Catedralnan—Monumento na Onor di Dios of Hende?

DJE CORESPONSAL DI SPIERTA! NA FRANCIA

NA Moscú un tipo di resureccion a tuma lugá. E Catedral Cristo e Salbador, cu Stalin a basha abou na 1931, a ser reconstruí i su koepelnan di oro ta briya den e shelu ruso. Den e stad Évry, cerca di Paris, obreronan a pone toke final na e único catedral trahá na Francia durante siglo 20. Esaki ta un par di aña despues di consagracion dje catedral di Almudena na Madrid. Sin keda atras, New York City tin e catedral cu yama San Juan Divino. Dor cu nan tin mas cu 100 aña ta traha riba dje, el a ser yamá hopi bes San Juan Sin Caba. Asina mes, e ta un dje catedralnan mas grandi na mundu, abarcando mas cu 11.000 meter cuadrá.

Den tur parti di cristiandad, catedralnan inmenso ta dominá e paisahe di hopi stad. Pa fielnan, nan ta un monumento cu ta demostrá fe den Dios. Asta hende no-creyente kisas ta apreciá nan como obranan di arte of como ehempelnan clásico di arkitectura sobresaliente. No obstante, existencia dje casnan di adoracion aki cu ta masha elaborá i hopi bes escandalosamente caru, ta lanta preguntanan serio: Pakico i con a construí nan? Ki propósito nan tin?

Kico Ta un Catedral?

Despues di Cristo su morto su disipelnan a organisá nan mes den congregacionnan, di cua hopi a reuní den casnan privá. (Filemon 2) Pa vários década hombernan ‘anciano’ den sentido spiritual, a soru pa e congregacionnan aki. (Echonan 20:17, 28; Hebreonan 13:17) Sin embargo, despues di morto dje apostelnan tabatin un desviamentu for di cristianismo berdadero. (Echonan 20:29, 30) Cu tempu, vários anciano a halsa nan mes riba e otronan i hende a cuminsá considerá nan como obispu cu tin supervision riba vários congregacion; net loke Jesus a spierta contra dje. (Mateo 23:9-12) E palabra “iglesia,” cu originalmente a aplicá na e cristiannan mes, e ora ei a ser aplicá tambe na nan lugá di adoracion, e edificio mes. No a tarda hopi cu algun obispu a busca manera pa nan iglesia pas cu nan posicion. Asina a introducí un palabra nobo pa describí e iglesia dje obispu: catedral.

E palabra aki ta bini dje palabra griego kathedra, cu ta nificá “asiento.” Pues e catedral tabata e trono dje obispu, símbolo di su poder temporal riba tera. For di su catedral e obispu ta presidí riba un hurisdiccion, e obispado.

“E Época di Catedral”

Na aña 325 E.C., e Concilio di Nicea a reconocé formalmente cu ta establecé obispunan den stad. Awor cu e obispunan tabatin e apoyo dje Estado Romano hopi bes nan a busca i obtené regalonan costoso di tereno for di autoridadnan. Tambe nan a tuma over hopi lugá di adoracion pagano. Ora cu e Imperio Romano a cai den otro, e organisacionnan eclesiástico a sobrebibí i a crece bira dominante den Edad  Medio. Pronto e periodo ei a bira loke e historiadó frances Georges Duby ta yama “e Época di Catedral.”

Di siglo 7 pa siglo 14, e poblacion di Europa a bira tripel. Principalmente e stadnan a beneficiá dje cambio demográfico drástico aki, i nan prosperidad a aumentá. Como resultado, e stadnan episcopal mas ricu tabata e sitionan mas faborabel pa aumento di catedralnan colosal. Di con? Pasobra e proyectonan inmenso aki por a florecé solamente caminda tabatin un fluho continuo di placa!

Un otro factor cu a stimulá construccion di catedral tabata e veneracion popular di Bírgen Maria i relikianan religioso. Den siglo 11 i 12, esaki a bona mas cu nunca promé. Obispunan a expandé e adoracion aki i asina a aumentá e popularidad di nan catedral. Catedralnan na Francia a cuminsá carga e título Notre-Dame (Nos Señora) durante e tempu aki. “Cua stad no a dedicá un iglesia i hopi bes su catedral na dje?” segun e enciclopedia católico Théo. Pues, e catedral Saint-Étienne na Paris a ser dedicá na Notre-Dame. E catedral Notre-Dame na Chartres, Francia, a bira e santuario principal di nort Europa. Segun e buki The Horizon Book of Great Cathedrals (E Buki Completo di Catedralnan Grandi): “Niun solo personahe—ni sikiera Cristo Mes—no a dominá bida i pensamentu dje trahadónan di catedral asina cabalmente manera Bírgen Maria.”

“Nos Lo Traha un Catedral Asina Grandi . . .”

Pero di con hopi dje edificionan aki tabata asina grandi? For di siglo 4 caba, e catedral di Trier, Alemania, i esun di Ginebra, Suisa, a abarcá terenonan masha grandi, apesar dje cantidad relativamente chikitu di adoradó. Den siglo 11, e poblacion di Speyer, Alemania, no por a yena nan inmenso catedral. P’esei The Horizon Book of Great Cathedrals ta concluí cu e “tamaño i extravagancia [dje catedralnan] a revelá vários motivacion cu no tabata nada religioso.” Entre nan tabata “e orguyo arogante dje obispu of cabes di monasterio bou di kende su influencia mester a construí e edificio.”

Durante siglo 12 i 13, catedralnan tabata midi como promedio 100 meter, i e meta tabata pa nan tabatin mésun haltura como largura. Sobresaliente ta e catedral di Winchester na Inglatera, di 169 meter largu, i e Duomo di Milan na Italia, di 145 meter largu. Na Sevilla un funcionario di iglesia spañó a declará na aña 1402: “Nos lo traha un catedral asina grandi cu e hendenan cu mir’é ora e ta cla lo pensa cu nos cabes no tabata bon.” De echo, nan ta bisa cu e catedral di Sevilla ta e di dos mas grandi na mundu, cu su plafon curvá di 53 meter haltu. E toren dje catedral di Strasbourg na Francia ta midi 142 meter, ekivalente na un edificio di 40 piso. Den siglo 19, e toren dje catedral gótico Münster na Ulm, Alemania, tabata yega te 161 meter haltu, loke a hacié e toren di piedra mas haltu na mundu. Historiadó Pierre du Colombier ta insistí cu “ningun rekisito di adoracion ta hustificá tal exceso di proporcionnan gigantesco.”

Durante siglo 12 i 13, promotornan di catedral a probechá di un otro ‘motivacion cu no tabata nada religioso’: patriotismo urbano. Segun Encyclopædia Britannica: “Stadnan tabata pusta cu otro pa traha e catedral di mas haltu.” Conseheronan municipal, ciudadanonan pudiente i asociacionnan di fishi a combertí catedralnan den símbolonan di nan stad.

Costoso Ántes, Costoso Awe

Un escritor a describí e proyectonan di construí catedral como “abismonan financiero sin bom.” Pues anto, con a logra financiá e edificionan aki den pasado, si awendia mes ta costa un fortuna pa mantené nan? Den algun caso preladonan,  manera Maurice de Sully na Paris, a paga pa nan for di nan mes sacu. Tin biaha gobernantenan político, manera rey Jaime I di Aragon, a paga e cuenta. Pero, por lo general tabata entrada dje obispado cu a financiá e catedralnan. E placa aki a consistí di belasting feudal i di entrada for di propiedad. De echo, e obispu di Bolonia na Italia tabata poseé 2.000 cunucu! Na esaki tabata agregá entrada religioso di cen di colect, di indulgencia i di boet pa picá. Na Rouen, Francia, esnan cu a cumpra e derecho di come producto di lechi durante cuaresma a paga pa e catedral su asina yamá Toren di Manteca.

Tabatin algun donante masha generoso mes, i nan a keda onrá cu nan potret pintá den e bentananan di glas di color i cu escultura den iglesia. Evidentemente nan a lubidá e principio di dunamentu cristian anónimo. (Mateo 6:2) Tabatin mester di un fluho constante di placa cash, ya cu hopi bes e gastunan a surpasá loke a ser calculá. No ta un sorpresa anto cu e fervor pa haña placa a hiba hopi bes na fraude i extorsion. Por ehempel, acusá un hende di herehia a encerá hopi bes cu nan a confiscá e persona su propiedad. Esaki a haci posibel cu nan por a plunder supuesto herehenan, manera e catarnan, i esaki a financiá vários proyecto di construccion di iglesia. *

No tin nodi bisa cu iglesia mester a pone preshon constante pa placa por a sigui drenta. No tabata asina—manera algun historiadó a pretendé—cu e masanan a ser impulsá spontáneamente pa construí tal edificionan. Historiadó Henry Kraus ta declará: “Pa profundamente religioso cu e época di Edad Medio tabata, construccion di iglesia no tabata e promé prioridad dje pueblo.” P’esei hopi historiadó a criticá iglesia pa su extravagancia. E buki The Horizon Book of Great Cathedrals ta admití: “Por a usa e placa cu iglesia a gasta na construccion pa alimentá hende hambrá . . . of pa mantené hospital i scol. Pues, nos por bisa cu e catedralnan a costa cientos di miles di bida humano.”

Con A Traha e Catedralnan

Catedralnan ta un evidencia dje ingeniosidad di hende. Ta realmente asombroso con nan a construí edificionan asina inmenso usando tecnologia primitivo. Promé, nan a traha mapa detayá dje edificio. Na e sitio di coba piedra, nan a usa malchi pa haci sigur cu e rasgonan decorativo tabata mescos i cu e tamaño dje blokinan di piedra tabata corecto. Nan tabata marca e blokinan cuidadosamente pa indicá nan lugá exacto den e structura. Transporte dje piedranan tabata masha slow i costoso, pero apesar di esaki, segun e historiadó frances Jean Gimpel, ‘entre aña 1050 i 1350, Francia a coba saca mas piedra cu antiguo Egipto.’

Na e sitio di construccion mes tambe obreronan a logra hazañanan grandi usando e mecanismonan primitivo dje tempu ei pa hisa cos: katrol i takel, halá hopi bes dor di hende cu tabata cana riba tredmolen. E fórmulanan matemático cu ingenieronan djawe ta usa tabata desconocí e tempu ei. Constructornan tabatin cu dependé riba instinto i experencia. No ta un sorpresa anto cu hopi accidente serio a sosodé. Por ehempel, na aña 1284 e boognan di plafon dje catedral di Beauvais, Francia, a resultá di ta muchu grandi i nan a basha bou. Sin embargo, rasgonan inovativo manera pilar di sosten, boognan den laira, rand na boognan di plafon i torennan di decoracion a permití constructornan yega halturanan nobo.

Construccion por a dura for di 40 aña pa mas lihé (Salisbury, Inglatera) te vários siglo. Tin catedral, manera esun na Beauvais i na Strasbourg, Francia, cu nunca nan a caba.

“Un Eror den Prioridad”

E ‘structuranan bunita aki i pues costoso,’ manera papa Honorio III a bisa, a causa controversia for di comienso. Tabatin hende den iglesia cu a protestá contra e trabou i e sumanan fenomenal cu tabata enbolbí. Pierre  le Chantre, un prelado di siglo 13 di Notre-Dame di Paris, a declará: “Ta un picá pa construí iglesia manera nan ta hacié actualmente.”

Asta awe e catedral na Évry, pa mencioná solamente unu, ta provocá crítica fuerte. Manera e korant frances Le Monde a informá, hopi hende ta haña cu catedralnan ta reflehá “un eror den prioridad” i cu iglesianan “mester invertí den hende i den evangelisacion en bes di den piedra i decoracion.”

Sin duda, hopi dje hendenan cu a participá den construccion dje edificionan inmenso aki tabatin un amor sincero pa Dios. Ta bisto cu hendenan asina tabatin “un celo pa Dios,” pero “no segun conocimentu exacto.” (Romanonan 10:2) Jesucristo no a sugerí nunca pa su siguidónan construí casnan di adoracion elaborá. El a urgi adoradónan berdadero pa “adorá cu spiritu i cu berdad.” (Juan 4:21-24) Apesar di nan beyesa, e catedralnan imponente di cristiandad ta contrario cu e principio aki. Kisas nan ta monumento na onor dje hendenan cu a construí nan, pero nan no ta glorificá Dios.

[Nota]

[Plachi na página 13]

Catedral di Santiago de Compostela, Spaña

[Plachinan na página 15]

Te ariba: E bentana di glas di color forma di rosa di Notre-Dame, Chartres, Francia

Ariba: Detaye di un cortadó di piedra, Notre-Dame, Paris

[Plachi na página 15]

E catedral Notre-Dame di siglo 12, Paris

[Plachi na página 15]

Paden di catedral Notre-Dame, Amiens. E ta e edificio religioso mas grandi di Francia, cu boognan di 43 meter haltu