Un Generacion den Peliger

“Te cu dos luna pasá, mi tabata felis i activo. Awor, cada bes cu mi haña chens pa haci algu, mi ta muchu cansá. Mi ta sinti mi hopi infelis i ta rabia of perde pacenshi lihé. Mi no sa con hende por soportá mi. Ta difícil pa bisa di con di ripiente mi ta sinti mi asina malu.”—Paul.

“Mi ta yora i mi tin hopi dolor emocional. Ora mi no ta sinti e dolor ei, mi ta sinti mi manera morto. Mi no ta disfrutá di nada. Mi no ta gusta ta den compania di mi amiganan mas. Mi ta drumi hopi. Mayoria bes mi no por lanta mainta pa bai scol i mi puntonan a bai hopi atras.”—Melanie.

PAUL cu Melanie no ta e úniconan. Investigacionnan ta indicá cu rond di 8 porciento dje adolesentenan na Merca ta sufri di un of otro forma di depresion i cu tur aña rond di 4 porciento ta bira gravemente deprimí. Pero e cifranan aki no ta conta henter e historia, pasobra hopi bes dokternan no ta diagnosticá depresion bon of no ta reconoc’é mes. David G. Fassler, sicólogo di adolesente, ta skirbi: “De echo, despues di a repasá e investigacion cu a tuma lugá cerca mucha i tienernan, mi ta kere cu mas cu un di cada cuater hóben lo pasa den un episodio grave di depresion promé cu nan haci diesocho aña.”

 Efectonan Devastador

Depresion tin efectonan devastador riba tienernan. Sí, expertonan ta kere cu depresion ta hunga un rol importante den problemanan di adolesente, manera trastorno di come, malesanan físico causá dor di problema mental of emocional, problema na scol i uso di substancianan adictivo.

Mas lamentabel ainda ta cu depresion ta ser conectá cu suicidio di tiener. Segun e Instituto Nacional Mericano di Salú Mental, te cu 7 porciento di hóbennan gravemente deprimí ta pone fin na nan bida. * Asina mes esaki no ta revelá e magnitud completo dje problema, ya cu nan ta kere cu pa cada hóben cu pone fin na su bida, hopi mas ta purba haci esei. Pues ta cu bon motibu un raport dje Conseho Carnegie Riba Desaroyo di Adolesente ta declará: “Awendia, descuido den trata problemanan di adolesente ta invitá desaster. Tal negligencia realmente ta pone un generacion den peliger.”

Un Bida Sin Preocupacion?

Tin hende ta haña difícil pa kere cu tienernan en realidad por ta deprimí. Podisé adultonan ta razoná: ‘Pero ta mucha nan ta. Nan tin un bida sin preocupacion, i sigur nan no tin e ansiedadnan di adulto.’ Pero di berdad ta asina? Echo ta cu adolesentenan ta confrontá preshonnan cu ta hopi mas intenso di loke hopi adulto ta realisá. Dr. Daniel Goleman ta declará: “Mundialmente desde comienso di siglo [20] cada generacion sucesivo tabata core un riesgo mas grandi cu nan mayornan di sufri di un depresion grave durante nan bida. I esaki no ta djis un tristesa, sino un falta di ánimo, un desanimacion i un duele di nan mes paralisante, i un desesperacion aplastante. I e episodionan ei ta cuminsá na edadnan mas i mas yong.”

Apesar di esei, hopi mayor kisas ta trece lo siguiente como obhecion: ‘Ata nos a pasa nos adolesencia sin bira deprimí. Di con nos yu sí ta ser aplastá cu sintimentunan negativo?’ Pero adultonan no mester compará nan experencia como adolesente cu esun di hóbennan djawe. I si nos wak bon, cada hende ta otro den e manera cu nan ta mira mundu rond di nan i e manera cu nan ta reaccioná riba dje.

Ademas, tienernan djawe ta confrontá un reto adicional. “Nan ta creciendo den un mundu basta distinto for di esun di nan mayornan su hubentud,” dr. Kathleen McCoy a skirbi den su buki Understanding Your Teenager’s Depression (Comprendé e Depresion di Bo Tiener). Despues di cita vários cambionan importante cu a tuma lugá den último décadanan, dr. McCoy ta concluí: “Tienernan awe ta sinti nan ménos safe, nan tin ménos confiansa i ta pensa ménos di nan mes i tin ménos speransa compará cu nos di un generacion pasá.”

En bista dje echo cu depresion ta prevalecé cerca tienernan, e artículonan cu ta sigui lo trata tres pregunta:

• Cua ta algun síntoma di depresion cerca tiener?

• Kico ta causa e condicion ei?

• Con por yuda tienernan deprimí?

[Nota]