Reconocé e Síntomanan

“Tristesa ta un emocion normal i sano; depresion ta un malesa. E reto ta pa comprendé i reconocé e diferencia.”—Dr. David G. Fassler.

MESCOS cu mayoria otro trastorno, depresion tin síntomanan bisto. Pero no ta semper fácil pa reconocé e señalnan. Di con? Pasobra casi tur tiener sa sinti nan ‘down’ de bes en cuando, mescos cu adultonan. Kico ta e diferencia entre un simpel caso di sinti bo down i depresion? E tin hopi di haber cu e intensidad i duracion dje condicion.

Intensidad ta encerá e grado cu e sintimentunan negativo ta afligí e hóben. Depresion ta mas grave cu un periodo corticu di desesperacion, i ta un malesa emocional cu ta absorbá tur cos i cu ta stroba seriamente e tiener su abilidad di funcioná normal. Dr. Andrew Slaby ta describí e gravedad dje condicion asin’akí: “Imaginá bo e pió dolor físico cu bo a yega di haña—un wesu kibrá, dolor di djente of dolor di parto—multiplicá esei dies biaha i kita e causa; e ora ei lo bo ta riba caminda pa comprendé e dolor di depresion.”

Duracion ta referí na con largu e condicion di ta sin ánimo ta dura. Segun profesornan clínico Leon Cytryn i Donald H. McKnew, Jr., “si den un siman despues cu un mucha tabata down (sea cual sea e motibu)—of den seis luna despues cu el a sufri loke e ta considerá un pérdida grandi—e no mustra ningun señal di a ser consolá of di ta reanudá un bida normal, e ta core peliger di desaroyá depresion grave.”

Síntomanan Comun

Ta constatá cu un hóben tin depresion solamente despues cu el a desplegá vários síntoma tur dia, pa gran parti di dia, durante por lo ménos dos siman. Si ta pa un periodo relativamente corticu, nan ta yam’é un episodio depresivo. Un forma di depresion mas crónico ta ser constatá ora síntomanan ta persistí pa por lo ménos un aña, cu un máximo di dos luna di alivio. Den ámbos caso, cua ta algun síntoma comun di depresion? *

Cambio di ripiente di beis i comportacion. Di ripiente e tiener cu promé tabata mansu, ta bira agresivo. Comportacion rebelde i asta huimentu for di cas ta comun cerca tienernan deprimí.

 Isolacion social. E adolesente deprimí ta kita pia for di amigunan. Of por ta cu amigunan ta kita pia for dje tiener deprimí, dor cu nan ta ripará un cambio desagradabel den su actitud i comportacion.

Ménos interes den casi tur actividad. E tiener ta abnormalmente pasivo. Hobinan cu te cu poco tempu ei e tabata considerá intrigante, awor e ta haña laf.

Cambio notabel den custumbernan di come. Hopi experto ta di opinion cu trastornonan manera anorexia, bulimia i comementu di mas obsesivo hopi bes ta bai compañá cu depresion (i tin biaha ta ser causá dor di dje).

Problema cu drumimentu. E tiener ta drumi sea muchu tiki of muchu hopi. Tin di nan su patronchi di drumi ta bira tur bruhá: nan ta keda lantá henter anochi i ta drumi henter dia.

Prestacion escolar ta baha. E adolesente deprimí tin problema pa bai bon cu maestronan i su pareunan, i su puntonan ta cuminsá bai atras. Den poco tempu e tiener no tin gana di bai scol mes mas.

Actuacion peligroso of autodestructivo. Comportacion cu ta sumamente riscante por demostrá cu un hóben tin tiki interes pa biba. Mutilacion propio (manera corta nan mes curpa) tambe por ta un síntoma.

Sintimentunan di no ta bal nada of e ta sinti su mes culpabel sin motibu. E tiener ta cuminsá criticá su mes severamente, i ta sinti cu e ta un fracaso total, maske echonan ta indicá lo contrario.

Problemanan sicosomático. Si no por haña ningun causa físico pa problemanan manera dolor di cabes, di lomba, di stoma i cosnan similar, esakinan por ta un indicacion di depresion.

E tiener ta blo pensa riba morto of suicidio. Un obsesion cu temanan di horor i tambe menasa di lo mata su curpa por indicá depresion.—Wak e cuadro aki bou.

Trastorno Bipolar

Algun dje mésun síntomanan aki por ta presente den un otro malesa inexplicabel: trastorno bipolar. Segun dr. Barbara D. Ingersoll i dr. Sam Goldstein, trastorno bipolar (conocí tambe como trastorno maniaco-depresivo) ta “un condicion caracterisá pa episodionan depresivo mesclá cu periodonan den cua bon  beis i energia ta excesivamente haltu, de echo, hopi mas haltu di loke ta nivelnan normal di bon beis.”

E fase di bon beis i energia haltu ta ser yamá mania. Su síntomanan por incluí pensamentunan purá i agitá, papiamentu sinfin i ménos necesidad di soño. De echo, e persona cu ta sufri di esei por pasa dianan largu sin drumi i aparentemente sin perde energia. Un otro síntoma di trastorno bipolar ta comportacion sumamente impulsivo sin tin cunes cu e consecuencianan. “Hopi bes mania ta afectá e forma di pensa, di husga cos i comportacion social na maneranan cu ta causa problema serio i bergwensa,” segun un informe dje Instituto Nacional Mericano di Salú Mental. Cuantu e fase maniaco ta dura? Tin biaha djis un par di dia; den otro casonan, mania por dura vários luna promé cu e ser remplasá dor di su parti contrali: depresion.

E hóbennan cu ta core mas riesgo di desaroyá trastorno bipolar ta entre otro hende cu tin miembro di famia cu e malesa. E bon noticia ta cu tin speransa pa esnan cu ta sufri di dje. E buki The Bipolar Child (E Mucha Bipolar) ta bisa: “Si diagnosticá e malesa aki trempan, i trat’é apropiadamente, e muchanan aki i nan famia por hiba un bida hopi mas stabil.”

Ta importante pa mencioná cu un solo síntoma riba su mes no ta indicá depresion of trastorno bipolar. Mayoria bes, ta un combinacion di síntoma, desplegá atrabes di un periodo di tempu, ta loke ta yuda constatá depresion. Pero tog e pregunta ta keda: Di con e trastorno inexplicabel aki ta afligí tiener?

[Nota]

[Kuadro na página 6]

ORA UN MUCHA KIER MURI

Segun e Centro Mericano pa Combatí i Prevení Enfermedad, den un aña reciente e total di hóben na Merca cu a muri di suicidio tabata mas grandi cu e total combiná di esnan cu a muri di cancer, malesa di curason, AIDS, defectonan di nacementu, atake celebral, pulmonia, griep i malesa crónico di pulmon. Un otro factor perturbador: Tabatin un aumento drástico den suicidionan raportá entre mucha di 10 pa 14 aña di edad.

Por prevení suicidio di tiener? Den algun caso, sí. “Estadísticanan ta mustra cu de facto promé cu hopi suicidio tuma lugá, e hóbennan ta haci intento di suicidio of ta duna indicacionnan of advertencianan verbal,” dr. Kathleen McCoy ta skirbi. “Ora bo tiener duna e mínimo indicacion cu e ta pensa riba suicidio, ta tempu pa presta sumo atencion i posiblemente busca yudansa profesional.”

E porcentahe haltu di depresion cerca tienernan ta enfatisá e necesidad pa mayornan i otro adultonan tuma na serio cualkier indicacion cu un persona hóben kier pone fin na su bida. Dr. Andrew Slaby ta skirbi den su buki No One Saw My Pain (Niun Hende No A Mira Mi Dolor): “Den casi tur caso di suicidio cu mi a repasá, hende a pasa por haltu of no a tuma na serio cosnan cu a indicá ki plan e adolesente tabatin.” Tambe el a skirbi: “Miembronan di famia i amigunan no a realisá con grandi e cambionan cu nan tabata mira ta. Nan a enfocá riba e consecuencianan i no riba e problema fundamental, di manera cu e diagnósis a bira: ‘problema di famia’ of ‘uso di droga’ of ‘anorexia.’ Tin biaha a duna tratamentu médico pa e rabia, e confusion i e mal beis, pero no p’e depresion. E problema fundamental a keda, manera un postema scondí cu ta torturá nan.”

E mensahe ta bon cla: Tuma na serio tur cos cu ta indicá un tendencia di cometé suicidio!

[Plachi na página 7]

Tin biaha, comportacion rebelde ta un señal di depresion

[Plachi na página 7]

Tienernan deprimí hopi bes ta perde interes den actividadnan cu un tempu a fasiná nan