio propio,” Alexandria a bisa. Pues tabata difícil pa Alexandria custumbrá cu su scol nobo. Sin embargo, su wela a dun’é yudansa i sosten. El a yuda Alexandria ahustá dor di anim’é p’e tene un punto di bista mas positivo dje situacion. Alexandria ta bisa: “Awor mi gusta scol i mi maestro.”

Un yoncuman na Brazil cu yama Rafael ta refleccioná riba e yudansa cu su welonan a dun’é ora el a sigui un educacion suplementario despues cu el a caba scol secundario. E ta bisa: “Nan a duna mi hopi conseho tocante asociacion i con pa resistí problema cu droga.” Awor Rafael ta sirbi como un evangelisadó di tempu completo.

Den su buki Grandparenting in a Changing World, Eda LeShan ta conta di su propio experencia como wela. E ta skirbi: “Mi nieta a bel mi un dia i e di: ‘Welita, mi tin mester di yudansa pa resistí preshon di otro mucha.’ Algun di su compañeranan di klas tabata purba preshon’é pa sali cu mucha homber, i algun dje mucha hombernan tabata bel e.” Como cu su nieta a pidié yudansa, e wela por a ofrecé conseho cu a yuda. Abo tambe por ripará cu un combersacion breve cu un wela of tawela amoroso por ta un berdadero fuente di sosten moral.

Foral durante tempu di crísis den famia, manera malesa of morto, welonan por ta di gran yudansa. Despues cu e hóben Lacey su tata a muri di un malesa serio, su wela a yud’é trata cu e situacion. Lacey ta bisa: “Nos a bira mas cerá cu nunca.”

 Un Banchi Special di Amor

Bo relacion cu bo welonan tambe kisas ta liber di algun tension cu hóbennan tin biaha ta experenciá cu nan mayornan. Di con esaki por ta e caso? Un motibu ta cu welonan hopi bes tin un banchi special cu nan nietunan. Bijbel ta bisa: “Homber bieu ta orguyoso di nan nietunan.”—Proverbionan 17:6, Today’s English Version.

Corda tambe cu ta bo mayornan—no bo welonan—ta esnan cu tin e responsabilidad pisá di cria bo “den e disiplina i reglamentu mental di Jehova.” (Efesionan 6:4) Debí cu nan papel ta ménos exigente, bo welonan kisas ta ménos incliná pa criticá bo, compará cu bo mayornan. Tambe welonan generalmente no ta cargá cu e responsabilidad i preshonnan pa cuido diario di un famia. Como cu nan por ta relativamente liber di e stresnan ei, kisas ta mas fácil pa nan reaccioná riba bo necesidadnan of presta atencion na bo. Tom di 17 aña ta corda e atencion cu el a ricibí di su welonan. Nan tabata manda “regalo chikitu ora mi haña un bon raport”; nan a asta paga pa su lesnan di piano.

Claro cu no ta tur welo por duna tal regalo, pero kisas tog nan ta demostrá nan interes den bo, podisé dor di elogiá bo i animá bo of dor di scucha bo de bes en cuando. Esaki por forma banchinan profundo di amistad entre boso. Damaris ta bisa di su wela: “Mi ta sinti mi trankil cerca dje, i mi por bai cerca dje i papia cuné ki ora cu mi kier pasobra semper e ta dispuesto pa scucha, asta si mi ta papiando cos sin pia ni cabes.” Un hóben cu yama Jônatas tambe ta disfrutá di libertad di expresion i e oportunidad di papia tocante tópiconan serio cu su welonan.

Un Intercambio

Aunke welonan por ofrecé bo nan sabiduria i amor, nan tambe por beneficiá di bo energia hubenil i compañerismo. Con asina? Wel, probablemente tin vários manera cu abo por yuda i sostené bo welonan. Hopi bes, nan forsa físico ta cabando. Of kisas nan ta lucha cu nan salú. Sin duda nan lo sinti nan animá si bo yuda nan cu cómpras i cu trabou di cas.

Hopi di nan ta biuda of biudo i tin biaha sa sinti nan mes solitario. Dor di demostrá un interes activo den nan, bo por contribuí hopi pa yuda nan combatí sintimentunan di soledad i mantené nan entusiasmo pa bida. Haciendo esei ta un manera pa bo cumpli cu e mandamentu bíblico: “Sigui paga un debido compensacion na [bo] welonan, pasobra esaki ta aceptabel den bista di Dios.”—1 Timoteo 5:4.

No tin duda anto cu bira mas íntimo cu bo welonan por enrikesé bo bida i tambe di nan! Te cu awor kisas bo no tabata hopi cerá cu nan. Podisé bo kier cambia esei pero bo no ta sigur unda pa cuminsá. Por ta bo welonan ta biba leu of bo mayornan no ta huntu mas i esaki a alehá bo for di bo welonan. Un futuro artículo lo duna bo algun sugerencia práctico con lo bo por trata cu tal situacion.

[Plachi na página 17]

Welonan por ta bon scuchadó i un fuente di conseho i sosten

[Plachi na página 18]

Yuda bo welonan