Hóbennan Sa Puntra . . .

Dios Lo Tende Mi Oracionnan?

“Mi ta haci oracion tocante tur cos pasobra Jehova ta mi amigu, i mi sa cu lo e yuda mi si mi tin un problema.”—Andrea.

E HOBENCITA Andrea tin sigur cu Dios ta tende su oracionnan. Pero no ta tur hóben ta mésun sigur. Tin ta sinti cu nan ta muchu leu for di Dios pa acerk’é. Kisas nan ta asta puntra nan mes si Dios ta suficiente interesá den nan pa ta bale la pena haci oracion.

Kico ta e clave di oracion? Simpel bisá: cu bo por tin un berdadero amistad cu Dios. E salmista a resa: “Esnan cu conocé bo nomber lo confia den bo.” (Salmo 9:10) Ke tal di abo? Bo conocé Dios suficiente bon pa bo por resa na dje i confia cu e ta tende bo? Promé cu bo sigui lesa, sea asina bon di purba contestá e preguntanan den e cuadro aki bou titulá “Con Bon Bo Conocé Dios?” Cuantu di nan bo por contestá?

CON BON BO CONOCÉ DIOS? Contesta na página 27

1. Con ta Dios su nomber, i kico e ta nificá?

2. Cua ta e cuater atributonan principal di Dios cu Bijbel ta revelá?

3. Kico tabata Dios su expresion mas grandi di amor pa humanidad?

4. Con nos por tin un amistad cu Dios?

5. Cua actitud apropiado nos mester tin ora nos ta haci oracion?

Bo por contestá por lo ménos algun di nan awor, asta promé cu bo lesa e resto dje artículo? Sí ta asina anto bo sa mas di Dios cu mayoria hende. Pero kisas bo contestanan ta revelá cu bo tin cu gana mas conocimentu di dje, pa bo siña conoc’é mas íntimamente. (Juan 17:3) Pa logra esei, considerá djis un par dje cosnan cu Bijbel ta siña nos tocante e “Tendedor di oracion.”—Salmo 65:2.

Dios Ta un Persona Real

Pa cuminsá, Bijbel ta yuda nos comprendé cu Dios no ta un forsa impersonal. E ta un persona cu un nomber: Jehova. (Salmo 83:18) Na hebreo su nomber ta nificá “E Ta Causa pa Bira.” E por bira loke sea ta necesario pa e por cumpli cu su propósito. Un bola di energia impersonal lo no por haci esei! P’esei ora bo ta resa, bo por tin sigur cu bo no ta papiando den laira ni cu un forsa abstracto. Bo ta papiando  cu un persona, un persona cu por tende bo oracionnan i tambe reaccioná riba nan.—Efesionan 3:20.

P’esei e hóben Diana ta bisa: “Mi sa cu unda cu mi ta, Jehova lo scucha mi.” Pa bo por tin e siguransa ei, Dios mester ta real pa bo! Bijbel ta bisa: “Esun cu ta acudí na Dios mester kere cu e ta existí.”—Hebreonan 11:6.

Un Fuente di Sabiduria i Poder

Dios realmente por yuda nos pasobra su poder ta masha impresionante. E poder ei ta sin límite. Prueba di esei ta e magnitud i complehidad dje universo material. Maske tin miles di miyones di strea incontabel, tog Bijbel ta bisa cu Jehova sa nan tur su nomber! Mas cu esei, e ta e fuente di tur e energia cu e streanan ei ta contené. (Isaías 40:25, 26) Esei no ta asombroso? I tog pa asombroso cu e echonan aki ta, Bijbel ta bisa cu “esakinan ta djis un parti minimal di su obranan”!—Job 26:14, Beibel Santu.

Considerá tambe Jehova su sabiduria sin límite. Bijbel ta bisa cu su pensamentunan ta “masha profundo.” (Salmo 92:5) El a traha hende, i p’esei e ta comprendé nos mihó cu nos mes. (Salmo 100:3) Dor cu e ta existí “for di tempu indefiní pa tempu indefiní,” su experencia no tin límite. (Salmo 90:1, 2) No tin nada cu lo e no por comprendé.—Isaías 40:13, 14.

Con Jehova ta usa tur e poder i sabiduria ei? Segun 2 Crónicanan 16:9: “Pa loke ta Jehova, su wowonan ta pasando rond di henter e tera pa mustra su forsa na fabor di esnan kende nan curason ta completo pa cuné.” Simplemente no ta existí un problema cu bo por tin cu Dios no por solucioná of yuda bo trata cuné. E hobencita Kayla ta corda: “Poco tempu pasá ora ami cu mi famia tabata pasando den un periodo difícil, mi a resa na Jehova, i mi ta sinti cu el a yuda nos pasa dor dje circunstancianan, problemanan i sintimentunan cu di otro manera lo tabata insoportabel.” Ora bo ta papia cu Dios, bo ta acudiendo na e fuente di sabiduria. Bo no por haci nada mas mihó cu esei!

Un Dios di Husticia i Amor

Pero con bo por sa cu Dios kier yuda bo? Pasobra Jehova a scoge pa haci su mes conocí, no via su poder inmenso ni su sabiduria profundo ni tampoco via su husticia firme. Mas bien, Jehova ta conocí principalmente pa su atributo di amor. “Dios ta amor,” segun 1 Juan 4:8. I e gran amor ei ta duna nos e confiansa cu lo e contestá nos oracion. E expresion mas grandi di su amor tabata ora el a duna su Yu como un sacrificio di rescate pa nos por disfrutá di bida eterno.—Juan 3:16; 1 Juan 4:9, 10.

Dor cu Dios ta amor, nunca bo no mester tin miedu cu lo e ignorá bo of trata bo inhustamente. Deuteronomio 32:4 ta bisa: “Tur su camindanan ta husticia.” Dios su amor pa bo ta un garantia cu lo e scucha bo. Esaki ta duna nos e confiansa pa cont’é nos pensamentu i sintimentunan di mas íntimo.—Filipensenan 4:6, 7.

 Amistad cu Dios

Eigenlijk, Jehova ta invitá nos pa papia cuné. E no kier ta un persona desconocí pa nos. Al contrario, atrabes di henter historia humano Jehova a invitá hende pa nan ta su amigu. Entre esnan cu a gosa di amistad cu Dios, hende cu tabata agradabel pa su curason, tabatin hende homber i hende muher, hóben i bieu. Entre nan tabatin hende manera Abraham, rey David i Maria, mama di Jesus.—Isaías 41:8; Lucas 1:26-38; Echonan 13:22.

Bo tambe por ta un amigu di Jehova. Claro cu tal amistad no kier men cu bo mester mira Dios manera un sorto di genio cu bo por yama ki ora cu bo tin un deseo of un problema. Nos oracionnan no por enfocá solamente riba nos propio necesidadnan. Si nos kier Dios su amistad, nos tin cu interesá den su boluntad—no den di nos mes so—i realmente nos mester haci e boluntad di Dios. (Mateo 7:21) P’esei Jesus a siña su disipelnan pa nan enfocá nan oracionnan riba e cosnan cu ta importante pa Dios. E di: “Boso, anto, tin cu haci oracion asina aki: ‘Nos Tata cu ta den shelu, laga bo nomber sea santificá. Laga bo reino bini. Laga bo boluntad sosodé, mescos cu den shelu, tambe riba tera.’” (Mateo 6:9, 10) Tambe nos oracionnan mester ta yen cu alabansa i gradicimentu na Dios!—Salmo 56:12; 150:6.

Sin embargo, nunca nos no mester pensa cu nos necesidadnan of preocupacionnan ta muchu chikitu of di ménos importancia pa haci oracion tocante nan. Steve ta bisa: “Maske mi ta purba di ta franco cu Dios, tin biaha mi ta sinti cu mi no mester molesti’é cu algun cos rutinario di bida.” Ki ora cu bo cuminsá sinti asina, purba corda loke Jesus a siña su disipelnan: “Ta bende cincu mofi pa dos moneda di poco balor, no ta berdad? Tog Dios no ta lubidá ningun di nan. . . . No tene miedu; boso ta bal mas cu hopi mofi.” (Lucas 12:6, 7) Esei no ta trankilisante?

Pues anto, ta fácil pa mira cu mas bo sa di Jehova, mas lo bo ser impulsá pa acerk’é den oracion i mas confiansa lo bo tin cu Jehova por yuda bo i lo hacié. P’esei, kico mester ta bo actitud mental ora bo ta acercá Dios den oracion? Bo mester desplegá respet, humildad i inegoismo. Bo ta kere cualkier funcionario haltu riba tera lo scucha bo si bo haci un peticion na dje den un manera orguyoso of sin respet? Pues no mester sorprendé bo cu Jehova tambe ta verwagt pa bo mustra respet p’e i pa su normanan promé cu e contestá bo oracionnan.—Proverbionan 15:29.

Miles di hóben temeroso di Dios a siña deshogá nan curason na Dios. (Salmo 62:8) Brett ta bisa: “Ora Jehova contestá mi oracionnan, esei ta un animacion pa mi cu ainda e t’ei como mi amigu.” Ke tal di abo? Con abo por disfrutá dje mésun clase di amistad cu Dios? Dos hóben cristian a bisa lo siguiente:

Rachel: “Pa bira mas íntimo cu Jehova, mi ta sinti cu mi mester studia su Palabra mas profundo, i mi ta purba desaroyá un anhelo pa e tipo di studio ei.”—1 Pedro 2:2.

Jenny: “Mi ta sinti cu mas enbolbí bo ta den Jehova su sirbishi, mas cerca di dje bo ta sinti bo.”—Santiago 4:8.

Bo a yega di puntra bo mes cuantu beneficio realmente tin den haci oracion? Un hóben cristian ta bisa: “Lo mi sinti mi mas cerca Dios si e papia cu mi of manda un mensahe pa mi.” Ya cu ora nos haci oracion Jehova no ta contestá nos na un manera cu nos por tende, con oracion realmente ta beneficiá nos? Den un siguiente edicion nos lo considerá esaki.

[Kuadro na página 27]

Contesta di preguntanan na página 25

[Plachi na página 27]

1. Jehova. E ta nificá “E Ta Causa pa Bira.”

2. Amor, poder, husticia i sabiduria.

3. El a manda su Yu unigénito, Jesus, pa muri na nos fabor.

4. Dor di no ta simplemente interesá den nos propio necesidadnan sino dor di interesá den e boluntad di Dios i hacié.

5. Nos mester ta humilde, respetuoso i inegoista.

[Plachinan na página 26]

Studia Bijbel i siña for di creacion lo yuda bo conocé Dios mihó