Observando Mundu

Record di Desaster na 2000

Segun e reaseguradó Munich Re, na aña 2000 un cantidad record di desaster natural a tuma lugá rond mundu. Na tur, a raportá mas cu 850 catástrofe cu a mata 10.000 hende i causa mas cu 30 mil miyon dollar na daño. Aunke e cantidad di desaster natural tabata mas tantu, e pérdidanan económico i di bida humano tabata ménos severo cu e aña anterior. Ta asina pasobra mayoria dje desasternan a tuma lugá den áreanan ménos poblá, segun e boletin di prensa dje compania. Tormentanan tabata responsabel pa 73 porciento dje pérdidanan sigurá, i inundacion a causa 23 porciento. E informe ta bisa cu “mester verwagt cu e pérdidanan generá dor di catástrofenan natural lo sigui aumentá den futuro” debí na crecementu di poblacion i subida di balor di propiedad.

Envelop Transparente

Un compania mericano a desaroyá un spray cu ta “haci envelop cerá transparente” sin laga niun rastro atras, segun e revista New Scientist. E spray ta traha riba tur color di envelop i ta un “líkido cu no ta pasa coriente, no ta venenoso i ta safe pa medio ambiente,” segun bocero dje compania Bob Schlagel. Fuera di un holó cu ta keda un 10 pa 15 minuut, “ink no ta core riba e envelop ni riba e carta, no ta keda marca di awa, absolutamente niun evidencia,” Schlagel ta agregá. E producto a ser desaroyá pa yuda instancianan hudicial detectá carta cu bom aden i otro paketenan potencialmente peligroso. Sin embargo, tambe por usa e spray pa lesa carta cerá, loke a pone un funcionario di derechonan humano yama e producto algu éticamente cuestionabel.

Nabegacion di Abeha

E abilidad di abeha pa bula di nan neshi pa flor i despues regresá nan neshi bek ta bon conocí. Pero colonianan di abeha migratorio for di Assam, nort India, evidentemente ta biaha cientos di kilometer leu i despues ta regresá no solamente na e mésun palu, sino tambe na e mésun taki caminda nan famia a traha neshi dos aña promé! Loke ta haci esaki asina remarcabel ta cu e abehanan obrero ta biba solamente tres luna of ménos. Pues e abehanan cu ta regresá ta di vários generacion despues dje abehanan original cu a traha e neshi. Con nan ta logra haña e caminda pa bini bek ta un misterio. E korant The Sydney Morning Herald ta informá cu kisas esei tin di haber cu nan olfato. Un otro posibilidad ta cu e reina, cu sí ta biba un par di aña, di un manera of otro ta comunicá e informacion na e abehanan exploradó mediante un baile cu ta mustra nan den ki direccion nan tin cu bula.

Idioma i Celebro

Dos área dje celebro cu hende cu por tende ta usa ora nan ta reconocé i papia un idioma, ta loke hende surdu tambe ta usa den idioma di seña, Science News ta informá. Scan di celebro ta mustra cu “e áreanan aki di tehido di nervio ta drenta den accion cerca hende surdu cu ta usando idioma di seña,” e informe ta bisa. Segun Laura-Ann Petitto di Universidad McGill na Montreal, kende a encabesá e estudio, esaki ta indicá cu e áreanan aki dje celebro ta controlá “rasgonan fundamental di idioma cu por ser expresá sea via abla of cu seña.” Esaki ta subrayá e necesidad di haci mas estudio dje flexibilidad dje celebro humano den facilitá idioma. Science News ta bisa: “Regionnan di celebro enbolbí cu idioma papiá i idioma di seña ta extendé den otro considerablemente.”

Soño i Memoria

Investigadónan di soño a descubrí cu drumi bon anochi, en bes di keda studia of traha te lat, “ta un rekisito esencial pa por recordá cosnan den e simannan cu ta sigui,” segun The Independent di Londen. Profesor Robert Stickgold dje Scol Médico di Harvard a usa 24 boluntario: a permití mitar di nan drumi henter anochi despues di un sesion di les, miéntras cu a tene e otro mitar henter anochi lantá. Caba tur dos grupo a drumi normalmente e siguiente dos anochinan pa yuda e grupo cu a perde soño superá nan cansancio. Un test di memoria a mustra cu esnan cu a drumi e promé anochi “tabata consistentemente i pa gran parti mihó den efectuá e tarea di memoria, miéntras cu e di dos grupo no a demostrá ningun mehoracion, apesar cu nan a drumi bon despues.” Debí cu soño aparentemente ta fortalecé memoria, e descubrimentunan aki ta demostrá cu perde soño pa studia—foral e promé dos pa tres oranan di soño—ta duna masha tiki beneficio.