E Inundacionnan di Mozambique—Con Cristiannan A Soru pa e Víctimanan

DJE CORESPONSAL DI SPIERTA! NA MOZAMBIQUE

NA PRINCIPIO di aña pasá televidentenan a keda paralisá ora nan a mira na noticia for di Mozambique hende ta cologá na taki di palu miéntras cu awa di inundacion tabata menasá nan. Un señora a duna lus den un palu i por a mira con un helicopter a his’é huntu cu su baby hiba na un lugá sigur. Sin embargo, miles a keda pegá pa dianan—tin biaha den compania di colebra—te ora cu e awa a baha of cu a rescatá nan cu helicopter.

E tragedia a cuminsá cu awaceru torencial na Maputo, capital di Mozambique. Denter di un par di ora barionan completo tabata inundá. Na algun lugá awa a subi te na dak dje casnan. Camindanan a bira riunan brutu. Awa a forma rooinan grandi, i a lastra cas cu auto, i tambe casi tur otro cos bai cuné. Pero ainda cos lo a bira pió.

Awaceru a sigui cai, inundando henter e parti zuid dje pais. Awa a cai tambe na paisnan bisiña manera Sur África, Zimbabwe i Botswana. Como cu e riunan Incomati, Limpopo i Zambezi ta core for dje paisnan aki pasa dor di Mozambique rumbo pa océano, áreanan grandi di Mozambique a ser destruí ora e riunan aki a desbordá. E manera cu cristiannan a soru  pa otro durante e catástrofe aki ta un relato cu ta fortalecé bo fe.

Evaluando e Daño Inicial

Dia 9 di februari aña pasá, dos representante dje oficina di sucursal di Testigonan di Jehova na Maputo a sali pa bai bishitá e parti nort. Rond di nueb’or di mainta, nan a pasa e stad Xinavane, caminda e nivel di riu Incoluane tabata hopi haltu. Nan a dicidí pa sigui i bai Xai-Xai, capital dje provincia Gaza. Sin embargo, nan a ripará cu den becindario dje stad Chókwè, caminda hopi bes durante di tempestad e pió inundacion ta tuma lugá, no tabatin ningun señal di problema. P’esei nan a dicidí di regresá Maputo.

Sin embargo, segun cu nan tabata acercá Xinavane riba nan caminda di regreso, baricada di polis a para nan. Polis a spierta: “E awanan di inundacion for di Sur África a yega i a cera e caminda nacional. Bus ni truck no por pasa.” E mésun seccion di caminda cu nan a pasa e mainta ei, awor tabata completamente bou di awa! Ya cu e riunan mas panort tambe tabata subiendo, e área a keda aislá for di resto dje pais.

E dos rumannan a dicidí di pasa anochi den e stad ei pegá, Macia. Durante e anochi ei e situacion a empeorá. Henter e stad di Xinavane a keda inundá, i hende den e stad a perde tur cos. E rumannan a haci areglo pa yuda e Testigonan den e área ei yega na e Salon di Reino di Macia, caminda nan a establecé un campamentu temporal di refugiado. Mesora Testigonan a bai tiendanan grandi i a cumpra artículonan básico manera aros, bonchi, hariña i zeta.

Awor nan a cuminsá concentrá riba compañeronan cristian na Chókwè i stadnan pegá cuné. E superintendentenan den e congregacionnan na Chókwè a reuní i a organisá un evacuacion masal. Nan a plama e mensahe: “Sali mesora i bai Macia!” Sin embargo, poco despues e rumannan a tende cu hopi ruman di Xinavane no a yega. Pues nan a manda Testigonan bai wak kico a pasa cu nan. Tambe nan a tende cu un anciano cristian a hoga den su cas. A haci areglo pa su entiero i nan a localisá i yuda e sobrá Testigonan, di cua algun tabata riba dak di cas, pa yega Macia.

Despues cu nan a haci e areglonan aki, e representantenan di sucursal a bai Bilene, un stad chikitu na costa, caminda nan a charter un avion pa por a bai Maputo. Te caminda wowo por a mira, e region tabata inundá. Segun informe, den e provincia di Gaza so 600.000 hende a ser afectá.

E Situacion Ta Empeorá

Durante e siguiente dianan, awaceru a intensificá, i e provincianan central di Mozambique tambe a ser destruí. Anto e enorme ciclon tropical Eline a forma. Dia 20 di februari e ciclon a basha awaceru devastador riba e provincianan Inhambane, Sofala i Manica. Como consecuencia tabatin mas inundacion, morto i destruccion.

Anto, pa fin di februari, e stad di Chókwè i henter e region alrededor a ser inundá di un manera nunca bisto. Diasabra, 26 di februari, poco promé cu meianochi, awanan di inundacion a yega manera un avalancha grandi, lastrando tur cos den nan caminda bai cuné. Luis Chitlango, un Testigo di 32 aña, ta conta: “Un bisiña gritando dor di bentana a lanta nos for di soño.”

Chitlango a splica: “Ora nos a bula lanta for di cama, nos por a tende e zonido duru di awa. Segun nos tabata hui bai, nos a topa hopi colebra. Pa seis or di mainta nos a yega un área mas haltu, pero mas lat den mainta, ora awa a subi na tur banda, nos tabatin cu subi den palu. Nos grupo a consistí di 20 hende.

E hombernan a subi den palu promé. Despues e  muhernan a pasa e muchanan pa nan, i nan a mara e muchanan na takinan di palu. Despues e muhernan a subi cu nan babynan. De bes en cuando nos tabata baha for dje palunan i fula e suela bou di awa en busca di pinda, ya cu nos tabata sa cu nan a planta pinda den e área ei.

Despues di tres dia a dicidí cu nos tur mester cana bai Chókwè. Awa tabata yega te na nos pechu, i nos a lucha cu coriente fuerte. A lo largu di caminda nos a topa hopi hende den palu i riba dak. E siguiente dia e awa a baha suficiente pa truck yega e stad i hiba hende Macia.”

E Campamentu di Refugiado dje Testigonan

Dia 4 di mart e oficina di sucursal di Testigonan di Jehova a charter un avion i a hiba algun representante na e zona di desaster. Un parti grandi dje poblacion a hui bai Macia, cu a ser transformá den un enorme campamentu di refugiado. Hopi víctima dje inundacion tabata sufri di griep, malnutricion, malaria i otro malesa.

E esena tabata manera un zona di guera. Helicopternan, cu vários pais a manda, a yena shelu riba e stad i tabata baha riba pistanan improvisá pa descargá provision. Ora e tim di auxilio dje Testigonan a yega Macia, nan no solamente a haci areglo pa alimentá e víctimanan sino tambe a traha un seccion pa cuida esnan débil i enfermo. Pero promé, nan a obtené aprobacion di autoridadnan local, kendenan a aplaudí e iniciativa.

Tur mainta 6:30 n’e campamentu di Testigo, cu a acomodá casi 700 Testigo i tambe otro hende, nan a considerá un texto bíblico. Ora e cuminda cu e ruman muhernan cristian a prepará tabata cla, tabata yama nomber dje cabesnan di famia. Cada un tabata indicá cu dede cuantu plato e tabatin mester, i tabata entregu’é e cuminda.

Tur aspecto di bida den e campamentu tabata bon organisá. Tabatin hende asigná pa cumpra cuminda;  i otronan pa protehá e higiena dje awa di bebe, pa limpia latrina, etcétera. Funcionarionan gubernamental no a keda sin ripará e bon organisacion, i nan a comentá: ‘Ta bale la pena pa ta aki. Niun hende ta keda sin come, i no tin pleitu.’ Un autoridad local a bisa: ‘Tur hende mester bishitá e campamentu dje Testigonan pa wak con cos mester bai.’

Un dia e comité di auxilio a reuní cu tur anciano cristian i a informá nan cu e oficina di sucursal a haci areglo pa reconstruí cas i Salonnan di Reino i tambe percurá otro artículonan básico pa e víctimanan di inundacion. E siguiente mainta durante consideracion dje texto di Bijbel pa e dia ei, a anunciá e plannan aki. E aplauso tabata largu.

Aunke autoridadnan a contribuí cu dos tent grandi, hopi hende den e campamentu ainda tabata drumi den aire liber. P’esei a organisá un tim for di entre e víctimanan di inundacion pa construí un Salon di Reino grandi riba e tereno dje congregacion local. Nan a trah’é di caña i plachi di zim—estilo di Mozambique—pa acomodá 200 hende. Den dos dia so nan a complet’é!

Localisando Esnan Aislá

Miéntras tantu, dia 5 di mart, despues cu e awanan di inundacion a baha un poco, nan a forma un tim di auxilio pa bai n’e pueblo Aldeia da Barragem, ubicá den un dje promé regionnan cu a ser inundá. E tabatin un congregacion di mas o ménos 90 Testigo, i no a tende nada di nan.

Riba caminda, e tim a pasa Chihaquelane, un campamentu di refugiado grandi cu tabatin rond di 100.000 hende. Na tur dos banda di caminda e region tabata bou di awa te caminda wowo por a mira, i awa a asta lastra parti dje caminda bai cuné. Un miembro dje tim a conta: “Ora nos a yega Chókwè, nos a topa un esena di desolacion. Hopi cas na entrada dje stad ainda tabatin awa te na dak. Mayoria cas tabata bou di awa. Tabata birando scur i ainda nos tabatin cu biaha 25 kilometer promé cu nos yega Aldeia da Barragem.”

Durante e anochi, e tim a yega nan destinacion finalmente. Un miembro dje tim ta corda: “Nos a para i a puntra nos mes kico pa haci awor.” Anto hende a sali, gritando: “Rumannan!” i tabatin hopi harimentu duru i felis. Ta asina cu ora e Testigonan local a mira lus dje dos vehículonan, nan a pensa mesora cu lo por ta nan rumannan, i nan a bisa e otro hendenan esaki. E observadónan a keda hopi impresioná, bisando: ‘E hendenan aki di berdad tin amor. Nan ta trece cuminda i asta ta bin di bishita!’

Percurando Cuido Continuo

A yuda e rumannan di Aldeia da Barragem yega e campamentu na Macia, caminda a duna nan cuminda, acomodacion i tratamentu médico. Miéntras tantu, e situacion na Macia tabata birando crítico. Cuminda, remedi i combustibel tabata scars, ya cu ta cu avion nan tabata bini. Tabata urgente pa restorá un coneccion cu Maputo pero via tera. Dia 8 di mart a haci esaki.

E stad grandi di Xai-Xai tabata completamente inundá. Den centro dje stad tabatin lugá cu tabata 3 meter bou di awa! E Testigonan a forma un comité di auxilio pa soru pa nan rumannan einan. Tambe a organisá comiténan pa soru pa esnan den necesidad den e provincianan di Sofala i Manica.

Testigonan di otro pais a manda provisionnan di auxilio. Por ehempel, e sucursal di Sur África a haci areglo pa manda tonelada di paña, klechi i otro artículonan. I e sede mundial di Testigonan di Jehova na Brooklyn, New York, a pone fondonan disponibel pa atendé esnan afectá dor dje desaster.

Despues cu e awa di inundacion a baha suficiente i a haci un conteo di esnan cu a perde nan cas, a cuminsá cu e trabou di reconstruí cas i Salonnan di Reino. A establecé un comité di reconstruccion i cu apoyo di decenas di boluntario, nan a cuminsá traha mesora. Desde e tempu ei, a reconstruí mas cu 270 cas i tambe por lo ménos cincu Salon di Reino.

Ora e promé casnan construí dor di boluntarionan Testigo a cuminsá aparecé, hende a tuma nota. Un bisiña a comentá: ‘Boso ta adorá un Dios bibu. Nos pastornan no a corda riba nan carnénan cu ta sufriendo. Sin embargo, boso ta hañando e casnan bunita aki.’ Den áreanan asina hopi hende a bira receptivo pa e mensahe di Reino cu Testigonan di Jehova ta predicá, i e rumannan a cuminsá vários studio di Bijbel.—Mateo 24:14; Revelacion 21:3, 4.

Aunke hopi Testigo a perde tur nan posesionnan material, niun no a perde nan fe. Mas bien, nan fe den Jehova Dios i den nan asociacion mundial di compañeronan creyente a bira mas fuerte. Nan ta gradicidu na nan amoroso hermandad internacional cu a reaccioná asina lihé riba e desaster teribel aki. Den un manera personal nan a sinti Jehova su proteccion i cuido tierno, i semper nan lo corda e expresion bíblico: “Jehova ta grandi.”—Salmo 48:1.

[Plachi na página 24, 25]

Awa di lodo a inundá e stad Xai-Xai

[Plachi na página 25]

Cu avion tabata trece artículo di auxilio

[Plachi na página 26]

E tim di auxilio dje Testigonan a traha un seccion pa cuida esnan débil i enfermo

[Plachi na página 26]

Ta sigui traha cas nobo

[Plachi na página 26]

E campamentu di refugiado mas grandi tabatin 100.000 hende