Observando Mundu

Nan Ta Redefiní Mina di Tera

Mas cu 135 pais ya a firma e Tratado di Ottawa cu ta prohibí uso di minanan antipersonal, i Merca tambe ta programá pa firm’é na aña 2006. “Pero tin un tendencia preocupante den direccion di tecnologia diseñá pa cambia e definicion di kico ta un mina prohibí,” segun e revista New Scientist. “Hapon . . . ta kere cu tanten artefactonan explosivo plamá riba playa ta ser controlá via control remoto, nan no ta mina antipersonal. . . . En bes di yam’é un mina di tera, nan ta yam’é ‘un artefacto cu ta plama proyectil.’” Actualmente Merca ta usa minanan antipersonal pa protehá minanan antitanki di guera, p’esei nan ta desaroyando minanan antitanki cu por bula rond pa asina stroba intentonan pa desalohá un campo di mina. Si desalohá of destruí algun mina pa habri caminda dor dje campo, e resto dje minanan antitanki “lo sinti cu falta [otro mina] i ta lanta bula rond te ora nan bolbe forma un patronchi regular,” segun informe dje revista. E minanan aki cu ta reposicioná nan mes, “lo tin na nan base un pata potente impulsá pa un piston, cu lo mester manda nan mas cu 10 meter na laira.”

Mayor Expectativa di Duracion di Bida

Expectativa di duracion di bida a aumentá cu 12,8 aña na Perú durante e último 25 añanan, segun un raport recien di Nacionnan Uní en cuanto desaroyo humano. Miéntras cu entre 1970 pa 1975 e expectativa di duracion di bida tabata 55,5 aña, el a subi te na 68,3 aña entre 1995 pa 2000. Segun e korant El Peruano, e aumento di expectativa di duracion di bida ta debí na mihó cuido di salu, locual a baha e tasa di mortalidad di baby recien nací di 115 morto pa cada 1.000 te na 43 morto pa cada 1.000, i di muchanan bou di cincu aña a baha di 178 morto pa cada 1.000 te na 54 morto pa cada 1.000 durante e mésun periodo. Ta ser calculá cu durante e siguiente periodo di cincu aña, “23 porciento dje poblacion lo biba te 60 aña,” segun El Peruano.

Un Bon Vitamina

Ora nos ta traha na computer, nos wowonan ta reaccioná constantemente riba e puntonan di lus briyante i pretu cu ta aparecé riba e screen, segun Zdrowie, un revista polaco di salú. Mas fuerte e señalnan visual aki ta, mas nos wowonan consumí rodopsin, un pigmento sensitivo pa lus cu ta capacitá nos pa mira. Vitamina A ta esencial pa produccion di rodopsin. Segun e revista Zdrowie, fuentenan ricu na vitamina A ta, entre otro, higra i zeta di bakiou. Hende cu tin cu limitá nan consumo di vet i colesterol por come cuminda cu ta contené beta-caroteen, locual e curpa cu yudansa di lus di solo ta combertí den vitamina A. Bo ta haña beta-caroteen den berdura color geel, oraño, corá i berde i tambe den fruta manera apricot, peach, plum secu, milon i mango.

Accidente dor di Telefon Celular

No ta riba caretera so uso di telefon celular por causa accidente. Funcionarionan di trein na Hapon ta bisa cu pasaheronan cu ta para riba plataforma warda riba trein ta asina absorbá den nan combersacion na telefon celular, cu nan ta lubidá unda nan ta. Entre e accidentenan recien cu Asahi Evening News ta informá di dje ta esun di un yoncuman cu tabata di lèn na rand di un plataforma miéntras e tabata papia na su telefon. Ora cu inconcientemente el a buig pa e persona cu e tabata papia cuné, un trein cu tabata drentando a pasa skarmai su cabes. Felismente, el a scapa cu djis “un cortá riba su wowo drechi.” Sin embargo, den un otro caso “un alumno di scol secundario papiando na su celular a buig over dje rand di plataforma i un trein di carga a pasa dal e mata.” Personal di stacion di trein ta informá cu tin biaha hende ta laga nan telefon cai riba e railnan. Trein a “plecha” un mucha homber di 26 aña cu a bula abou riba rail pa coge su telefon. Funcionarionan di trein ta pidi público pa “tene na mente cu plataformanan di stacion di trein ta áreanan masha peligroso.”

Actitud i Accidentenan di Avion

Un artículo den e korant di Singapur The Straits Times ta mustra cu comportacion of interaccion social den cockpit di avion por ta un dje vários causanan di accidentenan aéreo. E informe ta bisa cu “na Asia e interaccion den cockpit entre e capitan  i su co-piloto ta basá riba un relacion di subordinacion. E capitan ta e baas indiscutibel, p’esei ora un co-piloto ripará algu abnormal kisas e ta vacilá pa señalá esei debí na miedu di desafiá e autoridad dje capitan.” Segun e korant, kisas hende ta detectá un posibel problema pero ta keda sin indicá esei “pasobra nan por haña nan mes den un lus negativo.” Of kisas nan ta sinti cu hende lo duda den nan credibilidad debí na nan ‘rango den e grupo.’ Si den e cockpit di un avion, e co-piloto no ta muchu dispuesto pa bisa algu francamente, esei lo por aumentá e riesgo di un accidente.

Coral Ta den Problema Serio

For di Sur África te India, e refnan di coral den océano Indio ta den problema serio, segun The Economist. Biólogonan marino a descubrí algu alarmante recientemente, esta, cu “50 pa 95% dje refnan di coral a muri durante e último dos añanan.” E motibu ta cu coral no por sobrebibí si temperatura normal di laman subi cu 1 of 2 grado Celsius pa mas cu un par di siman. “Na 1998, pa vários siman e temperatura rond di Seychelles tabata 3°C riba loke sa ta normal pa e temporada,” segun e informe. Investigadónan ta kere cu esaki riba su mes ta un “evidencia dramático di keintamentu mundial.” Morto di coral a costa Islanan Maldivas 63 miyon dollar na 1998/99. Segun The Economist, turistanan cu ta bini pa mira coral bunita, “ta bira bai tur decepcioná for dje monton di piedra shinishi mahos.” Olof Linden, co-editor dje informe, a declará cu “gran parti dje ecosistema mas diversificá riba e planeta, simplemente a ser perturbá.” Como cu ref di coral ta un lugá importante caminda yu di bestianan di laman ta crece i ser cuidá, e desaster aki ta mal señal tambe pa poblacionnan cantu di costa cu ta dependé di pesca.

Divorcio di Penshonado

Na Francia “e cantidad di parehanan riba 55 aña cu ta divorciá a aumentá cu 52 porciento den cuater aña,” segun e korant Le Figaro. Durante e mésun periodo ei, e porcentahe di divorcio di parehanan riba 70 aña a bira mas cu dòbel, i un cantidad creciente di hende muher ta iniciá e proceso di divorcio. Un factor ta e dificultad pa adaptá na bida di penshonado. Problemanan cu tabata manehabel tanten cu un casá tabata na trabou, hopi bes ta bira insoportabel ora cu nan tur dos ta na cas. Ademas, tin un aumento den e cantidad di hende muher riba 50 aña cu ta financieramente independiente. Ta mas probabel cu e muhernan aki lo divorciá di nan esposo infiel cu esnan di generacionnan anterior. Aunke homber penshoná hopi bes ta haña un compañera mas yong, un creciente cantidad di muher di 60 pa 70 i picu aña cu no ta biuda al final ta keda nan so.

Generosidad Frances

Hende muher ta mas generoso cu hende homber, i hende grandi mas cu hende yong. Esaki ta dos dje conclusionnan di un encuesta di opinion cu a dura un aña largu i cu e instituto filantrópico, Fondation de France a laga tene. E resultadonan ta revelá cu mitar dje poblacion di Francia ta efectuá obranan di generosidad, i 28 porciento di nan ta duna vários biaha pa aña, sea cen cash, tempu of di un otro manera. E raport a descubrí cu “compromiso religioso i participacion den un asociacion” ta promové generosidad. Basá riba e estudio, e korant di Paris Le Monde ta describí e pichiri frances típico como un hóben masculino, soltero, cu no ta baidó di misa i cu ta biba probablemente na costa Mediteráneo of den cunucu.

Explosion di AIDS

Mas cu cincu miyon hende a pega cu e vírus di AIDS den aña 2000, segun un raport dje Programa Conhunto di Nacionnan Uní Riba HIV/AIDS (UNAIDS) i Organisacion Mundial di Salú. Esaki ta pone e cantidad mundial di hende cu HIV surpasá 36 miyon, mas cu 50 porciento mas haltu di loke nan a proyectá na 1991. E epidemia a plama formalmente na Oost Europa, caminda e cantidad di personanan infectá—principalmente hende cu ta inyectá nan mes cu droga—a bira casi dòbel den un aña. Tambe e raport ta mencioná cu den e nacionnan mas ricu na mundu nan a stop cu intentonan di prevencion, i cu AIDS ta plamando principalmente entre hende cu ta inyectá nan mes cu droga i hombernan homosexual. Di otro banda, ta parce cu e cantidad di infeccionnan nobo na África parti zuid di Sahara, caminda tin 25,3 miyon hende infectá, a stabilisá pa promé bes. Desde comienso dje epidemia, mas cu 21 miyon hende a muri dje malesa.