Di Con Hende Ta Usa Droga?

“MI TABATIN 13 aña, i ruman muher di mi mihó amigu a invitá nos na nan apartamento un anochi. Tur hende a cuminsá huma marihuana. Na promé instante, mi a nenga, pero finalmente despues cu nan a ofrecé mi vários biaha, mi a purb’é.” Asina Michael, di Sur África, a splica con el a bini den contacto cu droga.

“Mi ta bini di un famia conservativo cu ta gana nan pan di música clásico. Mi tabata toca den un orkesta, i un dje músiconan sa huma marihuana regularmente durante pausa. Persistentemente el a ofrecé mi marihuana durante un periodo di vários luna. Finalmente mi a purb’é i a cuminsá us’é cu regularidad.” Asina Darren, un canades, a cuminsá usa droga.

Tur dos despues a bai usa otro droga, manera LSD, opio i stimulante. Mirando atras, awor como ex-usadó di droga, nan ta di acuerdo cu ta e influencia di nan pareunan tabata e motibu principal cu nan a cuminsá usa droga. Michael ta bisa: “Nunca mi a pensa cu lo mi usa droga, pero e muchanan ei tabata mi único amigunan, i naturalmente bo ta sigui nan.”

E Mundu di Entretenimentu

Un dje motibunan principal cu sigur ta pone hopi hende cuminsá usa droga ta preshon di nan pareunan, i foral hóbennan ta vulnerabel. Ademas, nan ta mira e ehempel di nan ídolonan den e mundu di entretenimentu cu ta ehercé un influencia fuerte riba nan fanáticonan hóben.

Foral den e industria di entretenimentu tin hopi uso di droga. Den e ramo di música hopi bes artistanan top ta bira enbolbí cu droganan pisá na cierto etapa di nan carera. Hopi strea di cine tambe ta usadó regular di droga.

Personanan den farándula por duna droga un atraccion fasinante cu aparentemente hóbennan ta haña difícil pa resistí. Newsweek a informá na 1996: “E cayanan di Seattle ta yen di mucha yong cu a muda einan pa usa heroina, djis pasobra [e músico di rock] Cobain a haci esei.”

Revista, película i television ta presentá e mundu di droga como algu fasinante i romántico. Di igual manera, algun diseñadó prominente den e mundu di moda ta preferá di usa modelonan hopi delegá i cu tin e aparencia decaí, den imitacion dje adictonan.

Di Con Tin Hende Ta Bira Adicto?

Tin vários otro factor cu ta contribuí na e creciente mal uso di droga. E factornan aki ta entre otro: desilusion, depresion i un falta di propósito den bida. Otro motibunan ta problema económico, desempleo i mal ehempel di mayornan.

Algun hende cu tin dificultad cu relacionnan humano ta usa droga pa yuda nan trata den nan contactonan social. Nan ta kere cu droga ta aumentá nan confiansa, i ta laga nan sinti nan mes inteligente i gustá pa hende. Otro hende simplemente ta haña cu ta mas fácil pa usa droga, cu siña dirigí nan bida cu éxito.

Un otro motibu pakico hóbennan ta acudí na droga ta pasobra nan ta sinti nan laf. E buki The Romance of Risk—Why Teenagers Do the Things They Do (E Fasinacion di Riesgo—Di Con Tienernan Ta Haci e Cosnan Cu Nan Ta Haci) ta bisa di hóbennan cu ta sinti nan laf i cu no tin supervision di mayornan: “Despues di scol mucha homber i muher ta yega haña cas bashí. No ta straño anto cu nan ta sinti nan solitario i no kier ta nan so. Amigunan ta djoin  nan, pero asta huntu nan ta sinti nan mes hopi bes laf. Nan ta wak television i videonan di música pa oranan largu of ta subi Internet en busca di excitacion. Ta masha fácil pa humamentu, uso di droga i bebementu bira parti dje esena aki.”

Michael, mencioná anteriormente, a bisa tocante e falta di supervision di su mayornan na cas: “Mi bida di famia tabata felis. Nos tabata un famia hopi cerá. Pero, mi mayornan tabata traha i no tabatin supervision durante dia. Tambe, nos mayornan a duna nos masha hopi libertad. No tabatin disiplina. Mi mayornan no tabata sa mes cu mi tabata usa droga.”

Una bes adicto, hopi hende ta sigui usa droga pa un simpel motibu: nan gust’é. Michael, kende tabata usa droga tur dia, a bisa dje efectonan: “Mi tabata biba den un mundu di fantasia. Mi por a scapa di cualkier preshon cu mi tabatin. Nunca mi no a sinti mi menasá. Tur cos tabata bunita.”

Un otro ex-usadó di droga cu yama Dick, di Sur África, a describí e efecto cu marihuana tabatin riba dje ora el cuminsá us’é na edad di 13 aña: “Mi tabata hari tur chiste. Tur cos tabata pret.”

Parce cu spiertamentunan tocante e daño cu droga por haci no ta spanta hóbennan cu net-net nada. Nan tin e tendencia di tin un actitud di “esei lo no pasa cu mi.” E buki Talking With Your Teenager (Papia cu Bo Tiener) ta mencioná di con tienernan ta ignorá spiertamentunan cu ta bisa cu droga ta dañino pa salú: “Nan ta asina resistente i yen di vitalidad cu nan no ta kere cu nan salú lo ser afectá. E sintimentu aki di cu ‘nada no por pasa mi’ ta masha comun den adolesencia. Tienernan ta pensa cu cancer di pulmon, alcoholismo, adiccion pisá na droga, ta cosnan cu ta pasa cu hende cu ta mas bieu, no cu nan.” Hopi di nan simplemente no ta conciente dje peligernan, i esei ta keda bisto den e popularidad dje droga ecstasy. Kico e ta?

Ecstasy i Fiestanan ‘Rave’

E droga MDMA basá riba anfetamina, conocí como ecstasy, ta ser usá comunmente na fiestanan di baile cu ta dura henter anochi i cu ta ser yamá ‘rave.’ E bendedó ta fomentá e impresion cu tuma ecstasy ta un manera safe pa experenciá un sintimentu di euforia, plus bo ta haña energia sinfin pa baila henter anochi. E droga ta yuda bailadónan sigui bai pa oranan largu te ora cu finalmente nan ta experenciá loke un escritor a referí na dje como “un estado manera den un trans.” Un hóben a splica e atraccion di ecstasy: “E excitacion ta cuminsá na bo tenchinan, i ta lora bo den un calor i amor increibel segun cu lentamente e ta subi bai na bo cabes.”

 Scan di celebro cu nan a haci di usadónan regular di ecstasy a duna evidencia tangibel cu ecstasy no ta e droga inofensivo cu bendedónan ta pretendé cu e ta. Evidentemente e ta daña fibranan di nervio den e celebro i ta reducí nivelnan di serotonin. Tin posibilidad cu e daño ei ta permanente. Cu tempu, esaki por hiba na trastornonan manera depresion i pérdida di memoria. Tin informe di algun morto entre usadónan di ecstasy. Tambe tin vários dealer di droga cu ta mescla ecstasy cu heroina afin di haci nan clientenan adicto.

Con Fácil E Ta pa Obtené?

Den hopi pais prijs di droga a baha ya cu e suministro a subi. Esaki pa un parti ta debí na cambionan político i económico. Sur África ta un ehempel típico caminda cambio político a resultá den aumento di traficacion i intercambio cu otro paisnan. Esaki, huntu cu controlnan limitá na frontera, a habri caminda mas ainda pa traficacion di droga. Debí na creciente desempleo, miles di hende ta dependé di benta di droga ilegal pa haña entrada. Caminda droga ta skeiru tur caminda, crímen violento ta bai samsam cuné. Segun un informe di korant, muchanan di scol na Gauteng, Sur África—algun di nan di apénas 13 aña—ta bou di vigilancia di polis pa bendementu di droga. Un cantidad di scol den e área a cuminsá laga alumnonan haci test di droga.

Kico Ta e Causa Básico?

Claramente tin hopi motibu pakico hende ta usa droga. Pero nan tur ta síntoma di un problema mas profundo, un causa básico. Escritor Ben Whitaker a referí na esaki: “No ta soledad i desesperacion so ta pone hende usa droga. E echo cu awe mas i mas hende ta bira adicto na dje ta un señal di advertencia dje debilidad i defectonan cu tin den nos sociedad: ki otro motibu por tin cu un cantidad grandi asina di hende bon pará i yen di talento ta preferá droga riba e realidad dje tempu actual?”

Esaki ta un bon pregunta, un pregunta cu ta laga nos realisá cu nos sociedad materialista i obsesioná cu logro hopi bes no ta satisfacé nos necesidadnan emocional ni spiritual. Asta mayoria religion no tabata capas pa satisfacé e necesidadnan ei pasobra nan a pasa por haltu dje causa básico di hende su problemanan.

Nos tin cu saca afó kico e causa básico ei ta i enfrent’é promé cu nos por haña e único solucion permanente pa e problema di droga. E siguiente artículo lo trata cu esei.

[Plachi na página 7]

Tin biaha hende famoso ta presentá uso di droga como atractivo i romántico

[Plachi na página 7]

E mundu di música moderno ta saturá cu uso di droga

[Plachinan na página 8]

Ta normal pa haña e droga ecstasy na fiestanan ‘rave’

[Rekonosementu]

AP Photo/Greg Smith

Gerald Nino/U.S. Customs