Bon Salú pa Tur Hende—Un Meta Alcansabel?

BO TA deseá pa mare abo cu bo famia por gosa di mihó salú? Claro cu sí. Pero miéntras cu mayoria di nos kisas ta sufri de bes en cuando di kebranto di salú, pa miyones di hende, enfermedad ta un compañero doloroso di bida largu.

Sin embargo, hende ta haciendo esfuerso na gran escala pa para e ola di malesa i enfermedad. Tuma e Organisacion Mundial di Salú (OMS), un agencia di Nacionnan Uní. Na un conferencia patrociná dor di OMS na 1978, delegadonan for di 134 pais i 67 organisacion di Nacionnan Uní tabata di acuerdo cu salú no ta simplemente libertad for di malesa of enfermedad. Nan a declará cu salú ta “un estado di bienestar físico, mental i social completo.” Anto e delegadonan a dal e paso intrépido di declará salú un “derecho humano fundamental”! Pues OMS a fiha e meta pa alcansá “un nivel aceptabel di salú pa tur hende na mundu.”

Un meta asina ta atractivo, asta noble. Pero ki probabilidad tin cu lo logra esei un dia? Di tur e camponan di actividad humano, medicina sigur a bira un di esnan mas confiá i admirá. Segun e korant británico The European, hende den paisnan occidental a custumbrá cu e “concepto médico tradicional dje ‘cura milagroso’: un píldora pa solucioná un problema.” Cu otro palabra, pa cada dolor, nos ta verwagt pa e campo médico bini cu un cura simpel i directo. Realmente e profesion médico por cumpli cu tal gran expectativa?