E Berdad Tocante Celebracionnan Popular

HEKS i spiritu, pampuna i candela grandi, trick or treat (travesura of mangel). E característicanan exterior di Halloween ta fácil pa identificá. Pero kico tin tras dje celebracion aki i otronan similar? Na ingles Halloween a ser yamá tambe “All Hallows’ Eve” cu ta nificá “Anochi di Tur Santu,” esta, bispu di Dia di Tur Santu. Sin embargo, e nomber supuestamente cristian aki, ta sconde e orígen di cosnan cu no tin nada santu. De echo, eruditonan ta bisa cu e rais di Halloween ta bai bek na un tempu hopi promé cu cristianismo: e era cu e antiguo pueblo céltico a habitá Gran Bretania i Irlanda. Usando un kalender lunar, e pueblo céltico a parti e aña den dos temporada: e lunanan scur di winter i e lunanan briyante di zomer. E anochi di luna yen mas cerca di 1 di november, e pueblo céltico a celebrá e fiesta di Samhain, cu a nificá “Fin di Zomer.” *

 E fiesta aki, cu ta marca principio dje aña nobo céltico, a tuma lugá na fin di zomer, ora cu a recogé cosecha i trece e tounan for di cunucu pa bini bou di dak. E pueblo céltico a kere cu segun cu e dianan tabata bira corticu, tabata necesario pa duna solo vigor atrobe mediante vários rito i sacrificio. Como simbolismo dje aña bieu cu ta muriendo, nan a paga tur candela, i a inaugurá e aña nobo cu candela grandi sagrado for di cua tur miembro di comunidad a cende nan fogon atrobe. Tambe nan a kere cu e candelanan grandi aki—di cua bo por haña un imitacion awe na Gran Bretania durante Anochi di Guy Fawkes i na Brazil den e fiestanan na juni—a core cu mal spiritu.

Nan tabata kere cu riba e dia di fiesta di Samhain, e cortina entre e mundu humano i esun sobrenatural a habri i cu spiritu malu i bon tabata cana rond riba tera. Nan a kere cu alma dje defuntunan a regresá nan cas, i famianan tabata pone cuminda i bebida pa nan bishitantenan spiritu cu e speransa di calma nan i protehá nan mes di mala suerte. Pues, awe ora mucha bistí na spiritu of heks ta bai di cas pa cas exigiendo un treat di Halloween of menasando di haci un travesura, nan ta continuá inconcientemente cu un antiguo ritual di Samhain. Jean Markale ta comentá den su buki Halloween, histoire et traditions (Halloween—Historia i Tradicion): “Dor di ricibí algu den nan man, nan ta establecé, den un sentido simbólico cu nan mes no ta comprendé, un intercambio fraternal entre e mundu visibel i esun invisibel. Ta p’esei e fiestanan di disfras di Halloween . . . ta en realidad ceremonianan sagrado.”

Siendo cu hende a kere cu e anochi ei no tabatin barera entre e region físico i esun spiritual, nan a pensa tambe cu hende por a crusa bai fácilmente den e mundu di spiritu. P’esei Samhain tabata un tempu particularmente faborabel pa decifrá e secretonan di futuro. Nan a usa apel of hazelnoot, ámbos considerá como producto di palunan sagrado, pa wak destino relacioná cu matrimonio, malesa i morto. Por ehempel, nan a pone apel cu marca di nan doño den un tobo cu awa. Un yoncuman of un mucha muher lo por a identificá su futuro casá dor di coge un apel usando su boca so. E práctica aki di wak destino ta existí te awe den e wega di Halloween di gara cu boca apel cu ta drif den awa.

Paranda di buracheria i di pone tur frena un banda tambe tabata un característica di Samhain. Markale ta declará: “Tabata pasa por haltu di balornan tradicional, of tabata  boltu nan. . . . Loke tabata prohibí a ser permití, i loke tabata permití a ser prohibí.” Te awe Halloween ta reflehá e actitud aki, locual sin duda te na cierto grado ta e motibu di su creciente popularidad. Comentando riba esaki The Encyclopedia of Religion ta describí Halloween awendia como “un temporada ora cu adultonan tambe por crusa límitenan cultural i deshací temporalmente di nan identidad dor di entregá na un anochi desenfrená yen di diberticion. Pues, e cualidad céltico fundamental dje fiesta como un anochi anual di escape for di realidad i expectativanan normal, a keda te den siglo 20.”

Rivalidad Religioso

Despues dje scarcedad di batata di siglo 19, imigrantenan irlandes a hiba Halloween i su custumbernan Merca. Ta di einan el a regresá Europa durante e último añanan. Pero no ta tur hende ta considerá e creciente popularidad di Halloween como algu faborabel. Manera e korant Le Monde ta comentá: “Halloween, cu ta cai riba mésun dia cu Dia di Tur Santu i Dia di Tur Defuntu (1 i 2 di november) i cu lo por asta remplasá nan, ta haci doñonan di pacus contentu i ta causa pánico cerca hombernan di iglesia.”

Representantenan di Iglesia na Francia a expresá preocupacion pa e echo cu atencion p’e dianan aki di fiesta católico tradicional a mengua na fabor di Halloween, i ta mira esaki como un señal di cu ‘sociedad ta birando mas pagano.’ Pa Stanislas Lalanne, bocero dje Conferencia di Obispunan Católico di Francia, Halloween ‘ta troce e nificacion di bida i morto.’ E obispu di Nice, Jean Bonfils, a declará cu “e fiesta aki i su ritualnan no tin nada di haci cu nos cultura mediteráneo i cristian,” i el a spierta católiconan pa “e fiesta mas importante di satanistanan di rond mundu.”

Comentando riba e echo cu francesnan a bandoná tradicionnan católico pa tal fiestanan pagano, Hippolyte Simon, obispu di Clermont-Ferrand, ta remarcá: “Ta como si fuera sociedad frances ta en busca di un tipo di religion civil cu lo por remplasá simbolismo cristian.” E ta skirbi: “Na Halloween hende ta imitá e defuntunan, i nan ‘spiritu’ ta bini bek pa spanta nos i menasá nos cu morto. Na contraste, riba Dia di Tur Santu nos ta afirmá cu e defuntunan ta bibu i cu nos tin e promesa di  djoin nan atrobe den e Stad di Dios.”—Vers une France païenne? (Rumbo pa un Francia Pagano?)

Den mésun estilo, Carlo Maria Martini, cardinal di Milan, Italia, a urgi italianonan pa no bandoná dianan di fiesta católico, i a declará cu Halloween “no ta pertenecé den nos tradicion, un tradicion cu tin un inmenso balor i tin cu ser continuá. Dia di Tur Defuntu ta un celebracion cu ta pertenecé na nos historia. Ta e momento cu speransa pa bida eterno ta ser revelá, un momento cu Señor ta laga nos comprendé cu bida tin mas den dje cu loke tin riba tera.” Sin duda hopi católico sincero ta pensa mescos. Sin embargo, e distincion entre Halloween i Dia di Tur Defuntu ta asina cla manera e comentarionan aki kier laga nos kere? Kico un examinacion cuidadoso di e orígen dje dianan di fiesta católico aki ta revelá?

Un Disfras Santu

The Catholic Encyclopedia ta definí Dia di Tur Santu como un fiesta na “onor di tur santu, esnan conocí i esnan desconocí.” Na fin di siglo 2, hende supuestamente cristian a cuminsá onra esnan cu a muri como mártir pa nan fe i, keriendo cu nan tabata den shelu caba cu Cristo, tabata resa na nan pa intercedé na nan fabor. Un conmemoracion regular a cuminsá ora cu dia 13 di mei * aña 609 of 610 E.C., papa Bonifacio IV a dedicá e Panteon—e tempel romano di tur dios—na Maria i na tur mártir. Markale ta comentá: “E diosnan romano a entregá nan lugá pa e santunan dje religion triunfante.”

A cambia e fecha pa november bou di papa Gregorio III (731-741 E.C.), kende a dedicá un capiya di Roma na tur santu i a manda pa onra nan dia 1 di november. Di con precis el a haci esaki, niun hende no sa. Pero por ta debí cu na Inglatera ya caba nan tabata celebrá un dia di fiesta asina riba e fecha aki. The Encyclopedia of Religion ta señalá: “Samhain a keda un fiesta popular entre e pueblo céltico atrabes di henter e cristianisacion di Gran Bretania. Iglesia británico a purba desviá e interes aki cu hende tabatin den custumbernan pagano dor di agregá riba kalender un celebracion cristian riba e mésun fecha cu Samhain. . . . E conmemoracion británico durante Edad Medio di Dia di Tur Santu kisas a impulsá e celebracion universal dje fiesta aki den henter e iglesia cristian.”

Markale ta señalá e creciente influencia cu móniknan irlandes tabatin den henter Europa durante e tempu aki. New Catholic Encyclopedia tambe ta remarcá: “Hopi bes e irlandesnan a asigná e promé dia di luna na fiestanan importante, i como cu 1 di november tabata tambe comienso dje winter céltico, e tabata un fecha apropiado pa un fiesta di tur santu.” Finalmente na aña 835 E.C., papa Gregorio IV a haci e fiesta aki universal.

 Pa loke ta Dia di Tur Defuntu, riba cua ta recitá oracion pa yuda almanan den purgatorio alcansá gloria celestial, e dia di fiesta aki a ser fihá riba 2 di november durante siglo 11 dor dje móniknan di Cluny, na Francia. Aunke Dia di Tur Defuntu ta aparentemente un dia di fiesta católico, ta bisto cu den mente dje pueblo comun tabatin un confusion. New Catholic Encyclopedia ta remarcá cu “atrabes di henter Edad Medio tabatin e creencia popular cu alma den purgatorio por a aparecé riba e dia aki como lus cu ta dual hende (espehismo), como heks, sapu, etc.”

Incapas pa eliminá creencianan pagano for di curason di su tou, iglesia simplemente a sconde nan tras di un disfras “cristian.” Resaltando e echo aki, The Encyclopedia of Religion ta bisa: “E fiesta cristian, e Fiesta di Tur Santu, ta conmemorá santunan conocí i desconocí dje religion cristian mescos cu Samhain a reconocé i paga tributo na diosnan céltico.”

Abo i Celebracionnan Popular

Te con leu bo mester preocupá cu e pasado pagano di Halloween i celebracionnan similar? Al fin i al cabo, den mente di mayoria hende, Halloween ta djis un tempu pa disfrasá i pasa pret. Pero bo no ta di acuerdo cu ta importante pa mayornan haci sigur cu sea cual sea e forma di recreo cu nan yunan ta sigui, e mester ta sano i no perhudicial?

Nan a puntra un inspector di scol di Francia cu tin mas cu 20 aña di experencia den duna les, tocante e influencia di Halloween riba mucha chikitu. El a comentá: “Mi ta preocupá cu e baimentu di cas pa cas menasando adultonan pa nan por haña mangel, por tin consecuencianan negativo di largu alcanse riba mucha. Esei por promové un personalidad egoista. Nan ta siña cu dor di pone preshon, dor di exigí cu menasa, dor di spanta otro hende, nan por haña loke nan kier.” P’esei mayornan tin cu puntra nan mes: ‘Ki “les” mi yunan lo siña dor di celebrá e dia di fiesta aki?’

No ta un sorpresa anto cu hopi famia ta haña cu e asuntu di cumpli cu demanda dje muchanan pa mangel cu disfras ta algu costoso. Robert Rochefort, director general di Francia su Centro Investigativo pa Estudio i Observacion di Condicionnan di Bida, ta remarcá: “Halloween . . . no ta un dia di fiesta, e ta mercadeo di un evento.” Halloween ta yena e pausa temporal cu tin den hacimentu di cómpras promé cu Pascu. Cu otro palabra, e ta simplemente un cos mas pa preshoná  hende pa gasta placa, anto placa cu den hopi caso nan no por permití nan mes di gasta. Abo realmente tin cu sigui e mayoria den esaki?

Sin embargo, di mayor preocupacion pa cristiannan ta e echo cu Halloween i celebracionnan similar ta ankrá den paganismo. Apostel Pablo a skirbi: “Mi no kier pa boso tin komunion cu demoño. Boso no por bebe e kopa di Señor i e kopa di demoñonan.” (1 Corintionan 10:20-22, Beibel Santu) Tambe el a puntra: “Ki kompañerismo hustisia tin ku inhustisia, i ki komunion lus tin ku skuridat? Of ki harmonia Cristo tin ku Belial, òf kiko un kreyente tin komun ku un inkrédulo?” (2 Corintionan 6:14-16, Beibel Santu) Pues Bijbel ta condená henter e idea di bisti un práctica pagano un disfras cristian!

Tambe Bijbel ta spierta contra e práctica di spiritismo. (Deuteronomio 18:10-12) Aunke ta cierto cu e gran mayoria di hende cu ta celebrá Halloween lo pretendé di ta desaprobá prácticanan satánico, no obstante, nos mester ta conciente dje echo cu históricamente e dia di fiesta aki tin laso estrecho cu ocultismo. Pues e por sirbi como un porta cu ta hiba na spiritismo, foral pa hóbennan cu fácilmente ta ser impresioná. Simplemente no tin lugá den adoracion cristian pa rito i tradicionnan pagano manchá cu spiritismo; nan ta leu di ta inofensivo.

Por último tin e echo cu tantu Halloween, Dia di Tur Santu como Dia di Tur Defuntu ta basá riba e creencianan cu e defuntunan ta sufri of cu nan di un manera of otro por causa daño na hende bibu. Sin embargo, Bijbel ta mustra bon cla cu tal creencia no ta berdad, bisando: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” (Eclesiástes 9:5) Pa e motibu ei Bijbel ta consehá: “Tur loke bo man haña pa haci, hacié cu bo forsa mes, pasobra no tin trabou ni formacion di proyecto ni conocimentu ni sabiduria den Sheol [e graf comun di humanidad], e lugá unda bo ta bayendo.” (Eclesiástes 9:10) Siendo cu e mortonan ta inconciente i pues incapas pa causa daño na otro hende of di ta sufriendo, nos no tin nada di teme for di nan. Ademas, oracion pa yuda nan no tin sentido. Esaki kier men cu no tin speransa pa nos sernan kerí defuntu? No. Bijbel ta sigurá nos cu “lo bai tin un resureccion di tantu e hustunan como e inhustunan.”—Echonan 24:15. *

Cu conocimentu ta bini e libertad pa scoge. Nos no por verwagt di tuma decisionnan inteligente si nos no sa tur echo. Despues di a considerá e echonan presentá den e seri di artículo aki, kico lo bo dicidí?

[Nota]

[Komentario na página 6]

Halloween ta continuá cu e mentira cu e mortonan en realidad ta na bida

[Komentario na página 7]

Ritonan céltico di wak destino a sobrebibí den weganan di Halloween

[Plachi na página 6]

Halloween ta originá di un fiesta céltico, probablemente e adoracion di Lug, dios di lus

[Plachi na página 6]

Santana cu crus céltico di antigwedad

[Plachi na página 6, 7]

Garando apel cu boca ta un dje weganan di orígen céltico

[Rekonosementu]

For dje revista: The Delineator October 1911

[Plachi na página 8]

Papa Bonifacio IV a dedicá e Panteon pagano romano na Maria i na tur mártir di iglesia

[Plachinan na página 9]

Ki influencia Halloween tin riba bo yunan?

[Plachi na página 10]

Cristiannan berdadero ta disfrutá di recreo sano den famia