Enfrentando un Tragedia Horibel

SEGUN E RELATO DI JAMES GIARRANO

Bira welo ta un dje gosonan grandi di bida. Cu hopi anticipacion ami cu mi casá, Vicki, tabata spera yegada di nos promé nietu. Nos yu muher Theresa, i su casá Jonathan, tabata verwagt un baby na principio di october 2000. Nos no por a imaginá cu nos tabata a punto di enfrentá un tragedia horibel.

AMI cu mi casá, huntu cu nos yu homber i su casá, a bai cu vakansi diasabra, 23 di september. Nos lo a topa mas famia i pasa un siman na Outer Banks, cantu di costa di Nort Carolina. Theresa cu Jonathan a dicidí di no bai vakansi cu nos ya cu Theresa tabata den su di nuebe luna di embaraso i e caminda tabata largu, rond di 11 ora cu auto for di nos cas na Ohio.

Nos kier a posponé nos vakansi, pero Theresa a insistí pa nos bai. El a sigurá nos cu nada lo no pasa cuné. Ademas, su dokter tabata di opinion cu probablemente lo e carga su barica e nuebe lunanan completo, i tabata falta un par di siman promé cu su fecha pa duna lus.

Diarason, 27 di september 2000, tabata un bunita dia cu a corda mi dje motibu pakico nos famia a scoge pa pasa vakansi na e área aki durante e último añanan. Nos no a realisá cu promé cu e dia pasa, nos bida lo a cambia drásticamente.

“Theresa Ta Perdí!”

E anochi ei mi ruman homber na Ohio a bel mi. E tabata masha nervioso i a totobiá pa papia. Finalmente, el a logra saca e palabranan: “Theresa ta perdí!” Nan a yama polis pasobra e sucesonan rond di su desaparicion tabata sospechoso. Ora Jonathan a yega cas e atardi ei, e no a haña e porta dilanti na lok. Theresa su desayuno tabata riba mesa ainda, i su tas tabat’ei. Un cos mas tabata straño: Su sapatunan—e úniconan cu tabata sirbié awor cu e tabata den su di nuebe luna—ainda tabata banda di porta.

Jonathan a bel cas for di banda di 9:30 di mainta. Theresa a bis’é cu un señora a yama bisa cu e kier a pasa wak e auto cu nan tabata bende. Despues, Theresa a keda di bai haci algun diligencia. Jonathan a bel cas merdia ora di come, pero e no a hañ’é. Henter tra’i merdia el a keda bel, pero sin haña contesta. Ora el a yega cas 4:15 djatardi, el a ripará cu e auto no tabat’ei. El a bel hospital pasobra el a pensa cu kisas Theresa su dolornan di parto a cuminsá. E no tabata na hospital. Tambe el a bel algun famia, pero niun hende no a mir’é. E tabata desesperá i a dicidí di bel polis. Rond di  seis or djatardi polis a haña e auto no muchu leu for di nan cas. Pero ainda Theresa tabata perdí.

E noticia a dal nos na Nort Carolina duru. Ami cu mi casá huntu cu nos yu homber i su casá, a paketá nos maleta i coge rumbo pa cas. Tabata un careda largu i emocional. Nos a core henter anochi i a yega Ohio bek e siguiente mainta.

Un Adelanto den e Caso

Miéntras tantu, Jonathan cu algun famia, amigu cerá i otro hende tabata cooperá cu polis pa busca Theresa, nan a busca henter anochi. E búskeda a sigui pa cincu dia agonisante. Finalmente, riba dialuna, 2 di october, tabatin un adelanto den e caso. E dia ei polis a logra rastrea e yamada di telefon cu a ser hací na cas di Theresa e diarason mainta. Un señora cu ta biba djis un par di blok mas leu a haci e yamada for di un telefon celular.

Despues di entrevistá e muher, polis a sospechá algu. Mas lat e anochi ei polis a bai bek na cas dje muher. Pero yegando na porta dje cas, nan a tende un tiru. Ora nan a kibra drenta, nan a haña e muher morto. El a tira su mes mata. Pa nan sorpresa nan a haña un baby mucha homber recien nací den un cuarto na di dos piso. Sorprendentemente, el a keda na soño durante henter e bochincha!

Pero ainda nan no a haña niun rastro di Theresa. Durante e siguiente oranan, polis a rista e cas pa wak si tin evidencia cu e tabata einan. E búskeda a terminá mardugá di diamars den e garashi. Ei, den un graf no muchu hundu, nan a haña e curpa di Theresa. Despues autopsia a saca afó cu el a ricibí un sla na su cabes cu a mand’é leu, caba un tiru den lomba. El a muri mesora, anto e ora ei e baby a ser sacá for di su matris. Mirando atras, nos a sinti un tiki alivio cu e no a sufri.

Polis a hiba e baby recien nací hospital, i a resultá cu e tabata bon-bon di salú, e no tabatin ni un rascá! Un test obligatorio di DNA a confirmá cu di berdad e ta nos nietu. Jonathan a dun’é e nomber cu e cu Theresa a scoge: Oscar Gavin. Despues di un estadia corticu na hospital, nos nietu di 8 liber i 11 ons, tabatin mag di bai cas den brasa di su tata riba diahuebs, 5 di october. Nos tabata emocioná di tin nos nietu, pero no tin palabra pa describí con destrosá nos tabata cu Theresa no tabat’ei pa ten’é den su brasa.

Reaccion di Comunidad

Ami cu mi famia a keda masha conmoví mes cu e cantidad di apoyo cu nos a haña, i den hopi caso di hende cu nos no a topa nunca. Durante e dianan cu Theresa tabata perdí, cientos di boluntario a yuda busk’é. Hopi a duna cen. Vários tienda di artículonan di oficina a druk miles di pamfleta grátis. I boluntarionan a parti e pamfletanan den un área di vários kilometer alrededor di Theresa su cas.

Un di nos ruman muhernan cristian ta traha pa un abogado local, i ora el a conta e abogado di nos situacion, el a ofrecé pa yuda nos. Nos a aceptá su oferta, i esaki a resultá di ta un tremendo bendicion. El a yuda nos trata cu medionan di comunicacion i tambe cu cierto cuestionnan legal cu a surgi. Ademas, el a recomendá dos investigadó privá cu a yuda hopi cu e caso. Nan interes genuino realmente a touch nos curason.

Despues cu nos a recuperá nos nietu, e apoyo a intensificá. Vários tienda a manda cuminda i artículonan di cas. Hopi hende a trece paña pa Oscar i tambe pampers, lechi pa yu i co’i hunga. Nos a ricibí hopi mas di loke Oscar por a usa, pues nos a duna loke tabata di mas na e kraamafdeling di un hospital local. Como cu medionan di comunicacion a raportá e suceso, nos a ricibí miles di karchi i carta, no solamente for di nos comunidad, sino di rond mundu.

E abundancia di apoyo tabata bisto foral na e discurso special cu a tene na memoria di Theresa riba diadomingo, 8 di october. Nos tabata sa cu hopi hende lo kier a asistí, pero e reaccion a surpasá nos expectativa. Nos a haci areglo pa usa e auditorio di un scol secundario local, i el a yena completamente cu mas di 1.400 persona. Tabatin presente famia, amigu, funcionarionan policial, e alcalde i otro hendenan di comunidad. Miembronan di medionan di comunicacion tambe tabata presente, i canalnan  di television local a filma e discurso, cu tambe a ser transmití en bibu via Internet. Fuera di esei, cientos di hende a para den lobi dje scol of a krimp bou di paraplú pafó den awaceru friu, scuchando e discurso via loudspeaker. E discurso a duna un testimonio di largu alcanse tocante nos creencianan basá riba Bijbel.

Despues dje discurso, cientos di hende cu pacenshi a para den rij pa duna condolencia. Nos a keda casi tres ora, brasando tur esnan cu a bini i expresando nos aprecio pa nan presencia. Despues dje discurso un hotel local bondadosamente a percurá un cena pa mas cu 300 hende, consistiendo di miembronan di famia, amigunan cerá i otro hende cu a yuda recuperá nos nietu.

Nos no por expresá cu palabra cuantu nos ta apreciá loke hende—mayoria di nan hende desconocí—a haci pa yuda nos. E experencia aki a haci nos mas decididu cu nunca pa nos tin un pleno participacion den e ministerio cristian, pasobra tin hopi hende di bon curason cu nos kier alcansá cu e bon nobo dje Reino di Dios.—Mateo 24:14.

Con e Congregacion A Reaccioná

For di principio dje experencia traumático aki, nos rumannan cristian a rondoná nos cu apoyo continuo. E sosten aparentemente nonstop aki, a bini di nos mes congregacion di Testigonan di Jehova i tambe di congregacionnan den cercania.

Asta promé cu nos a yega bek for di Nort Carolina, e ancianonan di nos congregacion a yuda organisá gruponan pa localisá Theresa. Hopi di nos rumannan a tuma liber di trabou pa djoin den e búskeda. Tin di nan a bisa nan doño di trabou cu nan ta dispuesto pa tuma liber sin pago, pero den algun caso e doño a duna nan e tempu liber cu pago. Durante e dianan cu Theresa tabata perdí, algun di nos ruman hombernan spiritual a keda cu Jonathan pa e no ta su so. Vários ruman a gewoon bini nos cas i a tene nos cas limpi i na ordu. Otronan a yuda alimentá e boluntarionan i contestá telefon.

Rond di seis siman despues di Theresa su morto, mi casá cu Jonathan tabatin e tarea difícil di pasa dor dje cosnan di Theresa i saca tur cos for di su cas. Jonathan a sinti cu e no por a biba mas den e cas cu e cu Theresa a compartí, pues el a dicidí di pon’é na benta. Pasando dor dje pertenencianan di Theresa tabata un tarea doloroso, tur cos a recordá nan di dje i cuantu nan ta sinti su falta. Pero na e ocasion ei tambe, nos rumannan a yuda nos. Nan a yuda paketá su cosnan i asta a drecha algun cos n’e cas pa prepar’é pa benta.

Mas importante ainda, nos rumannan a duna nos famia sosten spiritual i emocional. Nan tabata bel i bishitá nos pa animá nos. Hopi di nan a manda karchi i cartanan conmovedor. E sosten amoroso aki a sigui no solamente durante e promé dianan i simannan, sino pa hopi luna.

Vários di nos rumannan a bisa nos pa laga nan sa ki ora cu nos tin mester di djis un hende  pa tende nos, i nos a aceptá e ofertanan ei. Ta un consuelo masha grandi di por compartí bo sintimentunan cu amigunan cu bo ta stima i confia! Di berdad nan ta sirbi como un ehempel di e palabranan dje proverbio bíblico: “Un berdadero compañero ta stima na tur tempu, i ta un ruman cu a nace pa ora tin angustia.”—Proverbionan 17:17; 18:24.

E Impacto Riba Nos Famia

Mi tin cu bisa cu no tabata fácil pa mi cu mi famia enfrentá e asesinato di Theresa. E cos ei a ègt cambia nos bida. Tin biaha mi ta rabiá cu e no ta aki cerca mi. Mi ta sinti falta di su brasa i sunchinan.

Mi casá tabata masha pegá mes na Theresa. Un dia no tabata pasa sin cu nan a por lo ménos papia cu otro. Nan a pasa masha hopi ora mes papiando tocante Theresa su embaraso. Nan a traha huntu pa drecha e kamber di yu.

Vicki ta describí su sintimentunan: “Tin asina hopi cos cu mi ta sinti falta di dje. Mi ta sinti falta di sali predicá huntu cuné. Mi ta sinti falta di bai haci cómpras huntu. Loke ta duel mi mas tantu ta di no por mir’é cu su baby, esei simplemente ta kibra mi curason. Mi sa cuantu e tabata stima Oscar promé cu el a nace. E tabata sa cu lo el a haña un yu homber. Despues cu mi a traha un klechi pa e baby i duna Theresa e klechi, el a skirbi mi e karchi aki:

‘Kerida Mami,

Masha, masha danki pa e bunita klechi di baby. Mi ta ègt apreciá tur bo esfuerso cu bo a haci pa traha riba dje. Gewoon mi kier bolbe gradicí bo pa tur e yudansa i animacion cu bo a duna mi durante algun dje partinan mas duru di mi bida. Semper lo mi corda bo i ta gradicidu na bo pa esei. Mi a yega di tende cu un dia lo bo crece i realisá cu bo mihó amiga ta bo mama. Wel, mi ta gradicí Jehova tur dia cu no a tuma mi hopi tempu pa realisá esei. Semper lo mi stima bo.’”

Tabata doloroso tambe pa mira loke Jonathan tabata pasa aden. Miéntras Oscar tabata na hospital, Jonathan a confrontá un dje cosnan mas difícil cu e mester a haci. Como cu el a dicidí di bin biba cerca nos temporalmente, e tabatin cu muda e kamber di baby cu e cu Theresa a drecha na nan cas. El a paketá e cabai di zoya, e wieg i e peluchenan i a muda nan pa nos cas.

Loke A Yuda Nos Trata cu e Situacion

Ora bo perde un ser kerí den un forma trágico asina, ta surgi hopi pregunta i emocion confuso. Tabatin biaha cu ami como anciano cristian a trata di consolá i yuda otro hende cu tabata lucha cu e pregunta i sintimentunan ei. Pero ora ta bo mes ta esun cu ta pena, emocion por nubla bo forma cla di pensa.

Por ehempel, sabiendo e condicion di Theresa i con nos lo no t’ei pa un siman, mi a haci oracion pidi Jehova proteh’é. Mi tin cu admití cu ora nan a hañ’é asesiná, mi a puntra mi mes na principio di con mi oracion no a ser contestá. Claro cu mi sa cu Jehova no ta garantisá proteccion milagroso pa su pueblo individualmente. Mi a sigui resa pa haña comprendimentu. Loke a consolá mi ta e echo cu Jehova ta protehá su pueblo spiritualmente, es decir, e ta percurá loke nos tin mester afin di protehá nos relacion cuné. E tipo di proteccion ei ta sumamente importante, pasobra e por tin efecto riba nos futuro eterno. Den e sentido ei, Jehova a protehá Theresa; Theresa tabata sirbié fielmente ora el a muri. E echo cu mi sa cu Theresa su prospectonan di bida pa futuro ta den Jehova su man amoroso, a duna mi pas.

Tabatin vários texto bíblico cu tabata masha consolador. At’akí algun cu a yuda mi enfrentá e situacion:

 “Lo bai tin un resureccion di tantu e hustunan como e inhustunan.” (Echonan 24:15) Mi tin hopi tempu ta kere e promesa bíblico di un resureccion den un paradijs riba tera, pero awor e speransa ei ta asta mas real pa mi. E echo so cu lo mi por tene Theresa atrobe den mi brasa a duna mi e forsa pa pasa cada dia.

“Jehova . . . ta un Dios, no dje mortonan, sino dje bibunan, pasobra nan tur ta bibu p’e.” (Lucas 20:37, 38) Ta un gran consuelo pa sa cu e mortonan cu lo ser resucitá un dia, for di awor caba, nan “tur ta bibu” pa Jehova. Pues, for di su punto di bista nos kerida Theresa ta bibu-bibu.

Vicki lo kier compartí algun dje textonan bíblico cu a fortalec’é mashá:

“‘Ta imposibel pa Dios gaña.’ (Hebreonan 6:18; Tito 1:2) Como cu Jehova no por gaña, mi sa cu lo e cumpli cu su promesa di resucitá e mortonan.

‘No straña boso riba esaki, pasobra e ora ta bini den cua tur esnan cu ta den grafnan conmemorativo lo tende [Jesus] su bos i lo sali.’ (Juan 5:28, 29) E palabranan ‘grafnan conmemorativo’ ta implicá cu Theresa ta den Jehova su memoria te ora cu e laga su Yu Jesucristo resucit’é. Mi sa cu no tin niun lugá mas safe p’e cu den Jehova su memoria perfecto.

‘Den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.’ (Filipensenan 4:6, 7) Mi ta haci oracion foral pa Jehova su spiritu duna mi forsa. Ora mi ta hopi perturbá, mi ta bai cerca Jehova i bisa: ‘Mi tin mester di mas di bo spiritu,’ i e ta yuda mi pasa un dia mas. Tin biaha mi no por ni saca e palabranan, pero tog e ta duna mi e forsa pa sigui.”

Realmente Jehova a yuda nos enfrentá e tragedia teribel aki. Ai sí, ainda nos ta yora i pena pa nos kerida Theresa. Nos ta verwagt cu nos tristesa lo no ser completamente eliminá sino te ora nos por bras’é atrobe den Jehova su mundu nobo. Miéntras tantu, nos ta mas decididu cu nunca pa sirbi Jehova fielmente. Jonathan ta decididu pa haci su best pa cria Oscar di tal forma cu e ta siña stima i sirbi Jehova, i ami cu Vicki lo yud’é den tur manera posibel. Ta nos deseo sincero pa ta presente den Dios su mundu nobo pa yama Theresa bon biní bek i introducié na su yu homber cu e no a logra tene den su brasa.

[Plachi na página 19]

Nos yu muher Theresa, scuchando e batimentu di curason di su baby

[Plachinan na página 20, 21]

Nos a sinti e abundancia di apoyo na e discurso pa conmemorá Theresa

[Plachi na página 23]

Huntu cu mi casá Vicki, na Theresa su casamentu

[Plachi na página 23]

Nos nietu Oscar