Hóbennan Sa Puntra . . .

Con Oracion Por Yuda Mi?

“Ta oracion a yuda mi bini bek riba e caminda corecto.”—Brad. *

HOPI hóben ta haci oracion, kisas mas di loke bo ta pensa. Un Encuesta di Hubentud cu e compania Gallup a haci na Merca entre hóbennan di 13 pa 17 aña, a revelá cu 56 porciento di nan ta resa promé cu come. Un encuesta di hóbennan adulto a indicá cu 62 porciento di nan ta haci oracion tur dia.

Apesar dje cifranan ei, pa hopi hóben oracion ta djis un ritual bashí of un simpel rutina. Tiki hóben tin loke Bijbel ta yama “conocimentu exacto di Dios.” (Colosensenan 1:9, 10) Como resultado, Dios no ta hunga un papel importante den nan bida. Den un encuesta a puntra tienernan si nan a yega di pidi Dios yuda nan tuma un decision importante. Un hobencita a contestá: “Semper mi ta haci oracion na Dios p’e guia mi den scoge e camindanan corecto den bida.” Pero tog, el a admití: “Awor akí, mi no por corda di un decision specífico.” Nada straño anto cu hopi hóben no tin confiansa cu oracion tin poder of cu lo e por yuda nan!

No obstante, mescos cu Brad, e mucha homber citá den e introduccion, miles di hóben a experenciá personalmente e poder di oracion. I bo tambe por! Un artículo anterior den e seri aki a mustra di con nos por tin confiansa cu Dios lo scucha nos oracionnan. * Awor e pregunta ta: Con oracion por yuda bo? Na promé lugá, laga nos examiná con Dios ta contestá nos oracion.

Con Dios Ta Contestá Oracion

Den tempu bíblico algun homber di fe a ricibí contesta direct—asta milagroso—riba nan oracionnan. Por ehempel, ora rey Ezekías, a haña sa cu e tabatin un malesa cu ta hiba na morto, el a suplicá Dios pa libr’é di esei. Dios a respondé: “Mi a tende bo oracion. Mi a mira bo lágrimanan. Ata, mi ta cura bo.” (2 Reynan 20:1-6) Dios a actua den manera similar na fabor di otro homber i muhernan temeroso di Dios.—1 Samuel 1:1-20; Daniel 10:2-12; Echonan 4:24-31; 10:1-7.

Sin embargo, ni den tempu di Bijbel no tabata comun cu Dios ta actua milagrosamente asina. Mayoria bes, Dios a contestá oracion di su sirbidónan no via milager, sino dor di yuda nan “ser yená cu e conocimentu exacto di su boluntad den tur sabiduria i comprendimentu  spiritual.” (Colosensenan 1:9, 10) Sí, Dios a yuda dor di fortificá su pueblo den sentido spiritual i moral, dunando nan sabiduria i conocimentu necesario pa tuma decisionnan sabí. Ora cristiannan tabata den un situacion difícil, Dios no necesariamente a kita e prueba. Mas bien, el a duna nan “e poder mas ayá di loke ta normal” di manera cu nan por a want’é!—2 Corintionan 4:7; 2 Timoteo 4:17.

Mescos awe, un contesta riba bo oracion probablemente lo no ta algu dramático. Pero manera Dios a haci den pasado, e por duna bo su spiritu santu i fortificá bo pa manehá cualkier situacion cu bo haña bo cuné. (Galationan 5:22, 23) Pa ilustrá esei, laga nos wak cuater manera specífico cu oracion por yuda bo.

Oracion Por Yuda Bo Tuma Decision

Karen tabata namorá un yoncuman cu aparentemente tabatin metanan spiritual haltu. Segun Karen: “Semper e tabata bisa mi cu e kier bira un anciano den congregacion.” Tur esaki a zona bon. Pero “tambe e tabata papia hopi tocante e negoshi cu el a cuminsá cuné i tur e cosnan cu lo e por cumpra pa mi. Mi a cuminsá duda di su sinceridad.” Karen a haci oracion tocante esei. “Mi a roga Jehova p’e habri mi wowo i mustra mi loke mi mester sa dje mucha homber ei.”

Tin biaha e hacimentu di oracion mes ta probechoso, como cu e por yuda bo para i pensa cuidadosamente riba e asuntu desde e punto di bista di Jehova. Pero tambe Karen tabatin mester di conseho práctico. Lo el a ricibí un contesta milagroso? Wel, considerá un relato bíblico relacioná cu rey David. Ora el a haña sa cu su amigu di confiansa Ahítofel a bira consehero di su yu homber traicionero Absalom, David a resa: “Por fabor, cambia e conseho di Ahítofel den bobedad, o Jehova!” (2 Samuel 15:31) Pero tambe David a actua na armonia cu su oracion. El a encargá su amigu Husai cu e mision: “Anto bo tin cu frustra e conseho di Ahítofel pa mi.” (2 Samuel 15:34) Den un manera similar, Karen a tuma accion na armonia cu su oracion dor di papia cu un anciano cristian maduro cu tabata conocé su namorado. E anciano a confirmá loke Karen tabata teme: Su namorado a haci masha tiki adelanto spiritual.

Karen ta bisa: “E situacion ei a habri mi bista bon cla pa e poder di oracion.” Lamentablemente, su ex-namorado a bai tras di rikesa i a stop di sirbi Dios. Segun Karen: “Si mi a casa cuné, kisas ta mi so lo tabata bini reunionnan cristian.” Oracion a yuda Karen tuma un bon decision.

Oracion Por Yuda Bo Controlá Bo Emocionnan

“Hende estúpido ta saca tur su spiritu,” Bijbel ta bisa na Proverbionan 29:11, “pero hende sabí ta keda calmu te na último.” E problema ta cu hopi hende awe ta biba bou di preshon emocional intenso i hopi biaha nan ta perde control, tin biaha cu resultadonan desastroso. E hóben Brian ta corda: “Mi tabatin problema cu un colega. Un dia el a saca un cuchú.” Kico abo lo a haci? Brian a haci oracion. E ta conta: “Jehova a yuda mi keda calmu, i mi a papia cu mi colega i convenc’é pa no usa e cuchú. El a benta e cuchú abou i a cana bai.” Dor di controlá su emocionnan Brian a logra evitá di entregá na rabia, i esaki probablemente a scapa su bida.

Podisé bo no ta haña bo hopi bes cu hende ta saca cuchú pa bo. Pero lo tin hopi situacion den bo bida caminda lo bo tin cu controlá bo emocionnan. Oracion por yuda bo keda calmu.

Oracion Por Yuda Bo cu Preocupacion

Barbara ta corda con algun aña pasá e tabata “pasando den un tempu difícil.” E ta conta: “Mi trabou, famia, amigunan—nada no tabata bai bon. Mi no tabata sa kico pa haci.” Automáticamente Barbara a pidi yudansa den oracion. Pero tabatin un problema. “Mi no tabata sa kico mi mester pidi Jehova,” e ta bisa. “Finalmente, mi a pidié pas mental. Tur anochi mi tabata pidié yuda mi pa mi no preocupá cu tur cos.”

Con e oracion ei a yud’é? E ta bisa: “Un par di dia despues, mi a realisá cu aunke mi problemanan  no a disparcé, tog mi no tabata dje bezig of preocupá cu nan mas.” Bijbel ta primintí: “Laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”—Filipensenan 4:6, 7.

Oracion Ta Yuda Bo Hala Mas Cerca Dios

Considerá e experencia di un hóben cu yama Paul. E ta conta: “Tabata tempu mi a caba di bai biba cerca algun famia. Un anochi mi a sinti mi ègt deprimí. Poco tempu promé mi a caba scol secundario, i mi tabata sinti falta di tur mi amigunan. E anochi ei, awa a yena mi wowo ora mi a corda tur e bon tempu cu nos a pasa huntu.” Kico Paul por a haci? Pa promé biaha, el a haci oracion ferviente. E ta bisa: “Mi a habri mi curason i pidi Jehova duna mi forsa i pas mental.”

Cu ki resultado? Paul ta corda: “E siguiente mainta ora mi a lanta, mi a sinti mi mas aliviá cu nunca promé den mi bida. Mi a cambia di un estado mental yen di agonia pa ‘e pas di Dios cu ta surpasá tur pensamentu.’” Awor cu su curason tabata trankil, Paul por a wak cos for di un punto di bista ménos emocional. I pronto el a realisá cu e ‘goeie ouwe tijd’ no tabata dje bon ei tog. (Eclesiástes 7:10) De echo, e “amigunan” cu e tabata sinti asina tantu falta di dje eigenlijk no tabatin bon influencia riba dje.

Mas cu tur cos, Paul a haña chens di experenciá Jehova su cuido den un manera personal. El a sinti e berdad dje palabranan di Santiago 4:8: “Hala cerca Dios, i lo e hala cerca boso.” Pa Paul esaki tabata un punto di cambio crucial den su bida. El a ser impulsá pa pone Jehova promé cu tur otro cos den su bida i dedicá su bida na dje.

Papia cu Dios!

E experencianan positivo aki ta duna bo e siguransa cu oracion por yuda bo. Claro cu esei ta e caso solamente si di berdad bo kier siña conocé Dios i cultivá un amistad cuné. Desafortunadamente, hopi hóben ta posponé pa haci esei. Carissa a lanta den un famia cristian. Pero e ta admití: “Mi ta kere cu ta te durante e último añanan aki numa mi a capta completamente e nificacion increibel di nos relacion único cu Jehova.” Brad, mencioná na principio, a lanta como un cristian pero despues a bai for di adoracion berdadero pa vários aña. E ta bisa: “Ta te ora mi a realisá kico mi a perde, mi a bolbe na Jehova. Awor mi sa con friu i bashí bida por ta sin e relacion ei.”

Sin embargo, no warda te ora bo ta den un crísis pa bo hala cerca Dios. Cuminsá papia cuné awor, i cu regularidad! (Lucas 11:9-13) “Deshogá [bo] curason dilanti dje.” (Salmo 62:8) Den poco tempu lo bo descubrí cu oracion realmente por yuda bo!

[Nota]

[Kuadro/Plachinan na página 15]

Oracion Por Yuda Bo

● Tuma mihó decision

● Keda calmu ora di stres

● Haña alivio di preocupacion

● Hala mas cerca Dios