E Punto di Bista Bíblico

E Manera Cu Dios Ta Usa Su Poder Ta Hustificá?

USO di violencia pa mata tabata un característica constant di historia humano. Segun un cálculo, probablemente 170.000.000 hende a ser asesiná den siglo 20 dor di nan propio organisacion político. Manera Bijbel ta señalá corectamente, consistentemente hende a dominá hende pa nan daño.—Eclesiástes 8:9.

En bista cu hende a usa nan poder di un manera violento, algun hende kisas ta cuestioná e echo cu Dios ta usa su poder pa destruí su enemigunan. No ta Dios a duna ordu na e hudiunan pa nan atacá i mata e habitantenan cananeo di e Tera Primintí? (Deuteronomio 20:16, 17) I no ta Dios mes a bisa cu lo e destruí i pone un fin na tur gobiernu cu ta contra dje? (Daniel 2:44) Algun hende sincero a puntra nan mes si e manera cu Dios ta usa su poder ta semper hustificá.

Abusu di Poder

Ta vital pa comprendé cu un elemento importante di gobernacion ta e abilidad di usa poder. Un gobiernu cu no por pone hende obedecé su decretonan, de facto ta incapas. Por ehempel, apesar cu tin informenan di abusu di parti di polis, cuantu hende lo ta dispuesto pa keda sin e proteccion cu cuerpo policial ta percurá? I ken normalmente lo argumentá cu un sistema hudicial, cu tin poder pa pone hende obedecé, no ta necesario?

Mohandas Gandhi kende tabata famoso p’e echo cu el a odia violencia, a yega di bisa: “Suponé cu un homber ta bira loco i cu furia ta cuminsá mata cu spada ken cu e topa den su caminda, i niun hende no ta tribi di capturá e homber aki bibu. E comunidad lo keda gradicidu na e persona cu mata e homber loco aki mesora. Tambe nan lo sigui consider’é como un homber bondadoso.” Sí, asta Gandhi a mira cu bou di cierto circunstancia ta necesario pa usa poder.

 Ta obvio cu e abilidad di usa poder ta un elemento esencial den cualkier sociedad stabil. Generalmente, ora hende ta condená uso di poder, loke nan ta criticá eigenlijk ta abusu di poder.—Eclesiástes 4:1-3.

“Tur Su Camindanan Ta Husticia”

Den historia no tin ningun evidencia cu Dios a yega di abusá di su poder. E no ta usa su poder di un manera irazonabel ora di goberná. E kier pa nos ador’é motivá dor di amor. (1 Juan 4:18, 19) De facto, Dios no ta usa forsa si tin un manera hustu pa evit’é. (Jeremías 18:7, 8; 26:3, 13; Ezekiel 18:32; 33:11) I ora e ta scoge pa usa poder, semper e ta duna un abundancia di spiertamentu pa ken cu kier por dal pasonan pa rectificá asuntu. (Ámos 3:7; Mateo 24:14) Un Dios irazonabel i cruel ta haci e cosnan aki?

E manera cu Dios ta usa su poder no tin nada en comun cu e manera inhustificá cu hende ta usa nan poder. Moises a bisa tocante Jehova: “Tur su camindanan ta husticia. Un Dios di fieldad, cu ken no tin inhusticia.” (Deuteronomio 32:4) Distinto for dje gobernacionnan di dictadornan humano, den caso di e gobiernu di Dios no ta esun cu tin mas poder ta manda. Den tur caso el a usa poder na armonia cu su amor, sabiduria i husticia perfecto.—Salmo 111:2, 3, 7; Mateo 23:37.

Por ehempel, ta despues di hopi aña di spiertamentu, Dios a destruí e malbadonan den e Diluvio. Ken cu a probechá dje proteccion cu e arca a duna, a sobrebibí. Ocho persona so a probechá. (1 Pedro 3:19, 20; 2 Pedro 2:5) Den tempu di Hosué, Israel a ehecutá e huicio di Dios riba e cananeonan corupto, un huicio cu Dios a dicta mas cu 400 aña promé! (Génesis 15:13-21) Den tur e tempu ei, e cananeonan no por a keda sin mira evidencia poderoso cu e israelitanan tabata Dios su pueblo scogí. (Hosué 2:9-21; 9:24-27) Sin embargo, fuera dje gabaonitanan, ningun nacion cananeo no a busca misericordia of probechá dje oportunidad pa busca pas. En bes di esei, e cananeonan a preferá di haci nan curason duru contra Dios.—Hosué 11:19, 20.

Dios Tin e Autoridad

Ora nos ta purba comprendé e manera cu Dios ta usa su poder, nos tin cu cuminsá cu un berdad básico tocante nos posicion dilanti Dios. Profeta Isaías a reconocé humildemente: “Nos ta e klei, i abo ta nos Trahador di Pochi.” (Isaías 64:8) Ta obvio cu como e Creador di universo, Dios por usa su poder den e manera cu e kier. Reconociendo e autoridad di Dios, nos por bisa mescos cu Sálomon: “E palabra dje rey ta poder di control; ken por bis’é: ‘Kico bo ta haci?’”—Eclesiástes 8:4; Romanonan 9:20, 21.

Dor cu Dios tin e posicion di Creador omnipotente, e tin derecho di duna i kita bida terenal. Sí, hende no ta capas ni no tin e derecho di cuestioná e manera cu Dios ta usa su poder. Hende tin cu siña adaptá nan na e manera di pensa di Dios. Jehova a puntra: “No ta boso camindanan ta esnan cu no ta bon ahustá?”—Ezekiel 18:29; Isaías 45:9.

Jehova su sentido di husticia i su amor pa hende ta loke lo motiv’é pa kita for di riba tera hende cu ta abusá di nan poder i ta usa violencia pa trapa riba derecho di otronan. E acto di poder aki lo establecé condicionnan ideal riba tera pa tur hende cu kier pas i cu ta stima pas. (Salmo 37:10, 11; Nahum 1:9) Pues e gobernacion di Dios lo ta hustificá i vindicá pa semper.—Revelacion 22:12-15.