E Papel Vital di Tatanan

“UN CRECIENTE cantidad di homber hóben kier tin un participacion activo den cria nan yunan. Ochentidos porciento di homber entre 21 pa 39 aña a scoge un orario di trabou cu ta permití nan pasa mas tempu cu nan famia,” segun e korant The Toronto Star di Cánada, relacioná cu un estudio recien di Universidad Harvard. Segun e estudio—den cua nan a entrevistá 1.008 homber i muher mericano di 21 aña pa 65 plus—71 porciento di homber hóben a bisa cu nan “lo a entregá un parti di nan salario pa nan por pasa mas tempu cu nan famia.”

Di con hopi tata kier ta mas enbolbí cu nan yunan? David Blankenhorn, un dje fundadónan di Iniciativa Nacional di Paternidad, cu ta un organisacion cu ta promové paternidad responsabel i dedicá, a remarcá cu den un encuesta di 1994 hací entre 1.600 homber mericano, 50 porciento a bisa cu nan tata tabata emocionalmente ausente durante nan infancia. Hopi dje tatanan djawe no kier pa e patronchi aki ripití.

Tatanan cu ta activamente enbolbí cu nan yunan por ta un influencia saludabel. Refiriendo na un investigacion publicá dor di Departamento Mericano di Salubridad Público i Bienestar Social, The Toronto Star a bisa cu ora tata ta come huntu cu nan yunan, ta sali cu nan i ta yuda nan cu huiswerk, tin “ménos problema di comportacion, nivelnan mas haltu di actitud social i un nivel mas haltu di prestacion escolar cerca mucha i adolesente.”

Esaki ta resaltá un areglo di cria yu cu ta mes práctico awe cu tempu cu el a ser skirbí, mas cu tres mil aña pasá. E Originador di famia a instruí tatanan specíficamente pa ta activamente enbolbí den criamentu di nan yunan. (Efesionan 3:14, 15; 6:4) Tatanan a ser consehá pa inculcá un amor pa Dios den curason di nan yunan i pa papia cu nan tocante Dios su reglanan i mandamentunan. Dios a manda tatanan haci esaki ‘ora nan a sinta den nan cas i ora nan a cana riba caminda i ora nan a bai drumi i ora nan a lanta.’—Deuteronomio 6:7.

Trabou di mayor ta un responsabilidad cu ámbos mayor ta compartí. Bijbel ta spierta muchanan: “Scucha . . . na e disiplina di bo tata, i no bandoná e ley di bo mama.” (Proverbionan 1:8) E papel di tata ta vital. E ta encerá apoyá i respetá e mama i compartí e tareanan di cria yu. Tambe e ta rekerí dedicá tempu na lesa i papia cu e muchanan. Esaki ta satisfacé un necesidad emocional vital cu mucha tin.

No tin duda cu pa un famia ekilibrá, Bijbel ta e fuente mas confiabel di conseho i principionan sano. Un tata cu ta percurá activamente pa e necesidadnan spiritual, emocional i material di su famia ta cumpliendo cu e responsabilidad cu Dios a asign’é.