Ora Laman Bira Corá

DJE CORESPONSAL DI SPIERTA! NA FILIPÍNAS

Imaginá cu piscadónan ta cana bai cantu di laman, cla pa sigui nan rutina di mainta di prepará nan boto i redanan. Manera semper, nan ta spera di coge hopi piscá. Pero pa nan sorpresa, nan wowonan yen di soño ainda ta haña un bista horibel. Miles di piscá morto a laba bini cantu. E causa dje destruccion masal aki? MAREA CORÁ!

MAREA CORÁ ta un fenómeno mundial. Hende a yega di mira esei tantu n’e costanan Atlántico i Pacífico di Merca i Cánada. Tambe esei a yega di sosodé na Australia, Brunei, nortwest di Europa, Filipínas, Hapon, Malasia, Papua Nueva Guinea i otro lugánan. Maske relativamente poco hende sa di dje, marea corá no ta algu nobo.

E promé bes cu nan a mira marea corá na Filipínas tabata n’e provincia di Bataan na 1908. Na 1983 un marea corá a venená piscá i molusco den laman Samar, Bahia Maqueda i Bahia Villareal. Desde e tempu ei, hende a mira marea corá den hopi otro área na costa di laman. Zenaida Abuso, miembro dje Task Force Nacional di Marea Corá di Filipínas, a conta Spierta! cu “fuera di piscá cu a muri, e Departamento di Recursonan Acuático i di Pesca di Filipínas a documentá 1.926 caso di parálisis causá dor di shuatamentu cu molusco contaminá dor di marea corá.” * Pero kico precis e fenómeno mortal aki ta?

Loke Marea Corá Ta

E expresion “marea corá” ta referí n’e cambio di color cu tin bes ta tuma lugá den cierto área di océano of laman. Aunke hopi bes e awa su color ta corá, e por ta tambe un tipo di maron of geel. The World Book Encyclopedia ta informá cu “áreanan cu a cambia color por varia di ménos cu un par di yarda cuadrá te na mas cu 1.000 miya cuadrá (2.600 kilometer cuadrá).”

Kico ta causa e cambio di color ei? Generalmente, marea corá ta ser causá dor di vários especie di lima microscópico di un solo cel of dor di protozo cu ta ser yamá dinoflagelada. E organismonan hopi chikitu aki tin extensionnan cu parce zwiep, i ta manera cabei cu fraña na punta cu yama flagela, cu nan ta usa pa move den awa. Tin rond di 2.000 variedad di dinoflagelada, di cua 30 ta carga substancianan venenoso. Generalmente e organismonan hopi chikitu aki ta biba den awa cayente cu ta hopi salu.

Marea corá ta tuma lugá ora cu tin un aumento di ripiente i rápido of crecementu excesivo di e dinoflageladanan microscópico aki. E concentracion di e organismonan aki por  aumentá te na 50.000.000 pa cada liter di awa! Maske científiconan no ta comprendé completamente di con esaki ta sosodé, ta conocí cu dinoflagelada ta acumulá ora cierto condicionnan ta afectá e awa simultáneamente. Esakinan ta incluí weer abnormal, temperatura optimal, un sobreabundancia di nutricion den laman, hopi lus di solo i corientenan di awa faborabel. Tin biaha ora awaceru pisá cai, e ta laba mineral i otro substancianan nutritivo for di tera basha den laman na costa. E substancianan nutritivo aki por contribuí n’e explosion di dinoflagelada. E resultado? Marea corá!

Lamentablemente, ta parce cu tin bes hende ta empeorá e fenómeno aki. Ora cu basha gran cantidad di sushi industrial i di hende den awa, esaki por resultá den un sobreabundancia di cierto substancianan nutritivo. Esaki por activá e crecementu pisá dje poblacion di dinoflagelada. No ta dura mashá cu e oxígeno disponibel den awa ta mengua, causando asina morto di hopi piscá.

Marea corá ta tuma lugá den lamannan cayente i den awanan calmu cerca di costa, generalmente durante e periodo entre e fin di lunanan cayente i na principio dje temporada di awaceru. E por dura di un par di ora te cu vários luna, dependiendo di e condicionnan cu ta dominá den e área.

E Víctimanan

Mayoria marea corá ta inofensivo; sin embargo, algun ta haci hopi daño. Cierto especie di dinoflagelada ta saca substancianan tóxico den awa cu ta paralisá i mata piscá i otro bida di laman. Algun marea corá a causa un pérdida grandi di piscá, oester, sekat, clam, mosel, cabaron i cangreu cu ta biba di dinoflagelada. Ora cu un marea corá venenoso surgi, bo por mira un cantidad grandi di piscá morto ta drif riba awa, i nan por acumulá kilometernan largu riba playanan.

Hende tambe a ser afectá enormemente. Den áreanan caminda piscá ta un fuente di entrada, marea corá a stroba piscadónan di coge piscá, cu ta representá nan pan di cada dia. Pió ainda, marea corá a pone hende perde nan bida.

Venená dor di Marea Corá

Un dje venenonan cu algun dinoflagelada ta saca ta conocí como saxitoxina. Esaki ta un salu cu ta larga den awa i cu ta atacá e sistema nervioso di hende. P’esei a clasifik’é como un neurotoxina. The New Encyclopædia Britannica ta informá cu “substancianan venenoso bashá den awa ta iritá e sistema respiratorio di hende.” Resortnan cantu di playa mester a cera ora  cu olanan fuerte a plama substancianan tóxico di marea corá den aire.

Bo ta gusta come molusco i otro cuminda di laman? Wel, marea corá por haci molusco cu ta biba di dinoflagelada bira venenoso. E revista Infomapper ta declará cu ‘animalnan cu cocolishi i otro molusco manera oester, mosel i clam ta forma e peliger mas grandi pasobra nan ta obtené nan cumindá dor di filtra awa di laman i nan ta absorbá mas veneno cu piscá.’ Sin embargo, “piscá, sekat, cabaron i cangreu . . . tog por ta safe pa hende come.” E motibu? Substancianan tóxico di marea corá ta acumulá den tripa di e criaturanan aki i por lo general hende ta eliminá e tripa promé cu cushiná nan.

Tog, hende mester tene cuidou ora di come cuminda di laman, foral molusco, cu hende a coge den áreanan cu ta conocí cu nan ta contaminá dor di marea corá. E marea ei por causa un condicion cu nan ta yama PSP (paralytic shellfish poisoning) cu ta un parálisis causá dor di shuata cu molusco. Si bo a guli substancianan tóxico di marea corá lo bo por sinti e síntomanan denter di 30 minuut. E cuadro adhunto ta mencioná algun di e síntomanan aki. Si no trat’é adecuadamente, PSP por culminá den parálisis respiratorio cu lo por hiba na morto.

Actualmente, no tin cura ainda pa intoxicacion causá dor di marea corá. Sin embargo, algun procedura di emergencia tabatin un cierto éxito. Lo por eliminá substancianan tóxico di marea corá for di stoma di un pashent dor di pon’é saca. Labada di stoma via un slang den boca tambe a yega di ser usá pa saca e veneno. Den algun caso respiracion artificial ta necesario. Na Filipínas algun hende ta pensa cu bebe lechi di coco cu sucu bruin ta yuda e víctimanan recuperá mas lihé.

E Solucion

Actualmente, marea corá ta pa gran parti fuera di nos control. Pero hopi hende ta kere cu lo por minimisá e problema di marea corá si hende usa ménos fertilisante i pesticida kímico. Esaki lo evitá cu awa ta lastra nan basha den laman. Prohibicion pa tira sushi industrial i humano den laman tambe lo yuda. Un otro paso lo ta di limpia costanan di posibel fuente di substancianan nutritivo cu por pone dinoflagelada aumentá.

Entre tantu, algun gobiernu ta chek e asuntu hopi djacerca. Por ehempel, na Filipínas un agencia gubernamental ta test molusco regularmente pa haci sigur cu nan ta safe pa mercado local i internacional. Pero na final di cuenta, ta solamente e Creador por eliminá e efectonan perhudicial cu ta confrontá humanidad ora laman bira corá.

[Nota]

[Kuadro na página 24]

Síntomanan di Intoxicacion dor di Marea Corá

1. Lip, carni di djente i lenga ta hinca of kima

2. Cara ta hinca of bira doof, i e sensacionnan aki ta plama na otro parti di curpa

3. Dolor di cabes i biramentu di cabes

4. Un sed intenso i hopi babamentu

5. Walmentu di stoma, sacamentu i diarea

6. Problema pa hala rosea, papia i guli

7. Dolor den djoint di wesu i un sensacion di cabes fofo

8. Pulso acelerá

9. Debilidad di músculo i falta di ekilibrio

10. Parálisis di curpa

[Plachinan na página 24, 25]

Organismonan responsabel pa marea corá

Pirodinio bahamense

Gimnodinio catenato

Gambierdisco tóxico

[Rekonosementu]

Cortesia di dr. Rhodora V. Azanza, Universidad di Filipínas

Cortesia di dr. Haruyoshi Takayama

ASEAN-Canada Cooperative Programme on Marine Science

[Plachi na página 25]

Efectonan di marea corá

[Rekonosementu]

Grant Pitcher/Cortesia di WHOI

[Rekonosementu pa Potrèt na página 23]

Peter J. S. Franks, Scripps Institution of Oceanography

[Rekonosementu pa Potrèt na página 25]

Scripps Institution of Oceanography