Mal Uso di Droga Tin un Solucion!

“CARGAMENTU Grandi di Cocaina Hañá den Botter di Biña.” E artículo di korant cu a carga e titular ei a splica con polis na Johannesburg, Sur África, a confiscá un container di barcu cu 11.600 botter di biña suramericano. Mesclá den e biña tabatin entre 150 pa 180 kilo di cocaina. Nan ta kere cu esaki tabata e cargamentu mas grandi di cocaina cu a drenta e pais te cu awor.

Aunke tal hayasgo ta zona alentador, echo ta cu segun cálculo polis ta confiscá solamente un 10 pa 15 porciento di droga ilegal rond mundu. Desafortunadamente, esaki ta mescos cu un hardinero cu ta corta un par di blachi for di un mal yerba cu ta crece lihé, pero ta laga e rais den tera.

E ganashi astronómico cu hende ta haña dje negoshi di droga ta stroba esfuersonan di gobiernu pa frena nan produccion i benta. Na Merca so, segun cálculo e mercado anual di droga ilegal ta consistí di miles di miyones di dollar. Como cu tin asina hopi placa enbolbí, no ta nada straño cu polis i funcionarionan di gobiernu—asta algun den puestonan haltu—ta vulnerabel pa corupcion.

Alex Bellos dje korant The Guardian Weekly a informá for di Brazil cu segun un investigacion  parlamentario, “tres miembro di congreso, 12 diputado di estado i tres alcalde a ser mencioná . . . riba un lista di mas cu 800 hende supuestamente enbolbí den crímen organisá i traficacion di droga na Brazil.” Riba e lista aki tabatin tambe “polis, abogado, comerciante i cunukero den 17 dje 27 estadonan.” Relacioná cu e resultado aki un profesor di política na Universidad di Brasília a bisa: “E resultadonan aki ta un condena contra tur seccion di sociedad brazileño.” Esei ta conta tambe pa hopi sociedad caminda droga tin un gara fuerte. E mercado su mecanismo di oferta i demanda ta loke ta alimentá e problema.

Considerando e poco resultado cu restriccionnan legal ta duna, tin hende ta boga pa legalisá cierto droga. E concepto general ta cu mester permití hende poseé cantidadnan chikitu pa uso personal. Nan ta haña cu esaki lo facilitá control gubernamental i reducí e ganashinan astronómico cu e cabesantenan di droga ta haci.

Tin Hende Ta Logra Libra Nan Mes di Droga

Na promé instante un centro di rehabilitacion kisas ta yuda adictonan kita for di droga i despues mehorá nan salú físico. Desafortunadamente, tin hopi chens cu una bes un adicto regresá na su ambiente di custumber, lo e ser tentá pa bolbe na droga. Escritor Luigi Zoja ta duna e motibu pa esaki: “Ta imposibel pa simplemente eliminá un comportacion sin redirigí e pashent den direccion di un dimension completamente nobo.”

Darren, mencioná den e artículo anterior, a haña un ‘dimension nobo’ cu a cambia su bida. E ta splica: “Mi tabata ateista, pero cu tempu, maske mi tabata bou di influencia di droga for di mainta te anochi, mi a bin realisá cu mester tin un Dios. Durante un periodo di dos pa tres luna, mi a purba libra mi mes di droga, pero mi amigunan no tabata laga mi rechasá droga. Aunke ainda mi tabata usa droga, mi a cuminsá lesa Bijbel regularmente promé cu mi bai drumi. Mi a asociá ménos cu mi amigunan. Un anochi, ami cu mi compañero di cuarto tabata ‘high.’ Mi a papia di Bijbel cuné. Su siguiente mainta el a bel su ruman homber cu ta Testigo di Jehova. E ruman homber a manda nos cerca un Testigo cu tabata biba den e mésun stad cu nos, i mi a bai bishit’é.

Nos a keda papia te 11’or di anochi, i mi a bai cas cu casi un dozijn di publicacion pa yuda studia Bijbel. Mi a cuminsá studia Bijbel cuné i a stop di huma i usa droga. Rond di nuebe luna despues, mi a bautisá como Testigo di Jehova.”

No ta fácil pa libra bo mes di adiccion na droga. Michael, mencioná den e artículo  anterior, ta conta e dificultadnan cu e tabatin ora el a stop di usa droga despues di 11 aña: “Tabata masha difícil pa mi come i mi a perde peso. Tambe mi tabata sinti como si fuera angua ta hinca mi, mi tabata soda hopi i a mira manera un lus rond di hende. Mi a sinti un anhelo tremendo pa bolbe na droga, pero hala cerca di Jehova den oracion i studia Bijbel a yuda mi keda liber di droga.” E ex-usadónan aki di droga ta di acuerdo cu tabata esencial pa nan kibra totalmente cu nan amigunan di ántes.

Di Con Esfuerso Humano Ta Fracasá

Uso ilegal di droga ta djis un solo faceta di un problema mundial mas grandi. Henter mundu ta den gara di un influencia dominante cu ta fomentá maldad, violencia i crueldad. Bijbel ta bisa: “Henter e mundu ta drumí den poder dje malbado.” (1 Juan 5:19) Apostel Juan a identificá e “malbado” ei na Revelacion 12:9: “Pues, e dragon grandi a ser tirá abou, e colebra original, esun yamá Diabel i Satanas, cu ta gañando henter e tera habitá; el a ser tirá abou n’e tera, i su angelnan a ser tirá abou huntu cuné.”

Fuera di nan propio debilidad, hende tabatin cu lucha cu e poderoso enemigu aki. Satanas ta esun cu for di principio a causa hende su caida. E ta decididu pa causa mas degeneracion den humanidad i apartá nan for di Dios. Parce cu humanidad su uso di droga ta parti di su estrategia. E ta actua cu gran rabia pasobra e sa cu “e tin un periodo di tempu corticu.”—Revelacion 12:12.

Kico Ta Dios Su Solucion?

Bijbel ta revelá e percuracion amoroso cu e Creador a haci pa rescatá humanidad for di nan condicion pecaminoso. Na 1 Corintionan 15:22, Bijbel ta bisa nos: “Mescos cu den Adam tur ta muriendo, asina tambe den Cristo tur lo ser hací bibu.” Boluntariamente Jesus a bini na tera como un hende perfecto i a sacrificá su bida terenal pa rescatá humanidad for dje efectonan di picá i morto.

Un conocimentu dje motibu pakico hende ta muri i tambe dje solucion pa e problemanan di hende, a duna hopi persona e motivacion i curashi pa libra nan mes for di adiccion na droga. Pero Bijbel ta haci mas cu yuda nos trata individualmente cu e problema di droga awor. E ta conta di un tempu—despues cu eliminá e influencia di Satanas—ora cu tur e problemanan di mundu, incluso uso di droga, lo yega na un fin permanente.

E buki di Revelacion ta describí “un riu di awa di bida, cla manera cristal, coriendo for dje trono di Dios i dje Lamchi.” (Revelacion 22:1) E riu simbólico aki ta representá Dios su percuracion mediante Jesucristo pa restorá hende na bida perfecto riba un tera combertí den paradijs. Revelacion ta describí palunan di bida ta bona cantu dje riu i ta declará: “E blachinan dje palunan tabata pa curacion dje nacionnan.” (Revelacion 22:2) E blachinan simbólico ei ta representá Jehova su percuracionnan curativo pa restorá humanidad na perfeccion spiritual i físico.

Por fin, hende lo ta liber, no solamente di uso di droga, sino tambe di tur otro dolor i problema cu e ta sufri di dje den e sistema degradá aki!

[Kuadro/Plachi na página 9]

Con Safe Marihuana Ta?

Vários pais tin pensá di legalisá marihuana, foral pa uso medicinal. Nan a descubrí cu e droga ta aliviá e walmentu di stoma cu kimoterapia ta causa, i evidentemente e ta yuda hende cu ta sufri di AIDS recuperá nan apetit. Tambe nan a yega di us’é pa pasa dolor.

Aunke tin desacuerdo tocante e resultadonan di investigacion, den e revista New Scientist tabatin un informe di testnan cu a confirmá algun dje efectonan dañino di marihuana.

Un test di Universidad di Harvard a compará un grupo cu a huma marihuana tur dia, cu un grupo cu a us’é cu ménos frecuencia. Nan a haña masha tiki diferencia riba testnan mental standard. Sin embargo, ora nan a test con adaptabel e dos gruponan aki ta den situacionnan nobo, e usadó pisá di marihuana a score hopi mas abou.

Un otro universidad a test un grupo di humadó regular di marihuana i un grupo di humadó di sigaria, durante un periodo di 15 aña. E humadónan di marihuana por lo general tabata usa tres of cuater sigaria di marihuana pa dia, miéntras cu e humadónan di sigaria a usa 20 of mas sigaria pa dia. Mésun tantu hende di ámbos grupo a sufri di tosamentu i bronkítis. Examinacion di pulmon a revelá daño similar di cel den ámbos grupo.

Aunke humadónan di marihuana a huma hopi ménos, nan a descubrí cu un solo sigaria di marihuana ta producí tres biaha mas tantu breu (teer) cu un sigaria normal. Ademas, New Scientist a informá: “Humadónan di marihuana ta traga e huma mas profundo i ta tene nan rosea aden mas largu.”

Tambe nan a descubrí cu celnan di inmunidad den pulmon dje humadónan di marihuana tabatin 35 porciento ménos capacidad di combatí bacteria cu celnan di humadó di sigaria.

[Rekonosementu]

U.S. Navy photo

[Kuadro na página 11]

“Un Condena Doloroso” Contra Mayornan

Un editorial den e korant surafricano Saturday Star a expresá preocupacion pa e aumento alarmante di uso di droga cerca hóbennan na Sur África i a comentá:

“E echo cu nos yunan ta haci esaki [usa droga] ta hopi bes un condena doloroso contra nos como mayor i contra sociedad en general. Siman aden siman afó nos ta mula pa trece placa cas, dedicando tur nos tempu i energia pa logra éxito material. Nos yunan ta agotá nos mente, nos fortalesa. Duna nan tempu di calidad? Ta mas fácil pa benta nan cu placa ya nan ta stop di molestia nos. Esei ta mas fácil cu scucha nan: scucha nan temornan, nan speransanan, nan problemanan. Awenochi, ora nos ta sintá na mesa den un restaurant of ta relahá dilanti di television, nos lo sa mes kico nan ta haciendo?”

Of—nos por agregá—kico nan ta pensando?

[Plachi na página 10]

Hopi hende a ser motivá pa libra nan mes di uso di droga