E Asombroso Mosel Ta Revelá Su Secretonan

KICO ta producí un lijm potente i waterproef, ta funcioná manera un stofzuiger i asta ta siña científiconan tocante reparacion di gene? Esei ta e humilde cocolishi conocí como mosel!

Rond mundu bo ta haña mosel. Tin ta biba den laman. Otronan ta biba den riu i lago di awa dushi. Den nan cocolishi di dos concha tin un curpa suave cu ta cubrí cu un órgano cu nan ta yama mantel i cu parce un cueru. Mescos cu ta e caso cu tur molusco, e mantel ta forma e cocolishi dor di mescla calcio cu kooldioxide, cu ta ser sacá for dje bestia su cuminda i e awa rond di dje. Pa hende igualá e abilidad ei, nos lo tin cu come pidanan di baranca, procesá nan den nos paden, caba saca nan como material di construccion prefabricá cu automáticamente ta traha muraya cu dak! Pero no ta e concha ta loke ta excitá investigadónan; ta e mosel marino su pia.

Lijm Potente di Mosel

Purba kita un mosel for di un baranca, i lo bo descubrí ki un gara increiblemente firme e tin, i esei ta necesario si mosel kier resistí e pik skerpi di un para di laman hambrá of e golpinan sin misericordia di ola di laman. Con e ta logra tene asina duru? Ora e ta scoge un lugá pa biba, e ta saca su pia cu tin forma di lenga for di su cocolishi i ta primié contra un superficie sólido. E tin klir special cu ta saca un mescla líkido di proteina den un gleuf cu tin a lo largu dje pia. E líkido aki rápidamente ta seca bira un hilu elástico fini di mas o ménos dos centimeter. Anto un structura chikitu manera un pata na final dje hilu ta saca un lek di lijm natural, e mosel ta hisa su pia i asina liña di anker number unu ta cla. E hilunan aki ubicá stratégicamente ta forma un troshi cu nan ta yama barba, locual ta ankra e mosel na su cas nobo casi mescos cu ta ankra un tent cu cabuya. Henter e procedura ta tuma tres pa cuater minuut so.—Wak e diagram.

Imaginá bo si hende tabatin un lijm super potente cu no ta venenoso i asina flexibel cu e por penetrá den e huki i nachinan di mas chikitu, i ta pega na cualkier superficie, asta bou di awa. Trahadónan di boto lo ta contentu di tiné pa drecha barcu sin tin cu gasta placa pa pone nan den ‘dry-dock.’ Sacadó di sla lo tin gana di tin un verf realmente waterproef cu ta prevení cu auto ta frusa. Ciruhanonan lo deseá di por tin un lijm safe pa pega wesu kibrá i pa cera herida. Cu e lijm ei dentistanan lo por yena buracu den djente i drecha djente di cua un pida a bula. E lista di posibel uso ta parce sin fin.

Sin embargo, científiconan no tin pensá di usa e mosel mes pa producí e lijm potente aki. Nan lo tin mester di 10.000 cocolishi pa traha djis un gram di lijm. Di manera cu si nan bai coleccioná suficiente mosel pa satisfacé e demanda cu mundu lo tin pa e lijm potente, nan lo caba cu henter e poblacion di mosel, i ya caba hopi especie ta core peliger. Mas bien, investigadónan mericano a isolá i ‘clone’ e genenan di cincu proteina di lijm di mosel, i nan ta a punto di producí nan en masa den laboratorio pa asina industrianan por test nan. Científiconan británico tambe ta haciendo investigacion riba un dje proteinanan dje lijm aki. Sin embargo, tog mosel ta un paso mas dilanti cu hende. Ta mosel so sa instintivamente  cua ta e mescla exacto di proteina necesario pa cada tipo di superficie. Biólogo molecular Frank Roberto a puntra yen di admiracion: “Con hamas lo bo por imitá esei?”

E Stofzuiger

Mosel ta come dor di filtra awa. Den mayoria especie cada mosel ta chupa diariamente vários liter di awa den su curpa anto ta sefta no solamente cuminda i oxígeno, sino tambe elementonan contaminante manera bacteria dañino i kímiconan venenoso. E abilidad aki ta haci mosel un excelente purificadó di awa. Tambe esei ta hacié útil como detector di awa contaminá cu ta spierta bo for di trempan. Por ehempel, nan a pone cientos di mosel den laman rond dje campo di zeta crudo di Ekofisk dilanti costa di Norwega. Cada un par di luna científiconan ta kita nan i midi e cantidad di contaminacion cu tin den nan concha pa wak si e kímiconan cu nan ta basha den laman ta perhudicando bida den laman. Desde 1986, nan a cuminsá usa mosel i oester den e Proyecto Vigilancia di Mosel cu ta operá den lamannan cant’i costa i den binnenwater rond di Norteamérica. Investigadónan por observá cualkier cambio cu tin den e calidad di awa dor di chek e moselnan anualmente pa wak si tin acumulacion di kímico den nan. Nan ta hopi útil!

Un especie di mosel di awa dushi, e mosel zebra strepiá, ta ser considerá hopi bes como un plaga. E mosel aki tamaño di un uña di duim ta nativo di Oost Europa i probablemente a ser introducí accidentalmente na Norteamérica meimei di añanan ’80 di siglo 20, ora cu un barcu transatlántico a descargá su awa di balast. Una bes  e mosel zebra tabata leu for di su enemigunan natural, el a multiplicá rápidamente den e Lagonan Grandi i e riunan conectá cu nan, causando daño balorá na miyones di dollar dor di verstop pipanan cu tabata hala awa i dor di tapa boto, pir i brugnan. Tambe e mosel zebra a core cu algun especie di mosel nativo.

Sin embargo, tin un banda positivo. Dor cu mosel zebra ta esun cu ta filtra awa mihó, den poco tempu nan ta limpia awa trubel di lago dor di come e lima cu ta drif. E ora ei matanan berde bou di awa por florecé atrobe i percurá un hogar pa otro habitantenan di lago. Actualmente científiconan ta explorá e idea pa usa e mosel su abilidad extraordinario di filtra pa sefta bacteria dañino for di fuentenan di awa público i asta pa saca sushi for di awa di riolering na plantanan di purificá awa sushi.

Otro Abilidadnan

Bo tabata sa cu cierto tipo di mosel di awa dushi ta producí perla natural, di cua algun di nan ta hopi balioso? Si bo a yega di usa hoya furá cu parelmoer of a usa boton di perla, por ta masha bon cu nan tabata trahá di mosel. Parelmoer ta lombra i tin color di regenboog, (na spañó nan ta yam’é nácar) i e ta bini dje capa paden di nan concha, i hopi bes ta ser usá den e industria di perla cultivá. Nan ta corta un pida kralchi chikitu di parelmoer for di un mosel i hink’é den un oester. Esaki ta stimulá e oester pa cuminsá tapa e iritacion cu capa di parelmoer i despues di tempu esei ta forma un perla.

Claro cu tin mosel di laman cu nos ta come tambe! Pa siglonan hende a disfrutá di come mosel su carni delicioso i nutritivo den vários manera. Den casnan frances kisas bo ta purba moules marinière, esei ta mosel di stoom den un buyon di biña blancu i shalot (un tipo di siboyo chikitu). Spañónan ta preferá sirbi mosel den e plato colorido paella, miéntras cu belganan ta sirbi nan den un wea grandi cayente huntu cu batata hasá. Cosechá mosel comercialmente ta un negoshi lucrativo di companianan grandi rond mundu, aunke den algun pais europeo ainda bo ta haña empresa di famia cu ta haci esei. Pero un palabra di advertencia: Si bo tin pensá di purba e plato sabroso aki, haci sigur cu bo mosel ta bini di un fuente confiabel, i nunca no piki nan bo mes cant’i awa a ménos cu bo ta absolutamente sigur cu e awa no ta contaminá.

Ken sa, kisas mosel tin mas pa revelá. Al fin i al cabo, nan ta kere cu tin algun dje criaturanan aki ta biba mas cu un siglo! Mosel tin un curason mashá chikitu cu ta pomp sanger transparente, pero e no tin celebro. Pues con bini mosel por haci e cosnan asombroso describí den e artículo aki? Bijbel ta contestá: “Mustra bo preocupacion pa tera, i lo e instruí bo; i e piscánan di laman lo declar’é na bo. Ken entre tur esakinan no sa masha bon cu ta e man di Jehova mes a haci esaki?”—Job 12:8, 9.

[Kuadro/Plachi na página 24]

E Drechadó di Gene

E mosel di laman hundu ta biba den un dje lugánan mas inhospitalario na mundu: e Lomba Mid-Atlántico, caminda buracu di fuentenan di awa cayente ta scupi saca kímiconan sumamente venenoso cu continuamente ta daña e criatura su composicion genético. Sin embargo, enzimanan special ta capacitá e mosel aki pa sigui drecha su DNA. Científiconan ta studiando e enzimanan aki cu e speransa di descubrí con pa drecha DNA humano cu daña dor di malesa of behes.

[Diagram/Plachi na página 23]

E Método di Ankra Nan Mes Cu Hopi Mosel Ta Usa

(Pa e teksto den su formato kompleto, wak e publikashon)

Pia

Stam

Hilunan di barba

Hilu

Placa

[Plachi na página 22]

Mosel ta excelente purificadó di awa

[Rekonosementu]

Ontario Ministry of Natural Resources/Michigan Sea Grant

[Plachinan na página 23]

Mosel berde asiático

Mosel blou

Mosel zebra

Mosel di California

Mosel villosa iris

(E moselnan no ta na tamaño real)

[Rekonosementu]

Berde asiático: Cortesia di Mote Marine Laboratory; zebra: S. van Mechelen/University of Amsterdam/Michigan Sea Grant; mosel villosa iris i abou na man robes: © M. C. Barnhart

[Plachi na página 24]

Paella, un plato spañó colorido, hopi bes ta incluí mosel