For di Nos Lectornan

Universo Mi a disfrutá mashá di e seri “Universo A Bin na Existencia pa Casualidad?” (8 di october 2000) Tabata masha interesante pa lesa con Jehova Dios a crea tur cos den un manera asina organisá. E artículo a mustra bon cla cu nos ta producto di creacion i no di evolucion.

E. V., Merca

Masha danki mes pa e seri “Universo A Bin na Existencia pa Casualidad?” Mi ta un studiante di promé aña di biologia, i e artículonan aki ta manera un buki di scol—pero skirbí bou dje tema di un Creador inteligente en bes di e teoria di evolucion. Esta refrescante pa mira e informacion aki presentá den un manera franco i razonabel!

K. L., Merca

Deportenan Extremo Recientemente mi a haña oferta pa haci hang gliding. Tabata un oferta tentador, pero mi tabata curioso pa sa kico Bijbel tin di bisa riba e asuntu. Un par di dia despues, mi a ricibí e contesta den boso artículo “Bo Mester Risca Bo Bida cu ‘Deportenan Extremo’?” (8 di october 2000) Hang gliding sigur-sigur ta parce un experencia espectacular. Pero mi relacion cu Jehova ta muchu importante pa mi risca mi bida dor di participá den e deporte aki.

M.M.S., Brazil

Boso a bisa cu ta “probablemente den un vision” Satanas a tenta Jesus. E tentacionnan ei no tabata experencia real?

C.G.H., Merca

Vários aspecto dje relato bíblico ta difícil pa cuadra cu otro si aceptá nan literalmente. Por ehempel, no ta existí niun ceru cu ta asina haltu cu Satanas por a mustra Jesus “tur e reinonan dje mundu i nan gloria.” Tampoco no ta probabel cu Jesus lo a permití pa Satanas literalmente “hib’é cuné den e stad santu” of stacion’é “riba e toren dje tempel.” (Mateo 4:5-8) Ta evidente anto cu un of otro forma di vision tabata enbolbí. Sea cual sea e manera cu el a sosodé, Satanas a tenta Jesus di berdad. E echo cu Jesus a nenga di sucumbí n’e tentacion ei a demostrá su integridad inkebrantabel.—RED.

Flacu Mi a haña e artículo “Hóbennan Sa Puntra . . . Di Con Mi Ta Asina Flacu?” masha interesante. (8 di october 2000) Mi ta un mucha muher di 32 aña di edad, pero semper mi tabata hopi flacu i mi tabatin masha bergwensa di mi aparencia. Henter mi bida hende a tenta mi cu nombernan manera Pal’i Lusafè of Pia di Flamingo. Hopi bes esaki a deprimí mi. Mi a gusta ora boso a bisa cu nos mester busca hende cu ta balorá nos pa loke nos ta di paden. Cristiannan no mester rebahá otro hende pa motibu di característicanan físico.

W. L., Merca