E Punto di Bista Bíblico

Con Tolerante Dios Ta?

“DIOS, AUNKE E TIN E BOLUNTAD PA DEMOSTRÁ SU RABIA I PA DUNA DI CONOCÉ SU PODER, A TOLERÁ CU MASHA GRAN PACENSHI WEANAN DI RABIA TRAHÁ P’E PROPÓSITO DI DESTRUCCION.”—ROMANONAN 9:22.

ATRABES di henter historia Dios a tolerá hopi maldad i malecho serio. Mas cu 3.000 aña pasá, Job a lamentá: “Di con net e malbadonan ta sigui biba, a bira bieu, i tambe a bira superior den rikesa? Nan desendiente ta firmemente establecí cerca nan den nan bista, i nan desendencia dilanti nan wowonan. Nan casnan ta puru pas, liber di miedu, i e bara di Dios no ta riba nan.” (Job 21:7-9) Otro amantenan di husticia, manera profeta Jeremías, tambe a expresá preocupacion pasobra aparentemente Dios a tolerá mal hende.—Jeremías 12:1, 2.

Kico abo ta pensa? E echo cu Dios ta permití maldad ta confundí bo? Bo sa sinti cu Dios mester haci lihé i destruí tur hende malbado mesora? Considerá kico Bijbel ta bisa tocante te con leu Dios su tolerancia ta yega i e motibunan pa esei.

Di Con Dios Ta Tolerante?

Na promé lugá nos tin cu puntra: Di con Dios, kende tin e normanan mas haltu di husticia, ta tolerá maldad mes? (Deuteronomio 32:4; Habacuc 1:13) Esaki kier men cu e ta ignorá maldad? Absolutamente cu no! Considerá e siguiente ilustracion: Imaginá cu tin un ciruhano ta violá principionan básico di higiena i tambe ta causa su pashentnan hopi dolor. Si e tabata traha na un hospital, nan lo no a kit’é unbes for di trabou? Pero por tin circunstancianan cu ta rekerí tolerancia extraordinario. Den un emergencia extremo, por ehempel riba un campo di bataya, lo no ta necesario pa tolerá ciruhanonan traha bou di condicionnan primitivo i peligroso, tal bes usando asta loke normalmente lo a ser considerá ekipo i instrumentonan kirúrgico inferior?

Mescos awe, Dios cu pacenshi ta tolerá hopi cos cu e ta haña totalmente inaceptabel. Aunke e ta odia maldad, temporalmente e ta permitié continuá. E tin bon motibu pa haci esei. Un motibu ta cu esaki ta permití tempu pasa pa resolvé una bes pa semper cuestionnan crucial cu Satanas su rebelion den hofi di Eden a lanta. E cuestionnan aki ta enfocá riba e echo cu si Dios su forma di goberná ta corecto i legítimo. Tambe, dor di soportá maldad cu pacenshi, Dios ta duna esnan enbolbí den maldad tempu i oportunidad pa haci cambio.

Un Dios Misericordioso i cu Pacenshi

Nos mayornan original, Adam cu Eva, a djoin Satanas su rebelion contra Dios. Dios tabatin tur derecho di a destruí nan mesora. En bes di esei, Dios a demostrá di ta misericordioso, di tin pacenshi i amorosamente el a permití nan haña yu. Pero e yunan aki, i henter e famia humano cu a bini for di nan, a nace den un condicion pecaminoso.—Romanonan 5:12; 8:20-22.

Dios su propósito ta pa rescatá hende for di nan condicion lamentabel. (Génesis 3:15)  Pero miéntras tantu, dor cu e ta comprendé con imperfeccion heredá for di Adam ta afectá nos, e ta mustra tremendo pacenshi i misericordia. (Salmo 51:5; 103:13) E ta “abundante den bondad amoroso” i ta cla i dispuesto pa “pordoná den un gran manera.”—Salmo 86:5, 15; Isaías 55:6, 7.

Dios Su Tolerancia Tin Límite

Sin embargo, lo ta irazonabel i falta di amor di parti di Dios si e permití malecho continuá pa semper. Ningun tata amoroso lo keda tolerá maldad for di un yu cu deliberadamente ta sigui causa hopi dolor na otro miembronan di famia. P’esei Dios su pacenshi pa cu picá, semper lo ta balansá cu otro cualidadnan manera amor, sabiduria i husticia. (Éxodo 34:6, 7) Una bes e completá e propósito di su gran pacenshi, lo e stop di tolerá maldad.—Romanonan 9:22.

Apostel Pablo a indicá esaki bon cla. Na un ocasion el a bisa: “Den e generacionnan di pasado [Dios] a permití tur nacion sigui nan mes caminda.” (Echonan 14:16) Na un otro ocasion Pablo a papia dje manera cu “Dios a pasa por haltu di tempu di tal ignorancia” di parti di hende cu a desobedecé su ley i principionan. Anto Pablo a sigui bisa: “Awor [Dios] ta bisando humanidad cu nan tur na tur parti mester repentí.” Di con? “Pasobra el a fiha un dia den cua e tin e propósito di husga e tera habitá den husticia.”—Echonan 17:30, 31.

Beneficiá Awor di Dios Su Tolerancia

Pues un cos ta sigur, niun hende mester asumí cu e por ignorá e leynan di Dios anto despues den un forma indiferente pidi Dios pordon ora e kier scapa e consecuencianan di su accion. (Hosué 24:19) Hopi hende den antiguo Israel a pensa cu nan por a haci esei. Nan no kier a cambia. Nan no a cumpli cu e propósito di Dios su tolerancia i pacenshi. I Dios no a tolerá nan maldad pa semper.—Isaías 1:16-20.

Bijbel ta mustra cu pa evitá Dios su huicio final, un hende tin cu “repentí,” es decir, reconocé dilanti Dios cu e ta sinti duele di su condicion imperfecto i pecaminoso, anto despues sinceramente apartá di maldad. (Echonan 3:19-21) E ora ei, a base di Cristo su sacrificio di rescate, Jehova Dios lo duna pordon. (Echonan 2:38; Efesionan 1:6, 7) Na su debido tempu, Dios lo deshací di tur e efectonan penoso di picá adámico. Lo tin “un shelu nobo i un tera nobo” caminda lo e no tolerá mas “e presencia . . . di cosnan cu ta sclama pa ser destruí.” (Revelacion 21:1-5; Romanonan 9:22, Phillips) Esta un resultado maraviyoso di Dios su tolerancia extraordinario, pero cu no ta sin límite!

[Plachi na página 15]

Dios a permití Adam cu Eva haña desendiente