Ken Ta e Anticristo?
E Punto di Bista Bíblico
Ken Ta e Anticristo?
“BOSO A TENDE CU ANTICRISTO TA BINI.”—1 JUAN 2:18.
SI NAN a spierta bo cu hende a mira un criminal peligroso ta bini den direccion di bo bario, kico lo bo haci? Probablemente lo bo busca pa sa precis con su aparencia ta i ki métodonan e ta usa. Lo bo keda alerto.
Awe ta existí un situacion similar. E palabranan di apostel Juan a spierta nos: “Tur expresion inspirá cu no ta confesá Jesus no ta originá cu Dios. Ademas, esaki ta e expresion inspirá dje anticristo cu boso a tende ta bini, i awor e ta den mundu caba.” (1 Juan 4:3) Ta existí un anticristo asina, un enemigu di Dios i gañadó di hende, cu awor ta menasá bienestar di henter humanidad?
Juan a usa e palabra “anticristo” cincu biaha den dos di su cartanan. Esei ta referí na un entidad cu ta oponé loke Bijbel ta siña tocante Jesucristo i ta incluí impostornan cu ta presentá nan mes como Cristo of como mandá dor di Cristo. Bijbel ta duna informacion confiabel tocante e anticristo. Pero manera sa pasa cu criminalnan, informenan infundá relacioná cu e entidad misterioso aki a ricibí mas atencion cu e berdad.
Un Caso di Identidad Robes
Desde e dianan di apostel Juan, hende a pretendé cu Juan su palabranan tocante un anticristo a designá un persona specífico. Nan a proponé vários candidato. Siglonan pasá hopi hende a kere cu ta e emperador romano Nero, tabata e anticristo. Despues, e ola di odio i teror cu Adolf Hitler a causa, a convencé hopi hende cu t’e tabata e anticristo. Nan a aplicá e palabra asta na e filósofo aleman Friedrich Nietzsche. Sin embargo tin otro hende ta kere cu e anticristo tin cu bini ainda i cu lo e presentá como un político astuto i cruel cu ta decididu pa goberná mundu. Nan ta kere cu e bestia salbahe di Revelacion capítulo 13 ta referí specíficamente na e anticristo cu Juan a mencioná. Nan ta bisa cu di un manera of otro e marca 666 lo identificá e futuro promotor di maldad aki.
Hende cu ta promové e ideanan aki ta asumí cu Juan a señalá na un solo anticristo. Pero kico su palabranan ta mustra? Considerá 1 Juan 2:18: “Mescos cu boso a tende cu anticristo ta bini, asta awor a yega di tin hopi anticristo.” Sí, “hopi anticristo,” no un so, tabata responsabel pa e situacion spiritual yen di problema aya den promé siglo. Awe no ta un anticristo so tin, sino hopi cu ta forma e clase di anticristo. Colectivamente nan a montoná ruina spiritual riba humanidad. (2 Timoteo 3:1-5, 13) Di ken e anticristo ta consistí?
Revelacion capítulo 13 como un posibilidad. Apostel Juan a skirbi: “E bestia salbahe cu mi a mira tabata manera un leopardo, pero su pia tabata manera pia di oso, i su boca tabata manera boca di leon.” (Revelacion 13:2) Kico e elementonan aki ta nificá?
Laga nos considerá e bestia salbahe diExpertonan bíblico a ripará un coneccion entre Revelacion capítulo 13 i Daniel capítulo 7. Dios a duna Daniel un vision di bestianan figurativo, entre nan tabatin un leopardo, un oso i un leon. (Daniel 7:2-6) Ki nificacion e profeta di Dios a asigná na nan? El a skirbi cu e animalnan salbahe ei a simbolisá reynan terenal, es decir, gobiernunan. (Daniel 7:17) P’esei nos por concluí lógicamente cu e bestia salbahe di Revelacion ta representá gobiernu humano. Siendo cu e gobiernunan aki ta oponé e Reino di Dios, nan ta forma parti dje anticristo.
Ken Mas Ta Forma Parti dje Anticristo?
Ora Cristo, e Yu di Dios, a cana riba tera, e tabatin hopi enemigu. Aunke awor e ta fuera di alcanse físico, e tin su oponentenan di tempu actual. Tuma nota ken ta ser incluí den nan.
Apostel Juan a declará: “Ken ta e mentiroso si no ta esun cu ta nenga cu Jesus ta e Cristo? Esaki ta e anticristo, esun cu ta nenga e Tata i e Yu.” (1 Juan 2:22) Apóstatanan i lidernan di adoracion falsu ta troce e siñansanan cla di Jesus i bruha nan mara na konopi di engaño religioso. E personanan ei ta rechasá berdad bíblico i ta plama mentira den nomber di Dios i di Cristo. Mediante nan doctrina di Trinidad nan ta nenga e berdadero relacion cu tin entre e Tata i e Yu. P’esei, nan tambe ta parti dje anticristo.
Jesus a spierta su disipelnan di antemano na Lucas 21:12: “Hende lo pone man riba boso i lo persiguí boso, entregando boso na snoa i prizon . . . pa causa di mi nomber.” For di promé siglo, cristiannan berdadero a wanta persecucion salbahe. (2 Timoteo 3:12) Hende cu ta fomentá tal persecucion ta obra contra Cristo. Nan tambe ta un parti dje anticristo.
“Esun cu no ta na mi banda ta contra mi, i esun cu no ta recogé cu mi, ta plama.” (Lucas 11:23) Aki Jesus ta proclamá cu tur hende cu ta oponele i e propósitonan divino cu e ta apoyá, ta cai den e categoria dje anticristo. Ki fin ta spera e personanan aki?
Kico Ta Spera e Anticristonan?
“[Dios lo] destruí esnan cu ta papia mentira. Un homber di dramamentu di sanger i di engaño Jehova ta odia,” segun Salmo 5:6. Esaki ta conta pa e anticristonan? Sí. Apostel Juan a skirbi: “Hopi gañadó a sali den mundu, hende cu no ta confesá Jesucristo como biniendo den carni. Esaki ta e gañadó i e anticristo.” (2 Juan 7) Dios Todopoderoso lo trece destruccion riba e anticristonan pa nan mentiranan i engaño.
Segun cu e tempu di ehecutá e sentencia ei ta acercá, cristiannan berdadero no mester permití engaño i preshon anticristian cu ta bini di apóstata, debilitá nan fe. Juan su spiertamentu ta urgente: “Tene cuidou pa boso no perde loke nos a traha pa producí, sino pa boso obtené un recompensa completo.”—2 Juan 8.
[Rekonosementu pa Potrèt na página 28]
Nero: Cortesia di Visitors of the Ashmolean Museum, Oxford