E Punto di Bista Bíblico

Ta Malu pa Yora i Pena pa Morto?

“ADEMAS, RUMANNAN, NOS NO KIER PA BOSO TA IGNORANTE EN CUANTO ESNAN CU TA DRUMÍ DEN MORTO; PA BOSO NO PENA MANERA E OTRONAN CU NO TIN SPERANSA TAMBE TA PENA.”—1 TESALONICENSENAN 4:13.

BIJBEL ta ofrecé un speransa pa esnan cu a muri. E resureccionnan cu Jesus a efectuá, i tambe su siñansa, ta señalá na un tempu ora e mortonan lo ser trecé bek na bida. (Mateo 22:23-33; Marco 5:35, 36, 41, 42; Lucas 7:12-16) Ki efecto e speransa ei mester tin riba nos? E palabranan di apostel Pablo citá ariba ta indicá cu e speransa aki por ta un consuelo ora un ser kerí muri.

Si bo a perde un ser kerí den morto, sin duda bo a sinti e dolor emocional cu ta compañá tal tragedia. Despues di 42 aña casá, Theresa su esposo ta muri djis despues di un operacion di curason. Theresa ta bisa: “Esei tabata un shok masha grandi! Loke mi a sinti promé tabata puru spantu. Caba a bini e dolor inmenso cu ta bira pió segun cu tempu ta pasa. Mi a yora hopi.” Tal reaccion ta indicá un falta di fe den Jehova su promesa di resucitá e mortonan? E palabranan di Pablo kier men cu ta malu pa yora i pena p’e morto di un ser kerí?

Ehempelnan Bíblico di Hende Cu A Yora Nan Morto

Nos ta haña contesta riba e preguntanan ei dor di examiná ehempelnan bíblico di hende cu a yora i pena pa nan defuntu. Den hopi relato, e morto di un miembro di famia djacerca a ser compañá pa un periodo di yora i lamentá e morto. (Génesis 27:41; 50:7-10; Salmo 35:14) E sintimentunan asociá cu e lamentacion aki tabata hopi bes intenso.

Considerá con algun homber di fe a yora i pena p’e morto di un ser kerí. Abraham, por ehempel, tabatin fe fuerte cu Dios lo por resucitá e mortonan. (Hebreonan 11:19) Maske e tabatin e conviccion aki, ora su casá a muri, el “a drenta pa lamentá Sara i yor’é.” (Génesis 23:1, 2) Ora Jacob su yu hombernan a gañ’é cu su yu stimá Josef a muri, Jacob “a sker su mantel i . . . a sigui yor’é.” (Génesis 37:34, 35) Figurá bo cu hopi aña despues, ainda e pensamentu dje morto di su yu homber stimá tabata un carga pisá riba Jacob! (Génesis 42:36-38) Rey David tambe a yora e morto di su dos yu hombernan Amnon i Absalom abiertamente i intensamente. Aunke nan tur dos a causa dolor pa David i su famia, tog nan a keda su yu, i nan morto a caus’é hopi pena.—2 Samuel 13:28-39; 18:33.

Tabatin biaha cu henter e nacion di Israel a  yora i lamentá, manera nan a haci ora Moises a muri. Deuteronomio 34:8 ta bisa nos cu e israelitanan a yor’é durante 30 dia.

Finalmente, tin e ehempel di Jesucristo. Lázaro, su amigu íntimo, a muri. I ora Jesus a mira con e ruman muhernan di Lázaro, Marta cu Maria, i nan amigunan tabata yora, el “a suspirá den spiritu i a bira molestiá.” Aunke e tabata sa cu algun momento despues lo e trece su amigu bek na bida, tog el “a entregá na lágrima.” Jesus a stima su amiganan kerí Marta i Maria. P’esei e tabata profundamente conmoví ora el a mira nan dolor pa e morto di nan ruman homber.—Juan 11:33-36.

Abraham, Jacob, David i Jesus tur tabatin un fe grandi den Jehova i den su promesanan, pero tog nan a yora i tabata tristu. Nan yoramentu tabata un señal di debilidad spiritual? Nan tristesa tabata un indicacion di falta di fe den e resureccion? Absolutamente cu no! Yora i pena pa e morto di un ser kerí ta un reaccion normal.

Di Con Nos Ta Yora i Pena

Nunca tabata Dios su propósito pa hende muri. Jehova su propósito original, manera el a expres’é na Adam cu Eva, tabata pa transformá e tera den un bunita paradijs yená cu un famia felis i amoroso. Morto lo a bini solamente si e promé pareha ei a scoge pa desobedecé Jehova. (Génesis 1:28; 2:17) Lamentablemente, Adam cu Eva a desobedecé, i debí na desobedencia, “morto a plama na tur hende.” (Romanonan 5:12; 6:23) Pues morto ta un enemigu cruel cu nunca tabata parti di Dios su propósito original.—1 Corintionan 15:26.

Ta mas cu lógico anto cu e suceso innatural di morto di un persona yegá ta causa dolor emocional profundo cerca esnan cu e ta afectá. E ta crea un enorme bashí den nan bida. Theresa, e biuda mencioná ariba, a bisa relacioná cu su casá: “Mi tin sigur cu lo mi mir’é atrobe den e resureccion, pero awor aki mi ta sinti su falta masha hopi mes. Esei ta loke ta haci dolor.” Morto di un mayor kisas ta recordá nos cu nos tambe por muri. Foral e tristesa debí na morto di un hóben cu no a biba largu ta causa hopi dolor.—Isaías 38:10.

Sí, morto ta innatural. E dolor cu e ta producí ta cos di spera, i Jehova no ta considerá yora i pena p’e pérdida ei como un falta di fe den e resureccion. Manera nos por a mira for dje ehempelnan di Abraham, Jacob, David, e nacion di Israel i Jesus, ora nos ta expresá nos dolor di curason esei no ta un indicacion di debilidad spiritual. *

No obstante, aunke nos como cristian sigur ta pena debí na morto, nos no ta tristu “manera e otronan cu no tin speransa.” (1 Tesalonicensenan 4:13) Nos no ta entregá na extremonan irazonabel di tristesa, pasobra nos no ta confundí en cuanto e condicion dje mortonan. Nos sa cu nan no ta den dolor ni angustia, sino manera den un soño profundo i trankil. (Eclesiástes 9:5; Marco 5:39; Juan 11:11-14) Tambe nos tin pleno confiansa cu Jesus, “e resureccion i e bida,” lo cumpli cu su promesa di trece bek “tur esnan cu ta den grafnan conmemorativo.”—Juan 5:28, 29; 11:24, 25.

P’esei, si awor aki bo ta yora i pena pa e morto di un ser kerí, laga e echo cu bo sa cu Jehova ta comprendé bo dolor consolá bo. Nos ta spera cu e conocimentu aki i bo speransa den e resureccion ta mengua bo tristesa i ta yuda bo carga cu bo pérdida i super’é.

[Nota]