Nos Por Salba e Palu di Cándelar?

DJE CORESPONSAL DI SPIERTA! NA BRAZIL

UN TEMPU parti zuid di Brazil tabata cubrí cu palunan di pino. Tabatin un especie cu parce un cándelar i esei a pon’é haña e nomber “palu di cándelar.” E ta conocí tambe como pino Paraná i pino brazilero.

E cononan cu ta cologá n’e palu di candelar ta mas grandi cu grapefruit, tin ta pisa asta 5 kilo. Un cono por tin te cu 150 simia, cu na portugues nan ta yama pinhões. Ora e cono ta hechu, e ta rementá habri cu un zonido duru, i e simianan ta basha abou.

Hende, para i bestia ta come e simianan, cu ta hole i smak manera castaño. Tabatin un tempu cu pinhões—cu ta un bon fuente di proteina i calcio—a forma e cuminda principal di algun tribu indígena den zuid di Brazil. Te awe hende ta usa e simianan. Por ehempel, den Estado Santa Catarina di Brazil, bo ta haña e simianan den platonan regional, manera paçoca de pinhão (pinhões machicá).

Anochi a cuminsá cera pa e palu di cándelar ora cu colonisadónan europeo di siglo 18 a mira su potencial como palu. No a tarda hopi cu nan tabata kap e palunan di cándelar pa traha cas of djis pa habri mondi pa planta cunucu di maishi i di wijndruif. Cu transcurso di tempu, tabata kap mas palu cu tabata planta. Awor, a sobra solamente un par di terenonan di mondi di pino aki aya. Como consecuencia, e balor dje palu di cándelar a subi drásticamente. “Awor pino no ta djis un fuente di palu mas,” un homber cu tin 50 aña ta procesá palu di pino, a comentá. “E ta oro.”

Investigadónan ta bisa cu si no tabata pa e para blauwe raafgaai, e palu di cándelar lo a stop di existí. E para incansabel aki ta come e simianan dje palu di cándelar, i ta warda algun den mos i den mata di lisinbein morto. Vários dje simianan aki ta spruit despues. Den un sentido anto, e blauwe raafgaai ta keda ocupá ta sembra palunan di cándelar! Pero lamentablemente, e cantidad di blauwe raafgaai ta menguando debí na destruccion dje mondinan di pino.

Awor algun compania di kap palu a cuminsá conserbá pidanan chikitu di mondi i tambe ta bolbe planta e cándelar den zuid di Brazil. Kisas esaki ta nificá cu tog di dia ta habri bek pa e palu di cándelar.

[Plachinan na página 11]

Cada cono ta contené te cu 150 “pinhões”

[Rekonosementu]

Palu i e cononan: Marcos Castelani