Ta Ken Ta Usa Droga?

DJE CORESPONSAL DI SPIERTA! NA SUR ÁFRICA

“TUR hende ta usa droga.” Nan sa usa e expresion general ei pa stimulá hende ingenuo pa experimentá cu droga ilegal. Pero dependiendo dje manera cu nos definí “droga,” tin un berdad den e palabranan ei.

Ta definí e palabra “droga” como: “Cualkier substancia kímico, sea di orígen natural of sintético, cu por ser usá pa cambia percepcion, beis of otro estado sicológico.” Esei ta un descripcion práctico i amplio di loke hende ta yama droga sico-activo, esta cu ta influenciá e mente i comportacion. Pero tin hopi remedi cu ta ser usá pa malesanan físico cu ta cai bou dje definicion ei.

Segun e definicion ei, alcohol ta un droga. E peliger ta sinta den bebementu di mas, locual ta aumentando. Un encuesta bou di universidadnan den un pais occidental a saca afó cu “paranda di bebementu ta e problema di droga mas serio cu tin na cámpusnan di universidad.” E encuesta a revelá cu 44 porciento di studiante tabata bebedó pisá. *

Mescos cu alcohol, tabaco ta legalmente disponibel, aunke e ta contené un veneno potente: nicotina. Segun Organisacion Mundial di Salú, humamentu ta mata rond di cuater miyon hende pa aña. Sin embargo, magnatenan di companianan di tabaco ta miembronan ricu i onrá di sociedad. Humamentu di sigaria ta sumamente adictivo tambe, kisas asta mas cu uso di hopi dje droganan ilegal.

Den añanan recien vários pais a restringí  propaganda di tabaco i tambe a pone otro restriccionnan. No obstante, ainda hopi hende ta mira humamentu como un actividad social aceptabel. E industria di cine ta sigui presentá humamentu como atractivo i romántico. Na San Francisco, un encuesta cu Universidad di California a haci di e películanan cu a gana mas placa entre aña 1991 i 1996 a saca afó cu 80 porciento dje actornan principal a hunga personahenan cu tabata huma.

Kico di Droganan “Safe”?

Remedi sigur a yuda hopi hende, pero hende por haci mal uso di nan tambe. Tin biaha dokternan ta prescribí remedi muchu lihé, of pashentnan ta preshoná nan pa prescribí remedi cu no ta necesario. Un dokter a comentá: “No ta semper dokternan ta tuma tempu pa sinta cu e pashent i purba haña e causa di su síntomanan. Ta mas fácil pa bisa: ‘Tuma e píldora aki.’ Pero e problema principal mes no ta ser tratá.”

Asta remedi cu bo ta haña sin recept, manera aspirin i paracetamol (Tylenol, Calpol), por hiba na problema serio di salú si haci mal uso di nan. Mas cu 2.000 hende rond mundu ta muri tur aña a consecuencia di mal uso di paracetamol.

Segun nos definicion anterior, e cafeina den te i kofi tambe ta un droga, aunke nos no ta consider’é como tal ora nos ta dal nos bebida faborito di desayuno. I lo ta absurdo pa considerá bebidanan socialmente aceptabel manera te of kofi den e mésun lus cu droganan pisá manera heroina. Esei lo ta igual na compará un pushi di cas cu un leon feros. No obstante, segun algun experto di salú, si bo tin custumber di bebe mas cu cincu kopi di kofi of nuebe kopi di te pa dia, esei lo por haci bo daño. Ademas, si bo tin custumber di bebe hopi te of kofi i bo reducí e cantidad ei drásticamente, lo bo por haña e mésun síntomanan di un bebedó di te cu a haña sacamentu, dolor di cabes fuerte i problema cu lus skerpi despues cu el a stop di bebe te.

Kico di Uso Ilegal di Droga?

Un cuestion mas controversial ta e uso di droga den deporte. Esaki a keda resaltá durante e Tour de France di 1998, ora cu nuebe ciclista dje tim principal a ser expulsá pasobra nan a usa droga pa subi prestacion (doping). Atletanan a inventá vários manera pa contrarestá resultadonan di test di droga. E revista Time ta informá cu algun di nan asta a bai asina leu di haci “‘transplante di orina,’ cu ta nificá [cu] via un cateter ta hinca orina ‘limpi’ di un otro hende den nan blas, un procedura hopi bes doloroso.”

Anto, nos no a papia mes ainda dje coleccion tolondrador di droga ilegal cu hende ta usa pa ‘dibertí’ cuné. Esakinan ta entre otro marihuana, ecstasy (methylenedioxy-methamphetamine, of MDMA), LSD (lysergic acid diethylamide), stimulante (manera cocaina i anfetamina), trankilisante i heroina. I nos no mester lubidá e vários cosnan cu hende ta inhalá, manera lijm i gasolin, cu ta popular cerca hóbennan. Claro cu esakinan no ta substancianan prohibí i nan ta fácil pa haña.

E pensamentu comun cu un drogadicto ta un persona cueru cu wesu cu ta bati su curpa  cu droga den un cuarto sushi, por ta engañoso. Hopi hende adicto na droga ainda por funcioná relativamente normal den bida diario, aunke nan adiccion sin duda ta afectá e calidad di nan bida den un grado menor of mayor. No obstante, nos no por minimisá e banda scur dje esenario di droga. Un escritor a describí con algun usadó di cocaina “por inyectá nan mes cu droga decenas di biaha tras di otro den corto tempu, combirtiendo nan curpa den un cos tur na sanger, yen di hincá di angua i pleki blou.”

Despues di un aparente bahada na fin di añanan ’80, uso di droga ilegal ta aumentando mundialmente atrobe. E revista Newsweek a remarcá: “Autoridadnan ta desesperá cu e aumento drástico tantu den contrabanda di droga como den uso di casi tur clase di droga i e falta di fondo—i informacion—necesario pa combatié.” E korant The Star di Johannesburg, Sur África, a declará cu segun estadísticanan di gobiernu, “un di cada cuater hende cu ta biba na Sur África ta adicto na alcohol of droga.”

E Instituto di Investigacion pa Desaroyo Social di Nacionnan Uní a señalá cu “productor i traficantenan di droga . . . a organisá nan mes riba escala mundial i a hinca parti substancial di nan ganashi di droga den centronan financiero cu ta ofrecé secrecia i dividendonan atractivo riba inversion. . . . Awor traficantenan di droga por laba ganashi ilegal dor di move placa electrónicamente rond mundu cu tiki control nacional.”

Parce cu hopi mericano, sin cu nan sa, ta mishi cu cocaina diariamente. Un artículo den e revista Discover a splica cu mayoria cen di papel mericano tin rastro di cocaina.

Echo ta cu awe uso di substancianan adictivo, incluso droganan ilegal, a bira aceptabel pa hopi hende, i ta ser mirá como parti dje bida di tur dia. Pero si tene cuenta cu e daño ampliamente publicá cu droganan ilegal i tambe tabaco i alcohol ta causa, e pregunta obvio ta: Di con hende ta haci mal uso di nan? Segun cu nos ta meditá riba e pregunta aki, ta un bon momento pa nos refleccioná riba nos propio punto di bista relacioná cu droga.

[Nota]

[Plachi na página 3]

Paranda di bebementu ta un problema grandi na hopi campus di universidad

[Plachi na página 5]

Hopi hende ta considerá sigaria i droganan pa ‘dibertí’ como inofensivo