Hóbennan Sa Puntra . . .

Con Mi Por Haci Lesamentu di Bijbel Mas Placentero?

“Tin bes Bijbel ta difícil pa comprendé, i esei por ta desanimante.”—Annalieza, 17 aña.

“Ami tabata haña Bijbel laf.” —Kimberly, 22 aña.

HOPI hende no ta gusta lesa mes. Pues un buki diki manera Bijbel por parce aplastante, asta pa hende cu gusta lesa. “Pa mi, Bijbel tabata un buki diki cu hopi palabra grandi cu tabata difícil pa comprendé,” Tammy di 17 aña a bisa. “Lesa Bijbel ta exigí hopi concentracion i perseverancia.”

Ademas, kisas huiswerk, tareanan di cas i recreo ta usa gran parti di bo tempu i energia. Esei tambe por pone cu ta difícil pa bo concentrá i disfrutá di lesamentu di Bijbel. Alicia, cu ta un Testigo di Jehova, ta dedicá tempu tambe na prepará pa reunionnan cristian i asistí na nan, i compartí su creencianan cu otro hende. E ta admití: “Lesa Bijbel por ta difícil pasobra ta parce cu tin un sinfin di cos pa haci.”

Sin embargo, Alicia, Tammy i hopi otro hóben a logra superá e obstáculonan. Awor nan ta lesa Bijbel cu regularidad i ta hacié cu placer. Bo tambe por! Considerá tres cos cu bo por haci pa lesamentu di Bijbel bira mas placentero.

Traha Tempu pa Lesamentu di Bijbel

“Mi ta pensa cu hóbennan ta bisa cu lesamentu di Bijbel ta laf pasobra nan no a hacié suficiente,” segun Kelly di 18 aña. Mescos cu bo ta disfrutá di un deporte of wega cu bo ta practicá cu regularidad, asina tambe lo bo disfrutá di lesamentu di Bijbel segun cu bo ta hacié regularmente.

Pero kico si bo tin masha tiki tempu liber? Apostel Pablo ta consehá: “Vigilá cuidadosamente p’e manera cu boso ta cana no ta manera hende imprudente sino manera hende sabí, cumprando e tempu oportuno pa boso mes, pasobra e dianan ta malu.” (Efesionan 5:15, 16) Bo por ‘cumpra tempu’ dor di gasta ménos tempu na actividadnan cu no ta esencial, manera wakmentu di television. E palabra cu Pablo a usa pa “tempu” por nificá un tempu asigná pa un propósito specífico. Cua lo por ta e tempu asigná pa abo lesa Bijbel?

Hopi hende ta lesa Bijbel mainta, despues di considerá e texto bíblico i comentario hañá den e foyeto Examinando e Scritura Diariamente. * Tin hende ta preferá di lesa promé cu nan bai drumi anochi. Scoge un ora  realístico cu ta bon pa bo, i adapt’é segun cu ta necesario. Alicia ta remarcá: “Flexibilidad ta realmente e clave cu a yuda mi mantené un programa regular di lesamentu.”

Tin hóbennan cristian cu ta programá 10 pa 15 minuut pa dia pa lesa Bijbel. Haciendo esei, nan a logra lesa e Bijbel completo den un of dos aña! Asta si esei ta parce fuera di bo alcanse, pone como bo meta pa lesa un porcion di Bijbel tur dia. Dor di pega dicididamente na bo tempu asigná pa lesa Bijbel, bo amor pa e Palabra di Dios lo crece.—Salmo 119:97; 1 Pedro 2:2.

Pidi pa Sabiduria den Oracion

Nos tin cu admití cu asta lesadónan regular di Bijbel ta haña algun porcion dje Palabra di Dios difícil pa comprendé. Jehova Dios, e Autor di Bijbel, kier pa bo comprendé su Palabra. E buki di Echonan ta conta di un biahero di Etiopia cu no por a comprendé un profecia den Isaías capítulo 53 bon. E homber tabata dispuesto pa pidi yudansa, i e angel di Jehova a manda e misionero Felipe pa splik’é e profecia.—Echonan 8:26-39.

Pues, eigenlijk lesamentu eficas di Bijbel no ta cuminsá cu e lesamentu, sino cu oracion. Algun hende a hacié un custumber pa, promé cu nan habri nan Bijbel, haci oracion na Jehova pa pidié sabiduria pa comprendé i tuma na pechu e lesnan cu nan topa den nan lesamentu. (2 Timoteo 2:7; Santiago 1:5) E spiritu di Dios por asta trece bek na bo mente versículonan di Bijbel cu lo yuda bo contestá pregunta of trata cu prueba.

Un yoncuman cristian ta corda: “Tempu mi tabatin 12 aña, mi tata a bai laga nos famia. Un anochi mi tabata haci oracion riba cama, rogando Jehova p’e laga mi tata bini bek. Anto mi a coge mi Bijbel i a lesa Salmo 10:14: ‘Na bo [Jehova] esun desafortuná, e huérfano di tata, ta confia su mes. Bo mes a bira su yudante.’ Mi a pausa un ratu. Mi a sinti cu Jehova tabata papiando cu mi i tabata laga mi sa cu e tabata mi yudante; é tabata mi Tata. Mi por tabatin un tata mas mihó cuné?”

Abo lo por hacié bo custumber pa haci oracion cada biaha cu bo cai sinta pa lesa Bijbel? Adrian ta sugerí: “Haci oracion promé—i claro tambe, despues—cu bo lesa, di manera cu en realidad e ta bira un combersacion cu Jehova cu ta bai den dos direccion.” Oracion sincero lo profundisá bo determinacion pa pega na bo programa di lesamentu di Bijbel i lo fortalecé bo relacion cu Dios.—Santiago 4:8.

Duna Bo Lesamentu di Bijbel Bida

Kimberly, citá den e introduccion, tabata haña Bijbel laf. Ta berdad cu Bijbel ta un buki masha bieu—skirbí hopi promé cu nan a inventá computer, television of avion—i e personahenan bíblico a muri miles di aña pasá. No obstante, apostel Pablo a skirbi: “E palabra  di Dios ta bibu i ta ehercé poder.” (Hebreonan 4:12) Con un buki antiguo asina por ehercé poder?

Den e dianan dje copista Ésdras, miles di homber, muher i “tur cu tabata suficiente inteligente pa scucha” a reuní huntu na Jerusalem pa nan scucha lesamentu dje Ley di Moises. N’e tempu ei e Ley tabatin mas cu 1.000 aña caba! Sin embargo, Ésdras i su asistentenan “a sigui lesa na bos haltu for dje buki, for dje ley dje Dios berdadero, cu a ser splicá, i tabatin un ponementu di nificacion na dje; i nan a sigui duna comprendimentu na e lesamentu.” Ki resultado tabatin ora cu e hombernan aki a splica e Scritura i a duna bida na e lesamentu? “Henter e pueblo a bai come i bebe i manda porcionnan i tene un gran alegria, pasobra nan a comprendé e palabranan cu a duna nan di conocé.”—Nehemías 8:1-12.

Con abo por ‘pone nificacion’ na bo lesamentu di Bijbel? Cathy, kende ta considerá lesamentu un reto, ta lesa na bos haltu p’e por keda concentrá. Nicki ta purba pone su mes den e marco di circunstancia dje relato. “Mi ta purba imaginá con ami lo a sinti den e situacion ei,” e ta bisa. “Mi relato faborito semper tabata esun di Rut cu Noemí. Mi por les’é bes tras bes. Ora mi a muda bai un stad nobo, mi a haña consuelo for dje relato aki pasobra mi por a imaginá con Rut a sinti bayendo un lugá straño i sin ta conocé niun hende. Mi a mira con el a pone su confiansa den Jehova i esei realmente a yuda mi haci mescos.”—Rut, capítulo 1-4.

Pa Bijbel por “ehercé poder,” bo mester meditá. Cada bes cu bo lesa, tuma tempu pa refleccioná riba e textonan cu bo a lesa i considerá con lo bo usa loke bo a siña. Pa enrikesé bo lesamentu lo bo por usa yudansanan pa studia Bijbel publicá dor di Testigonan di Jehova. *

Perseverá!

No ta fácil pa pega na un programa pa lesa Bijbel. Asta e mihó programa di lesamentu di Bijbel por tin mester di ahuste de bes en cuando. Con bo por perseverá den bo meta pa lesa Bijbel tur dia?

Bo amigu i famianan por yuda bo. Amber di 15 aña ta bisa: “Mi ta compartí kamber cu mi ruman muher. Tin anochi mi ta asina cansá cu e único cos cu mi kier haci ta bai drumi, pero mi ruman muher ta corda mi pa lesa mi Bijbel. Pues nunca mi no ta lubidá!” Si bo haña un cierto texto of pasashi interesante, papia tocante dje cu otro hende. Esaki lo aumentá bo aprecio pa e Palabra di Dios i por asta stimulá nan interes pa lesa Bijbel. (Romanonan 1:11, 12) Si bo neglishá bo lesamentu di Bijbel pa un dia of un par di dia, no entregá! Sigui caminda bo a keda, i sea mas determiná cu nunca pa pega na bo programa.

No lubidá nunca riba e beneficionan ricu cu bo ta saca di lesa Bijbel tur dia. Dor di scucha Jehova mediante su Palabra, bo por disfrutá di un relacion cerá cuné. Lo bo siña comprendé kico e ta pensa i sinti. (Proverbionan 2:1-5) E berdadnan precioso aki for di nos Tata celestial lo resultá di ta un proteccion. “Con un hóben lo limpia su caminda?” e salmista a puntra. “Dor di mantené su mes alerto conforme cu bo palabra.” (Salmo 119:9) Pues cuminsá un rutina di lesa Bijbel—i pega na dje. Kisas lo bo hañ’é hopi mas placentero di loke bo a pensa!

[Nota]

[Plachi na página 24]

Oracion i investigacion lo mehorá bo lesamentu di Bijbel i yuda bo comprendé e nificacion dje Scritura

[Plachi na página 25]

Pone bo mes den e marco di circunstancia dje relato lo duna bida na e Scritura