E Nomber di Dios A Cambia Mi Bida!

SEGUN E RELATO DI SANDY YAZZIE TSOSIE

TRATANDO di sconde, ami cu mi ruman muhernan tabata bou di cama ta hari i dal otro, ora e mormonnan a bati na nos porta. * Ora cu finalmente mi a habri porta, mi a bisa nan den un forma onbeskop cu nos ta indjan navaho tradicional i cu mi no kier pa nan papia cu nos tocante niun religion di hende blancu.

Nos mayornan a bai e centro di intercambio comercial pa busca artículonan di promé necesidad. Nan lo a yega cas bek anochi. Ora nan a regresá, nan a tende cu mi a haci cos di onbeskop cu e mormonnan. Nan a duna mi e bon conseho pa nunca mas falta niun hende respet. Nan a siña nos pa trata hende cu respet i bondad. Mi ta corda un dia ora un bishitante inesperá a yega. Mi mayornan a caba di cushiná pafó di cas. Hospitalariamente nan a invitá e bishitante pa come promé, anto despues nos a come.

Bida den e Reservacion

Nos tabata biba na Howell Mesa, Arizona, 14 kilometer nortwest dje Reservacion di Indjan Hopi, leu for di stadnan yen di hende i tráfico. Esaki ta den e parti zuidwest di Merca, caminda tin paisahenan espectacular den desierto, interumpí de bes en cuando pa formacionnan extraordinario di piedra di santu corá. Tin hopi ‘mesa,’ cu ta plateaunan haltu i steil. For di riba e mesanan aki nos por a vigilá nos carnénan come yerba te cu shete kilometer leu. Mi stima e serenidad dje pais aki mashá, mi tera natal!

Durante scol secundario mi a cera hopi cu mi primunan cu a sostené e Movementu di Indjan Mericano (AIM). * Mi tabata masha orguyoso di ta un mericano nativo i a bisa hende blancu kico mi a pensa dje décadanan di opresion, cu segun mi a ser causá dor dje Departamento pa Asuntunan di Indjan (BIA). Pero contrali na mi primunan, mi no a desplegá mi odio abiertamente. Mi a manten’é secreto den mi curason. Esei a pone mi odia ken cu tabatin un Bijbel.

Mi a razoná cu ta Bijbel a duna hende blancu e poder pa kita nos tera i derechonan i nos libertad di practicá nos propio ritonan sagrado! Mi a asta falsificá e firma di mi tata pa mi no tabatin cu participá den ceremonianan protestant ni católico tempu cu mi tabata den internat i cu nan tabata forsa nos bai misa. Meta dje scolnan ei tabata pa absorbá nos den nan cultura i pone nos lubidá nos herencia indjan. Nos no tabatin mag di ni sikiera papia nos propio lenga!

Nos tabatin un respet profundo pa naturalesa i nos ambiente. Tur mainta nos a bira  cara pa oost, haci nos oracionnan i duna gradicimentu dor di stroi e pollen di maishi sagrado. * Esei tabata mi entrenamentu formal den adoracion na estilo navaho, mi a acept’é cu orguyo i di henter mi curason. Cristiandad su idea di bai shelu no a atraé mi, ni mi no a kere den un tormento den fiernu di candela. Mi curason tabata anhelá pa biba riba tera.

Durante vakansi di scol mi tabata pasa dushi den mi famia hopi uní. Mi rutina diario a consistí di limpia nos ‘hogan’—e cas típico di navaho—weef tela i cuida carné. E pueblo navaho tabata wardadó di carné pa siglonan. Cada bes cu mi a limpia nos hogan (wak e potret abou), mi a ripará un buki corá chikitu cu a contené e buki bíblico di Salmo i vários buki di “Testament Nobo.” Mi tabata skop e buki benta p’aki i p’aya, sin nunca para pensa riba su contenido i nificacion. Pero nunca mi no a bent’é afó.

Matrimonio: Ilusion i Desilusion

Despues di a caba scol secundario, mi a planea pa bai scol di fishi na Albuquerque, New Mexico. Sin embargo, mi a topa mi futuro esposo promé cu mi bai. Mi a bolbe bek na e reservacion di navaho, cu nos ta yama Rez, pa mi casa. Mi mayornan tabatin hopi aña casá, i mi kier a sigui den nan pasonan, pues mi a casa. Mi tabata gusta cuida cas i a disfrutá di nos bida di cas, foral despues cu nos yu homber, Lionel, a nace. Ami cu mi casá tabata masha felis, te dia cu mi a tende un noticia devastador!

Mi casá tabatin un otro muher! Su infieldad a destrosá nos matrimonio. Mi a cai den otro i a cuminsá odi’é. Mi kier a tuma vengansa! Pero den transcurso di nos bataya di divorcio relacioná cu nos yu i sosten financiero, mi a bira simplemente tristu, sin speransa i a sinti cu mi no bal nada. Mi tabata core hopi kilometer djis pa calma mi pena. Tur ora mi tabata cla pa basha na yoramentu i a perde mi apetit. Mi a sinti mi completamente so.

Un poco tempu despues, mi a cuminsá un relacion cu un homber cu tabatin problemanan matrimonial similar. Nos tur dos tabata sufriendo. El a mustra empatia i a duna mi e sosten emocional cu mi tabatin mester. Mi a cont’é mi sintimentu i pensamentunan di mas íntimo tocante bida. El a scucha, loke a demostrá mi cu e tabata interesá. Nos a traha plan pa casa.

Anto mi a descubrí cu e tambe tabata infiel! Mi a haci duru pa sak’é for di mi bida, aunke esei tabata difícil i doloroso. Mi a sinti mi rechasá i profundamente deprimí. Mi a bira un persona amargamente rabiá, vengativo i desesperá. Mi a haci dos intento pa pone fin na mi bida. Gewoon mi kier a muri.

 Mi Promé Nocion di un Dios Berdadero

Mi a drama hopi lágrima miéntras mi tabata resa na un Dios cu mi no tabata conocé. Sin embargo, mi a sinti mi incliná na kere cu tabatin un Ser Supremo cu a crea e universo impresionante. E bunita bahadanan di solo a intrigá mi, i mi a meditá riba ki maraviyoso e Persona ei tabata di permití nos disfrutá dje maraviyanan aki. Mi a cuminsá stima e persona ei cu mi no a conocé. Mi a cuminsá bis’é: “Dios, si di berdad bo ta existí, yuda mi, duna mi guia, i haci mi felis atrobe.”

Miéntras tantu, mi famia tabata tur preocupá, foral mi tata. Mi mayornan a contratá curandero pa cura mi. Mi tata di cu un bon curandero nunca ta bisa bo cuantu e ta cobra, i e ta practicá loke e ta predicá. Pa please mi mayornan, mi a participá na vários ocasion den e ceremonianan religioso di navaho cu yama E Caminda Bendicioná.

Mi a pasa vários dia cerá den e hogan cu un radio so banda di mi cama. Cu horor mi a scucha e condenacion di un miembro di clero pasobra mi no a aceptá Jesus den mi curason. Esei a disgustá mi sinfin! Mi no por a soportá e religion di hende blancu mas i ni sikiera mi mes religion! Mi a dicidí di busca Dios na mi manera.

Durante e tempu cu mi tabata cerá den e hogan mi a ripará e buki corá chikitu atrobe. Mi a descubrí cu e tabata parti di Bijbel. Dor di lesa Salmo, mi a siña tocante e sufrimentunan i depresion di rey David i mi a sinti un consuelo. (Salmo 38:1-22; 51:1-19) Sin embargo, dor di mi orguyo, mi a descartá lihé tur loke mi a lesa. Mi no kier a aceptá e religion di hende blancu.

Apesar di mi depresion, mi a logra cuida mi yu homber bon. El a bira mi fuente di estímulo. Mi a cuminsá wak programanan religioso na television cu a ofrecé oracion. Den desesperacion mi a coge telefon i yama un dje numbernan pornada cu ta cuminsá cu 800. Mi a dal e telefon cera ora cu nan a bisa mi cu mi mester primintí di duna 50 of 100 dollar!

E caso di divorcio den corte a pone mi bira deprimí, foral ora mi a mira cu mi casá no tabata papia berdad dilanti e hues di tribu. A dura hopi tempu promé cu nos por a finalisá nos divorcio debí na e bataya di ken ta keda cu nos yu. Pero mi a gana. Mi tata, sin un palabra, a sostené mi amorosamente durante e huicio. E por a mira cu mi a sufri hopi.

Mi Promé Contacto cu e Testigonan

Mi a dicidí di stop di ansha mi bida. Na un ocasion mi a nota un famia navaho ta papia cu mi bisiñanan. Mi no por a keda sin spioná nan. E bishitantenan tabata haciendo un tipo di trabou di cas pa cas. Nan a bini na mi cas tambe. Sandra, un navaho, a identificá su mes como un Testigo di Jehova. E nomber Jehova a capta mi atencion mas cu cualkier otro cos. Mi di: “Ken ta Jehova? Boso mester ta un religion nobo. Di con nan no a siña mi e nomber di Dios den misa?”

Bondadosamente el a habri su Bijbel na Salmo 83:18, cu ta bisa: “Pa hende por sa cu abo, kende su nomber ta Jehova, abo so ta e Haltísimo riba tur e tera.” El a splica cu Dios tin un nomber personal i cu su Yu Jesucristo, tabata un testigo di Jehova. El a ofrecé pa siña mi tocante Jehova i Jesus i a laga e buki E berdad cu ta hiba na bida eterna cu mi. * Tur emocioná mi di: “Sí, mi kier purba e religion nobo aki!”

Mi a caba e buki den un dia. Su contenido tabata nobo i distinto. E buki a splica cu bida tin un propósito, i esei ta loke mi tabatin mester pa bolbe haña zjeitu den bida. Mi a cuminsá studia Bijbel, i pa mi delicia, Bijbel a contestá hopi di mi preguntanan. Mi a kere tur loke mi a siña. E tabata lógico, i e mester tabata e berdad!

Mi a cuminsá siña Lionel e berdad di Bijbel ora e tabatin seis aña. Nos tabata haci oracion huntu. Nos a animá otro cu e pensamentu cu Jehova tabata interesá den nos i cu nos tabatin cu confia den dje. Tin biaha mi no tabatin e forsa pa trata cu problema. Sin embargo, su  brasanan chikitu rond di mi, huntu cu su palabranan yen di confiansa i trankilisante: “No yora Mami, Jehova lo cuida nos,” a haci un diferencia masha grandi. Esta un consuelo, i esei a duna mi e determinacion pa sigui studia Bijbel! Mi tabata pidi guia sin stop den oracion.

E Efecto di Reunionnan Cristian

Nos aprecio pa Jehova a inspirá nos pa biaha 240 kilometer ida i buelta pa asistí na reunionnan di Testigonan di Jehova na Tuba City. Nos tabata bai dos bes pa siman durante zomer i den lunanan di winter henter dia riba diadomingo debí na e mal weer. Na un ocasion ora nos auto a daña, nos a pidi lift bai Salon di Reino. E careda largu tabata agotador, pero un comentario cu Lionel a haci, esta, cu nos nunca no mester perde un reunion a ménos cu nos ta muriendo, a graba den mi mente e importancia di no considerá instruccion spiritual for di Jehova como algu di ménos importancia.

Na reunion awa tabata basha for di mi wowo ki ora cu nos a canta canticanan di Reino cu a enfatisá bida eterno sin e miserianan di bida. Mi a haña hopi consuelo i animacion cerca e Testigonan di Jehova. Nan a desplegá hospitalidad, invitando nos na nan cas pa lunch i refresco, i nos a participá den nan studionan di Bijbel di famia. Nan a mustra interes den nos i a scucha. Foral e ancianonan a hunga un rol clave den mustra empatia na nos i a reforsá nos conviccion cu Jehova Dios ta interesá den nos. Mi a keda contentu di haña berdadero amigu. Nan tabata refrescante i asta a yora huntu cu mi ora mi tabata sinti cu mi no por a sigui mas.—Mateo 11:28-30.

Dos Decision Grandi

Net ora mi a sinti mi satisfecho cu e percuracionnan di Jehova, mi frei a regresá pa drecha cos. Ainda mi tabata stim’é i mi no por a nenga su ruego. Nos a traha plan pa casa. Mi a pensa cu e berdad lo a cambi’é. Esei tabata e eror mas grandi di mi bida! Mi no tabata felis. Mi concenshi a molestiá mi mashá. Pa mi gran consternacion, e no tabata kier e berdad.

Mi a confia mi situacion na un dje ancianonan. El a razoná cu mi for dje Scritura i a haci oracion cu mi tocante mi decision. Mi a yega na e conclusion cu Jehova nunca lo haci mi daño ni dolor, pero hende imperfecto sí, sin importá cuantu nos stima nan. De echo, mi a siña cu no tin niun siguridad den hiba un bida compañá. Mi a tuma un decision. Tabata masha difícil i doloroso pa terminá e relacion aki. Aunke lo mi a sufri financieramente, mi mester a confia den Jehova cu henter mi curason.

Mi a stima Jehova i a dicidí di sirbié. Dia 19 di mei 1984, mi a simbolisá e dedicacion di mi bida na Jehova Dios mediante bautismo bou di awa. Mi yu, Lionel, tambe ta un Testigo di Jehova bautisá. Nos a haña hopi persecucion di mi famia i mi ex-casá, pero nos a sigui pone tur cos den man di Jehova. Nos no a keda decepcioná. Mi famia su cabes a fria i nan a aceptá nos estilo di bida nobo despues di 11 aña.

Mi stima nan masha hopi, i único cos cu mi kier ta pa nan duna Jehova un chens ya nan tambe por ta felis. Mi tata, cu a kere cu mi a bai perdí dor di depresion i suicidio, a defendé mi cu curashi. E tabata contentu di mira mi felis atrobe. Mi a descubrí cu oracion na Jehova, asistencia na reunionnan di Testigonan di Jehova i aplicacion dje Palabra di Dios, ta vital pa e proceso di cura.

 Speransa pa Futuro

Mi ta anhelá e tempu ora cu tur rastro di sufrimentu, imperfeccion, falsedad i odio, lo ser eliminá completamente. Mi ta imaginá con nos tera navaho lo florecé cu tur clase di mata, cu e palunan di peach i apricot cu tabatin na ántes. Mi ta mira con e diferente tribunan ta gosa mashá di por yuda transformá nan tera secu den un bunita paradijs cu yudansa di riu i awaceru. Mi ta mira nos ta compartí nos tera cu nos bisiñanan dje tribu hopi i otro tribunan mas, en bes di ta rival di otro manera tabata e caso den historia recien. Awor mi ta mira con e Palabra di Dios ta uni tur rasa, tribu i grupo di famia. Den futuro lo mi mira con resureccion ta uni famia i amigunan cu nan sernan kerí cu a muri. Lo ta un tempu di gran alegria cu bida eterno na bista. Mi no por imaginá cu tin hende cu no kier siña tocante e prospecto maraviyoso aki.

Expansion Teocrático den e Tera di Navaho

Tabata emocionante pa mira un Salon di Reino na Tuba City i mira cuater congregacion sali for dje reservacionnan di pueblo navaho i hopi *: Chinle, Kayenta, Tuba City i Keams Canyon. Ora cu mi a inscribí den e Scol di Ministerio Teocrático na 1983, mi a djis imaginá cu un dia lo e ser conducí na idioma navaho. Awor esei no ta mi imaginacion mas. Desde 1998, e scol ta ser conducí na idioma navaho.

Contando otro hende cu Dios tin un nomber personal a trece masha hopi bendicion. Mi no por splica cu palabra ki emocionante ta di por lesa i compartí expresionnan cu ta fortalecé fe den nos propio idioma nativo den e foyetonan Nihookáá’gi Hooláágóó liná Bahózhoóodoo! (Disfruta di bida riba tera pa semper!), Ha’át’fíísh éí God Nihá yee Hool’a’? (Kico Dios Ta Rekerí di Nos?) i esun mas recien, Ni Éí God Bik’is Dííleelgo Át’é! (Bo Por Ta Amigu di Dios!). Mi ta gradicidu na e esclabo fiel i discreto cu nan a hiba delantera den e trabou aki di educacion bíblico di manera cu tur nacion i tribu i lenga por beneficiá, incluso e pueblo navaho, e diné.—Mateo 24:45-47.

Mi ta traha full-time pa mantené mi mes, pero ta disfrutá regularmente dje sirbishi di pionero auxiliar. Mi ta apreciá mi solteria i ta deseá di sirbi Jehova sin distraicion. Mi ta satisfecho i felis di por conta mi pueblo i otro hende, foral esnan cu ta desesperá, cu “Jehova ta cerca di esnan kibrá di curason; i esnan cu tin un spiritu aplastá e ta salba.”—Salmo 34:18.

Mi no ta sinti mas cu Bijbel ta e religion di hende blancu. E Palabra di Dios, Bijbel, ta pa tur hende cu ta deseá di siñ’é i aplik’é. Ora Testigonan di Jehova pasa cerca bo, laga nan mustra bo con bo por ta berdaderamente felis. Nan ta trece pa bo e bon nobo dje nomber di Dios, Jehova, e nomber cu a cambia mi bida! “Aoo,’ Diyin God bízhi’ Jiihóvah wolyé.” (“Sí, Dios su nomber ta Jehova.”)

[Nota]

[Plachi na página 21]

Un hogan, cas típico di navaho

[Plachi na página 21]

Huntu cu mi yu, Lionel

[Plachi na página 23]

Huntu cu amigunan ruso na e congreso internacional na Moscú, 1993

[Plachi na página 24]

Huntu cu mi famia spiritual den Congregacion Kayenta, Arizona