Un Stad Africano Caminda Oost Ta Topa West

DJE CORESPONSAL DI SPIERTA! NA SUR ÁFRICA

ESTA un bista colorido bo ta haña ora bo ta cana den un caya di Durban! Lo bo nota cu hopi hende a adoptá e estilo di bisti occidental, foral e hóbennan. Pero tuma nota tambe di señoranan zulu di mas edad cu nan bistínan largu i modesto i nan cabes mará cu lensu colorido. Tambe tin señoranan indio bistí na sari of shimis cu carson largu estilo punjabi. Segun cu bo ta yega cantu di laman, probablemente lo bo mira hombernan zulu den nan trahenan elaborá ta hala riksha (taxi di baiskel). Durban di berdad ta un stad africano único, caminda cultura di Oost ta topa cultura di West. Kico ta e historia dje stad fasinante aki?

E stad surafricano Durban tin ménos di dos siglo habitá. Rond di 40 colonisadó di desendencia europeo a establecé nan mes einan na aña 1824. N’e tempu ei e centro dje poderoso reino zulu bou di mando di nan rey guerero, Shaka, tabata ubicá na nort di Durban. Dos década despues, Durban i e region den interior rond di dje a ser anexá dor di Gran Bretania. Durante siglo 19 tabatin vários guera entre e colonisadónan nobo i e pueblo zulu.

Miéntras tantu, e colonisadónan ingles a descubrí cu caña di sucu a crece bon den e regionnan cant’i costa. Pa traha den nan plantacionnan di sucu nan a haci areglo pa trece trahadó for di India, cu e tempu ei tabata un otro colonia británico. Entre 1860 i 1911, mas cu 150.000 indio a bini Durban. Como resultado, awe e área metropolitano di Durban tin un poblacion di mas cu tres miyon persona, cu ta consistí  di hende for di tres parti distinto di mundu: nativonan zulu, asiáticonan for di India i hende di desendencia británico i di West Europa.

E stad tin otro rasgonan interesante. Manera bo por mira riba e potret adhunto, e tin un haf natural cu ta ser protehá contra océano Indio dor di un repi largu di tera cu yama Bluff. E punto di orientacion atractivo aki ta mas cu 90 meter haltu i ta cubrí cu mata. Tur dia barcunan grandi ta drenta den e haf cu proteccion natural aki. E buki Discovery Guide to Southern Africa ta splica cu Durban tin “e haf mas grandi i mas druk na África, cu ta figurá na di nuebe lugá na mundu.” Turista ta ser atraé na Durban su bunita playanan i ta gusta su laman cayente. Tin lugá ideal pa surf, i landadónan por keda trankil pasobra e netnan contra tribon ta ser bon mantené i ta percurá siguridad.

Amantenan di Bijbel tin un motibu adicional pa ta interesá den e stad. Na aña 1910 Studiantenan di Bijbel, manera Testigonan di Jehova tabata conocí e tempu ei, a habri un oficina di sucursal aki. Anto na april 1914, nan a tene na Durban e promé congreso di Studiantenan di Bijbel na África. Tabatin un 50 hende presente, incluso delegadonan for di Sur África. Na e congreso histórico ei, 16 adoradó nobo a bautisá. Vários di esnan presente tabata cristiannan ungí cu a resultá fiel ta na morto, incluso William W. Johnston, kende tabata e promé persona na encargo di un oficina di sucursal na África.

Testigonan di Jehova a organisá hopi congreso mas na Durban desde 1914. Na december 2000, rond di 14.848 persona a asistí na dos congreso “Hacidónan dje Palabra di Dios” cu nan a tene den e stad, i 278 a bautisá. Considerá un dje hopi famianan indio cu tabata presente. Dies aña pasá e tata, Alan, a ser introducí n’e berdad bíblico dor di su yu muher, Somashini. Alan tabata recuperando di alcoholismo i tabata busca un propósito den bida. Somashini, cu e tempu ei tabatin tres aña so, a trece un buki cu el a haña den cas di un bisiña pa su tata. E título Berdadero paz i siguridad—Con bo por hayé?, a atraé Alan mesora. El a gusta loke el a lesa i a cuminsá asociá cu Testigonan di Jehova. Dor di loke el a siña den Bijbel, Alan a legalisá su matrimonio. No a tarda hopi cu su casá, Rani, a interesá i e tambe a cuminsá asistí n’e reunionnan di Testigonan di Jehova. N’e tempu ei e pareha tabata biba cerca e mayornan di Rani, kendenan tabata pertenecé na un dje iglesianan di cristiandad. E mayornan a oponé e pareha hóben su religion nobo i a duna nan un ultimátum: “Sea boso ta legumai e Testigonan of sali for di nos cas!”

Alan cu Rani a dicidí di bai, aunke tabata difícil pa nan haña cas. Amigunan Testigo di Jehova a yuda nan haña un lugá apropiado pa biba. Na 1992, Alan cu Rani a bautisá como Testigo di Jehova. Nan a sigui haci progreso, i awe Alan ta sirbi como anciano den e congregacion cristian.

Den e área metropolitano di Durban tin mas cu 50 congregacion di Testigonan di Jehova. Mayoria di nan ta consistí di zulu. Sin embargo, tin congregacion, foral esnan mas cerca di centro di ciudad, cu ta consistí di zulu, indio i hende di desendencia europeo. Si bo bishitá un dje reunionnan aki, lo bo mira mas cu djis cultura di Oost ta topa cultura di West. Kisas un Testigo africano elegantemente bistí lo ta presidí of un Testigo indio of unu di desendencia europeo. Pero un cos ta sigur: Den e auditorio lo bo mira prueba bibu cu Bijbel tin e poder di uni hende di tur nacion den un amistad caluroso i duradero.

 [Plachi na página 26]

Reunionnan di congregacion ta trece hende di tur rasa huntu

[Plachi na página 26]

Alan, Rani i nan yunan

[Plachi na página 26]

Stadhuis di Durban

[Rekonosementu pa Potrèt na página 25]

Potretnan: Cortesia di Gonsul Pillay