Con pa Kibra e Ciclo di Odio

“Stima boso enemigunan.”—MATEO 5:44.

E LIDERNAN di dos nacion enemigu tabatin dianan ta hiba negociacionnan intenso di pas. Presidente di un pais industrialisá poderoso tabata presente na e combersacionnan, i a usa su gran influencia i abilidadnan diplomático pa purba trece e dos lidernan na un acuerdo. Pero e resultado final dje esfuersonan agonisante aki tabata simplemente mas agonia. Denter di un par di siman e dos nacionnan tabata enbolbí den loke e revista Newsweek a yama “e pió violencia entre nan den dos década.”

Na tur parti di mundu odio i enemistad entre vários grupo étnico i nacional no kier caba, apesar dje mihó intentonan di lidernan nacional. E ciclo di odio ta ripití su mes cu mas i mas frecuencia i intensidad, stimulá dor di ignorancia, prehuicio i propaganda. Pero miéntras cu en bano e lidernan djawe ta busca solucionnan nobo i inovativo, nan no ta mira cu e mihó solucion ta un solucion bieu: mes bieu cu e Sermon Riba Ceru. Durante e sermon ei Jesucristo a animá su oyentenan pa someté na Dios su manera di haci cos. Den e contexto ei el a haci e declaracion citá ariba, esta: “Stima boso enemigunan.” E apelacion ei ta no solamente e mihó solucion pa e problema di odio i prehuicio, sino e ta e único solucion práctico!

Hende sképtico ta rechasá e idea di stima bo enemigu, como algu sumamente idealista i impráctico. Sin embargo, si odio ta un actitud cu bo ta siña, e ora ei no ta razonabel pa asumí cu bo por siña pa no odia? Pues e palabranan di Jesus ta ofrecé berdadero speransa pa humanidad. Nan ta mustra cu ta posibel pa pone un fin asta na enemistadnan bieu.

Considerá e situacion cu a existí den tempu di Jesus entre su oyentenan hudiu. Nan no tabatin cu bai leu pa haña enemigu. Tropanan romano ainda a dominá e region, i a someté e hudiunan na belasting opresivo, manipulacion político, maltrato i explotacion. (Mateo 5:39-42) Sin embargo, tabatin persona cu por a asta considerá nan compatriotanan hudiu como enemigu debí na desacuerdonan chikitu cu no a ser resolvé i cu nan a permití bira pió. (Mateo 5:21-24) Realmente Jesus por a verwagt di su oyentenan pa nan stima hende cu a haci nan daño i cu a causa nan dolor?

E Nificacion di “Amor”

Na promé lugá, tene cuenta cu ora Jesus a bisa “stima,” e no tabata kier men e clase di amor i cariño cu kisas ta existí entre amigunan íntimo. E palabra griego pa stimacion cu a ser usá na Mateo 5:44 ta bini for dje palabra a·gá·pe. E palabra aki tin e nificacion di amor cu ta ser guiá of dirigí dor di principio. E no ta encerá necesariamente cariño caluroso. Debí cu e ta ser guiá dor di principio hustu, tal amor ta impulsá un persona pa busca e mihó interes di otro hende, sin importá nan comportacion. Pues amor a·gá·pe por superá enemistadnan personal. Jesus mes  a demostrá tal amor ora cu, en bes di maldicioná e soldánan romano cu a clab’é na staca, el a resa: “Tata, pordoná nan, pasobra nan no sa kico nan ta haciendo.”—Lucas 23:34.

Ta realístico pa verwagt cu mundu masalmente lo aceptá e siñansanan di Jesus i cu hende lo cuminsá stima otro? No, pasobra Bijbel ta indicá cu e mundu aki lo sigui bai stret den direccion di desaster. Segun 2 Timoteo 3:13: “Hende malbado i impostornan lo bai di malu pa pió.” No obstante, hende individual por pone un fin na e ciclo di odio dor di ser cabalmente educá den principionan hustu mediante un studio di Bijbel. Historia ta mustra bon cla cu dje manera ei hopi hende a siña resistí e ola di odio cu tin rond di nan. Considerá un par di caso di bida real.

El A Siña Stima

Cu 13 aña, José tabata enbolbí den combate di gueriya como miembro di un grupo terorista. * Nan a siñ’é odia e hendenan cu supuestamente tabata responsabel pa e inhusticianan cu el a mira rond di dje. Su meta tabata pa, si ta posibel, eliminá nan. Mirando asina hopi di su compañeronan muri, José a yena cu amargura i vengansa. Miéntras e tabata traha granada, e tabata puntra su mes: ‘Di con tin asina tantu sufrimentu? Si tin un Dios, e no ta ripará kico ta pasando?’ Hopi bes e tabata yora, tur confundí i deprimí.

Cu tempu José a bini den contacto cu un congregacion local di Testigonan di Jehova. Na e promé reunion di congregacion cu el a asistí, el a tuma nota mesora dje ambiente amoroso cu tabata reina. Tur hende a cumind’é den un manera caluroso i amigabel. Despues, un consideracion dje tema “Pakico Dios Ta Permití Sufrimentu?” a contestá net e preguntanan cu e tabata haci su mes. *

Cu tempu, mas conocimentu di Bijbel a pone José haci cambio den su bida i den su manera di pensa. El a siña for di Bijbel cu  “esun cu no ta stima ta permanecé den morto. Tur cu ta odia . . . ta un matadó, i . . . ningun matadó tin bida eterno permanentemente den dje.”—1 Juan 3:14, 15.

Sin embargo, tabata difícil p’e kibra su lasonan cu su compañeronan terorista. Cada bes cu el a bai Salon di Reino di Testigonan di Jehova, nan tabata siguié. Algun di su socionan di ántes a asta asistí na un par di reunion pa nan por comprendé ta kico a pone José cambia asina. Una bes cu nan a keda satisfecho cu e no tabata un traidor ni un peliger pa nan, nan a lagu’é na pas. Na edad di 17 aña, José a bautisá como un Testigo di Jehova. Poco despues el a cuminsá predicá tempu completo. En bes di traha complot con pa mata hende, e ta hiba awor un mensahe di amor i speransa pa nan!

Kibrando Bareranan Étnico

Miembronan di gruponan étnico por kibra e bareranan di odio cu ta separá nan? Considerá e grupo di abla amárico di Testigonan di Jehova na Londen, Inglatera. E grupo ta consistí di un 35 persona: 20 di nan ta di Etiopia i 15 ta di Eritrea. Nan ta adorá huntu den pas i union, apesar dje echo cu na África, hende di Eritrea i di Etiopia últimamente tabatin un guera amargo.

Famia di un Testigo etiopio a bis’é: ‘Nunca no confia hende di Eritrea!’ Pero awor, no solamente e ta confia su compañeronan cristian di Eritrea, sino tambe e ta yama nan ruman! Aunke normalmente hende di Eritrea ta papia e idioma tigrinya, nan a scoge pa siña amárico—e idioma di nan rumannan etiopio—ya asina nan por studia Bijbel huntu cu nan. Esta un testimonio maraviyoso dje poder cu amor basá riba debocion na Dios tin como “un laso perfecto di union”!—Colosensenan 3:14.

Stop di Pensa Riba Pasado

Pero kico si un persona tabata víctima di trato inhumano? No ta normal cu e ta sinti rencor pa cu su tormentadónan? Tuma Manfred, un Testigo di Alemania. El a pasa seis aña di su bida den un prizon comunista, djis pasobra e tabata un Testigo di Jehova. El a yega di sinti odio pa su opresornan of un deseo  pa tuma vengansa? El a contestá cu “no.” Segun e korant aleman Saarbrücker Zeitung, Manfred a splica: “Haci inhusticia of tuma represaya pa inhusticia . . . ta start un ciclo cu bes tras bes ta hiba na inhusticia.” Ta bisto cu Manfred a aplicá e palabranan di Bijbel: “No paga malu cu malu na ningun hende. . . . Si ta posibel, cuantu cu ta dependé di boso, sea pacífico cu tur hende.”—Romanonan 12:17, 18.

Un Mundu Sin Odio!

Testigonan di Jehova no ta pretendé di ta perfecto den esaki. Hopi bes nan ta ripará cu no ta fácil pa pone enemistad i odio bieu un banda. Pa aplicá principionan bíblico den bo bida ta rekerí esfuerso continuo i diligente. Pero en general, Testigonan di Jehova ta un ehempel bibu dje poder cu Bijbel tin pa kibra e ciclo di odio. Mediante un programa di studio di Bijbel na cas, Testigonan ta yuda miles di hende tur aña libra dje cadenanan di racismo i prehuicio. * (Wak e cuadro “Conseho Bíblico Ta Yuda Eliminá Odio.”) E éxito ei ta un muestra adelantá dje resultadonan dje programa educativo mundial cu pronto lo yuda eliminá odio i su causanan completamente. E futuro programa educativo aki lo tuma lugá bou di supervision dje Reino di Dios, es decir, su gobiernu mundial. Jesus a siña nos pidi pa e Reino ei den e Oracion di Nos Tata, ora el a bisa: “Laga bo reino bini.”—Mateo 6:9, 10.

Bijbel ta primintí cu bou di supervision dje gobiernu celestial aki, “tera sigur lo ta yená cu e conocimentu di Jehova.” (Isaías 11:9; 54:13) E ora ei e palabranan hopi citá di profeta Isaías lo haña un cumplimentu na escala mundial: “[Dios] sigur lo . . . dicta sentencia entre e nacionnan i rectificá asuntunan relacioná cu hopi pueblo. I nan lo tin cu bati nan spada haci ploeg i nan lansa haci skèr di snui mata. Nacion lo no hisa spada contra nacion, ni nan lo no siña di guera mas.” (Isaías 2:4) Pues anto, Dios mes lo kibra, una bes pa semper, e ciclo violento di odio.

[Nota]

[Kuadro na página 11]

Conseho Bíblico Ta Yuda Eliminá Odio

● “Di ki fuente tin guera i di ki fuente tin pelea den boso? Nan no ta dje fuente aki, esta, di boso deseo fuerte pa placer sensual cu ta na conflicto den boso miembronan?” (Santiago 4:1) Hopi bes nos por eliminá conflicto cu otro hende si nos siña frena deseonan egoista.

● “No [vigilá] cu interes personal boso mes asuntunan so, sino tambe cu interes personal den asuntu dje otronan.” (Filipensenan 2:4) Pone interes di otro hende promé cu di nos mes, ta un otro manera pa eliminá conflicto innecesario.

● “Laga rabia para i bandoná furia; no mustra bo mes excitá solamente pa haci malu.” (Salmo 37:8) Nos por i mester controlá tendencianan destructivo.

● “Dios . . . a traha for di un solo hende tur nacion di hende, pa nan biba riba henter e superficie dje tera.” (Echonan 17:24, 26) No ta lógico pa sinti nos superior cu hende di un otro rasa, ya cu nos tur ta miembro di e mésun famia humano.

● ‘No haci nada motivá pa gana di pleita of egoismo, sino considerá cu humildad di mente cu e otronan ta superior cu boso.’ (Filipensenan 2:3) Ta un locura pa menospreciá otro hende, pasobra hopi bes nan tin cualidad i abilidadnan cu nos mes no tin. Ningun rasa ni cultura tin monopolio riba tur loke ta bon.

● “Realmente anto, miéntras cu nos tin tempu faborabel p’e, laga nos obra loke ta bon pa cu tur.” (Galationan 6:10) Si nos djis tuma e iniciativa pa ta amigabel i cla pa yuda otro hende, sin importá nan rasa of cultura, esei lo por contribuí hopi na superá e brechanan di comunicacion cu tin i eliminá malcomprendimentu.

[Plachi na página 8, 9]

Testigonan di Etiopia i Eritrea ta adorá huntu na pas

[Plachi na página 10]

Manfred, sobrebibiente di un prizon comunista, a nenga di entregá na odio

[Plachi na página 10]

Bijbel por yuda kibra e bareranan cu ta separá pueblo