For di Nos Lectornan

Intimidacion Sexual Lo mi kier expresá mi aprecio pa e artículo “Hóbennan Sa Puntra . . . Con Mi Por Trata cu Intimidacion Sexual?” (8 di september 2000) Na scol nan tabata yama mi un skat di nomber dor cu mi no tabata entregá na comportacion inmoral. Despues cu mi a caba scol secundario, mi a pensa cu e intimidacion lo a stop, pero un cantidad di mucha muher a yega di haci co’i frescu cu mi. Loke a yuda mi resistí esei ta di laga tur hende sa kico ta mi creencianan cristian. Danki pa percurá e alimento spiritual aki pa nos.

H. C., Zambia

E artículo tabata di gran yudansa. Un mucha homber cu tabata huntu cu mi den derde klas tabata blo wak mi. Awor mi sa precis kico pa haci.

H. K., Merca

El a yega net na ora! Na mi trabou mi ta sufri di intimidacion sexual. Esei tabata caba cu mi emocionalmente. Net ora mi tabata a punto di basha den otro, e artículo aki a sali. Awor mi sa con pa trata cu e hendenan na trabou.

L. T., Merca

Stad Ruso Como cu mi compania ta haci negoshi internacionalmente, mi ta gusta lesa artículonan tocante vários pais. Un colega tin un yu homber cu ta biba na Rusia, pues mi a cont’é tocante e artículo “Un Bishita n’e ‘Stad Mas Bieu di Rusia.’” (8 di september 2000) El a keda encantá cu e revista, i despues di a les’é el a pidi mi pa un otro revista Spierta! Mi a dun’é e edicion di 22 di mei 2000 (na ingles) cu e artículo “Un Oloshi Único na Praga.” Esaki a pon’é aceptá un abonament riba Spierta! Danki pa percurá informacion asina balioso.

S. O., Merca

Goulash Lali-lali? Mi di laga mi purba e receta pa goulash húngaro den e artículo “E Specerei Cu A Bini for di Otro Banda di Mundu.” (8 di september 2000) Tur cos a bai bon te ora el a bisa agregá 2 liter (8 cup) di awa. Mi goulash a parce un sopi en bes di e stobá cu e plachi ta mustra. Ta malu mi a comprendé e receta?

L. P., Cánada

No, ta nos a haci fout di yam’é un stobá, ya cu eigenlijk e receta ta pa sopi di goulash húngaro. Tin buki di receta ta sugerí pa usa ménos awa cu loke nos a recomendá. Pero ta interesante cu algun lector a purba e receta i a skirbi nos pa bisa cu nan a gust’é mashá!—RED.

Meditacion Mi kier gradicí boso pa e artículo “E Punto di Bista Bíblico: Meditacion Cu Ta Probechoso.” (8 di september 2000) Awor mi ta comprendé cu mi a bruha fantaseer cu meditacion. Dor di aplicá Filipensenan 4:8, mi sa awor con ta e manera corecto pa meditá riba mi problemanan. Masha danki!

W. P., Polonia

Flacu Asina cu mi a mira e título “Hóbennan Sa Puntra . . . Di Con Mi Ta Asina Flacu?” (8 di october 2000), mi wowonan a yena cu awa. Mi tin 16 aña i ta pisa 45 kilo. Como cu mi ta asina flacu, mi tabata haña mi mes mahos i inatractivo. Ora mi a lesa e artículo, mi a apreciá e sugerencianan práctico cu el a duna. Loke mas a conmové mi ta e conclusion, pasobra el a laga mi realisá cu Jehova ta wak curason.

E. L., Italia