E Punto di Bista Bíblico

Tur Religion Ta Diferente Caminda Cu Ta Hiba na Dios?

“PA AMI, ta casi increibel cu e Dios di henter e universo a opta pa hende conoc’é via un religion so,” e autor Marcus Borg a declará. Desmond Tutu, ganadó di Premio Nobel di Pas, a bisa: “Ningun religion por pretendé di tin e berdad completo tocante e misterio” di fe. Un punto di bista popular hindú ta “Jotto moth, totto poth,” cu traducí den un manera liber ta nificá cu tur religion ta simplemente diferente caminda cu ta hiba n’e mésun meta. Budistanan tambe ta compartí e punto di bista aki. Sí, miyones di hende ta kere cu tur religion ta diferente caminda cu ta hiba na Dios.

Historiadó Geoffrey Parrinder a declará: “Tin bes hende sa bisa cu tur religion tin e mésun meta of cu nan ta maneranan igual cu ta hiba n’e berdad of asta cu nan tur ta siña e mésun doctrina.” Ta cierto cu tin similaridad entre e siñansa, rito i diosnan di religionnan. Mayoria religion ta papia di amor i ta siña cu mata, horta i gaña ta malu. Den mayoria grupo religioso, tin algun hende cu ta haci esfuerso sincero pa yuda otro hende. Pues anto, si un persona ta sincero den su creencianan i ta purba hiba un bida bon, ta importá na cua religion e ta afiliá? Of tur religion ta simplemente diferente caminda cu ta hiba na Dios?

Sinceridad So Ta Suficiente?

Considerá e caso di Saulo, un hudiu di promé siglo cu a bira e apostel cristian conocí como Pablo. E tabata un apoyadó celoso di hudaismo, i esaki a pone cu el a purba caba cu e adoracion di e siguidónan di Cristo ya cu el a pensa cu nan adoracion tabata inaceptabel. (Echonan 8:1-3; 9:1, 2) Sin embargo, mediante e misericordia di Dios, Saulo a bin comprendé cu hende hopi religioso manera e mes lo por tabatin celo pa Dios, i tog debí cu nan no tin tur informacion corecto, nan lo por tabata robes. (Romanonan 10:2)  Ora Saulo a haña sa mas tocante Dios su boluntad i tratonan, el a cambia i cuminsá adorá huntu cu e mésun personanan cu e tabata persiguí, esta, e siguidónan di Jesucristo.—1 Timoteo 1:12-16.

Bijbel ta bisa cu tin cientos di religion pa scoge for di dje i cu sea cual sea esun cu nos scoge, e ta aceptabel pa Dios? Apostel Pablo a ricibí instruccion for di Jesucristo resucitá kende a bisa net lo contrario. Jesus a mand’é cerca hende dje nacionnan “pa habri nan wowo, pa haci nan bolbe for di scuridad na e lus i for dje autoridad di Satanas na Dios.” (Echonan 26:17, 18) Ta keda claro anto cu ta importá cua religion nos ta scoge. Hopi dje hendenan cu Pablo mester a bai cerca dje tabatin un religion caba. Pero nan tabata den “scuridad.” En realidad, si tur religion tabata simplemente diferente caminda cu ta hiba na bida eterno i na Dios su aprobacion, lo no tabata necesario pa Jesus entrená su siguidónan p’e trabou di haci disipel cu el a comisioná nan cuné.—Mateo 28:19, 20.

Den su famoso Sermon Riba Ceru, Jesus a bisa: “Drenta p’e porta smal; pasobra hanchu i espacioso ta e caminda cu ta hiba na destruccion, i hopi ta esnan cu ta drenta dor di dje; miéntras cu smal ta e porta i pertá e caminda cu ta hiba na bida, i poco ta esnan cu ta hañ’é.” (Mateo 7:13, 14) Bijbel ta declará bon cla cu tin “un fe.” (Efesionan 4:5) Ta bisto cu hopi hende cu ta riba e caminda “hanchu” tin un religion. Pero nan no tin e “fe” ei. Siendo cu tin solamente un forma di adoracion berdadero, esnan cu ta deseá di haña e fe berdadero, tin cu busk’é te ora nan hañ’é.

Busca e Dios Berdadero

Desde principio di historia humano, Dios a bisa hende loke e kier pa nan haci. (Génesis 1:28; 2:15-17; 4:3-5) Awe Bijbel ta splica su rekisitonan bon cla. Esaki ta haci posibel pa nos distinguí adoracion aceptabel for di adoracion inaceptabel. (Mateo 15:3-9) Algun hende a heredá nan religion, miéntras cu otronan ta djis sigui e mayoria den comunidad. Pa hopi hende religion ta simplemente un asuntu cu ta dependé di e tempu i lugá cu nan a nace. Sin embargo, bo mester laga bo scogementu di religion na casualidad of laga otro hende tuma e decision aki pa bo?

Bo escoho di religion mester ta un decision informá basá riba un examinacion cuidadoso di e Scritura. Den promé siglo, tabatin hende educá cu a haci mas cu djis aceptá e palabranan di apostel Pablo, sin wak mas aleu. ‘Cuidadosamente nan a examiná e Scritura diariamente en cuanto si e cosnan aki tabata asina.’ (Echonan 17:11; 1 Juan 4:1) Di con abo no ta haci mescos?

Bijbel ta bisa cu e Dios di universo ta busca hende cu ta ador’é cu berdad. Manera ta pará skirbí na Juan 4:23 i 24, Jesus a splica: “No obstante, e ora ta bini, i ta awor, ora e berdadero adoradónan lo adorá e Tata cu spiritu i cu berdad, pasobra, en realidad, e Tata ta busca hende asina pa ador’é. Dios ta un Spiritu, i esnan cu ta ador’é mester adorá cu spiritu i cu berdad.” Solamente “adoracion cu ta limpi i incontaminá desde e punto di bista di nos Dios i Tata,” ta aceptabel p’e. (Santiago 1:27) Dios a bendicioná e búskeda di miyones di hende pa haña e caminda smal cu ta hiba na bida. Lo e no duna bida eterno na hende cu ta indiferente, sino mas bien na esnan cu ta haci berdadero esfuerso pa haña e caminda smal cu el a stipulá, i cu ta siguié.—Malakías 3:18.