For di Nos Lectornan

Mihó Salú Como un dokter kiropráctico i fisioterapista diplomá, mi tin 21 aña den e ramo di salubridad, yudando miles di pashent. Mi ta sumamente preocupá cu hopi hende cu lesa e seri dje portada “Un Mihó Salú—Ki Opcionnan Tin?” (8 di november 2000) kisas lo vacilá pa busca tratamentu kiropráctica debí na miedu dje posibel peligernan cu e artículo a trece dilanti.

A. K., Merca

Boso a mencioná cu un ahuste kiropráctica na garganta por pone un pashent haña un atake celebral. Mi ta un kiropráctico pa mas cu 50 aña, i nunca mi no a mira ni tende di tal reaccion.

B.D.B., Merca

No tabata nos intencion pa desanimá lectornan di busca tratamentu kiropráctica si nan ta deseá esei. “Spierta!” a informá: “Remarcablemente, tin tiki casonan di efecto secundario ora un persona ábil efectuá manipulacion kiropráctico.” Na mésun tempu, e “Archives of Internal Medicine,” Volúmen 158, di 9 di november 1998, a mencioná relacioná cu tal tratamentu cu “e tasa di complicacionnan serio ainda ta debatibel” i cu “cálculonan ta varia di 1 den 400.000 caso pa entre 3 i 6 den 10 miyon caso.” Nos lo mester a bisa acerca cu complicacionnan debí na ahustenan di kiropráctica, cu nan a bisa ta incluí atake celebral, evidentemente ta sumamente raro.—RED.

Masha danki pa e seri aki. Mi no ta contra medicina convencional, pero mi curpa su reaccion riba antibiótica ta un peliger pa mi bida. Tin biaha, dokternan convencional no por diagnosticá mi malesanan, pues mi tin cu scoge medicina alternativo. E artículonan aki realmente a animá mi pasobra tin hende a asta haci bofon di mi debí n’e tratamentunan cu mi a scoge.

S. H., Antigua

E cuadro na página 8 a cita un dokter cu a declará cu e yerba ginkgo biloba i feverfew por stroba sanger di cuaha ora combiná nan cu remedi riba recept. Mi ta usando tur e dos yerbanan aki huntu cu remedi. Ami a pensa cu tur yerba ta completamente safe! E informacion aki por yuda mi evitá problema den futuro.

G. G., Merca

Djente di Baby Como parti di mi trabou na un oficina di dentista, mi ta siña mamanan con pa cuida djente di nan baby. E artículo “Protehando Djente Delicado” (8 di december 2000) tabata un gran yudansa pasobra e ta splica e riesgo di fermentacion i di e daño cu bacteria ta causa. Tur mama cu bini awor cerca mi pa consulta ta haña un ehemplar, i e resultadonan tabata excelente!

T.C.S., Brazil

Depresion Masha danki pa e artículo “Hóbennan Sa Puntra . . . Mi Mester Conta un Hende Cu Mi Ta Deprimí?” (8 di november 2000) E artículo a sali na un tempu cu mi tabata hopi deprimí i no tabata sa kico pa haci. Lesando e artículo mi a sinti cu tin un persona cu ta comprendé mi. Mi a papia cu mi mayornan, cu mi mihó amiga i foral cu Jehova. El a yuda mi hopi. Hamas lo mi kier kibra mi relacion personal íntimo cu Jehova.

A. P., Alemania