Descubrí e Causanan

“Por lo general, depresion di tiener no ta debí na un solo factor, sino debí na un combinacion di cos cu ta causa stres.”—Dr. Kathleen McCoy.

KICO ta causa depresion cerca tiener? Por tin vários factor. Pa cuminsá, e cambionan físico i emocional cu pubertad ta ocasioná por laga hóbennan sinti hopi miedu i insiguridad, loke ta haci nan mas incliná na un condicion mental negativo. Tambe tienernan sa ta vulnerabel pa emocionnan negativo ora nan ta sinti cu nan a ser rechasá dor di nan pareunan of dor di un persona pa ken nan tin sintimentunan romántico. Ademas, manera a ser mencioná den nos artículo di introduccion, e tienernan djawe ta lanta den un mundu cu riba su mes por deprimí bo. Nos ta bibando en berdad den “tempu crítico, duru pa trata cuné.”—2 Timoteo 3:1.

Loke ta haci e problema pió ta e echo cu ta pa promé bes e hóbennan ta confrontá preshon di bida, i nan no tin e abilidadnan ni e experencia di adulto. Pues, hopi bes tienernan ta bira manera turista cu tin cu purba sigui nan ruta dor di un teritorio desconocí; nan ta sinti nan mes intimidá dor dje ambiente rond di nan, i den hopi caso, nan no ta incliná na pidi yudansa. E condicionnan aki por bira tera fértil pa e simia di depresion.

Pero tin vários otro factor cu por contribuí na depresion cerca tienernan. Laga nos considerá djis un par.

Depresion i Pérdida

Tin biaha depresion ta bini despues di un pérdida profundo: kisas morto di un ser kerí of perde un mayor dor di divorcio. Asta morto di un bestia di cas por haci un tiener desesperá.

Tambe tin cierto tipo di pérdida cu ta ménos obvio. Por ehempel, muda pa un bario nobo ta nificá laga atras un ambiente conocí i amigunan stimá. Asta alcansá un meta hopi anticipá—manera caba scol—por ocasioná e sintimentu di a perde algu. Si bo wak bon, cuminsá un fase nobo di bida ta implicá perde e comodidad i siguridad di ántes. Tambe tin hóbennan cu tin cu soportá un tipo  di malesa crónico. Den circunstancianan asina, e dolor di ta otro for di bo pareunan—kisas asta ser ignorá dor di nan—por laga un tiener sinti como si fuera te na cierto grado e no ta normal mas.

Ta cierto cu hopi hóben ta confrontá tal pérdida sin cai completamente den otro. Nan ta bira tristu, nan ta yora, nan ta pena, nan ta lamentá; pero cu tempu nan ta adaptá. Pero con bini mayoria tiener ta enfrentá e preshonnan di bida cu un abilidad di recuperá fácilmente, miéntras cu otronan ta cai den e gara di depresion? No tin contesta fácil riba esei, ya cu depresion ta un trastorno complicá. Pero por ta cu algun tiener ta mas vulnerabel pa depresion.

E Coneccion Biokímico

Hopi profesional di salú mental ta kere cu un desbalanse biokímico den celebro ta hunga un papel clave den depresion. * Tal bes e desbalanse ta ser transmití genéticamente, pasobra investigadónan a descubrí cu tienernan cu tin un mayor cu ta sufri di depresion tin mas chens di desaroyá e condicion. E buki Lonely, Sad and Angry (Solitario, Tristu i Rabiá) ta bisa: “Mucha deprimí den mayoria caso tin por lo ménos un mayor cu tambe ta sufri di depresion.”

Esaki ta lanta e pregunta: Realmente mucha ta heredá depresion, of nan ta simplemente siña ta deprimí dor di biba cu un mayor cu ta sufri di esei? E ‘pregunta di herencia versus criansa’ ta unu difícil pa contestá, pasobra e celebro, i tambe e hopi otro factornan cu por contribuí na depresion cerca tienernan, ta increiblemente complicá.

Depresion i Ambiente Familiar

Nan a yega di yama depresion un asuntu di famia, i cu bon motibu. Manera a ser mencioná caba, por tin un componente genético cu ta transmití un tendencia pa depresion di un generacion pa otro. Pero e ambiente familiar tambe por ta hunga un rol. Dr. Mark S. Gold ta skirbi: “Muchanan cu nan mayornan ta abusá di nan ta core hopi riesgo di sufri di depresion. Esei ta e caso tambe cerca muchanan cu nan mayornan ta sumamente crítico i ta enfocá riba e mucha su debilidadnan.” Ora mayornan ta demasiado protectivo i ta duna un mucha demasiado cariño esei tambe por causa depresion. Sin embargo, ta interesante cu investigadónan a descubrí cu muchanan ta asta mas incliná na depresion ora mayornan gewoon no ta mustra interes den nan.

Sin embargo, esaki no ta nificá cu tur tiener deprimí ta víctima di mal trabou dje mayornan. Un declaracion indiscriminá asina lo pasa por haltu di un cantidad di otro factor cu por contribuí na e problema. No obstante, den algun caso ambiente familiar ta un parti crucial cu ta afectá e situacion. Dr. David G. Fassler ta skirbi: “Muchanan cu ta biba den un cas caminda tin tension persistente entre e mayornan, ta core un riesgo mas grandi di haña depresion cu muchanan den ambiente ménos problemático. Un motibu ta cu e mayornan na guera cu otro ta asina enbolbí den nan disputanan cu nan ta neglishá e necesidadnan di nan yunan. Un otro motibu ta cu e mayornan hopi bes ta laga nan pleitu drei rond di e muchanan, i esaki ta laga e muchanan sinti nan culpabel, rabiá i cu rencor.”

Esakinan ta solamente algun dje factornan cu por contribuí na depresion cerca tienernan. Tin mas factor. Por ehempel, algun experto ta bisa cu factornan di medio ambiente (manera mal nutricion, cos venenoso i uso di substancianan adictivo) por causa depresion. Otro expertonan ta señalá cu cierto remedinan (manera algun antihistamina i trankilisante) por tin efecto. Ta parce tambe cu foral mucha cu tin un desabilidad pa siña ta mas incliná na depresion, por ta dor cu nan balor propio tin tendencia di mengua ora nan realisá cu nan no por mantené e paso di nan compañeronan di klas.

Sin embargo, sea cual sea e causa, ta vital pa considerá e pregunta: Con por yuda tienernan deprimí?

[Nota]

[Plachinan na página 8, 9]

Tension den famia hopi bes ta un catalisador pa depresion