Hóbennan Sa Puntra . . .

Kico Malu Tin den Tuma Vengansa?

“El a insultá mi.”—Conneel di 15 aña di edad, encarcelá pa asesinato.

Andrew di 14 aña di edad a mata un maestra na un fiesta di scol. El a bisa cu e ta odia maestronan i su mayornan i cu e ta rabiá cu e mucha muhernan pasobra nan ta rechas’é.

E REVISTA Time ta yama e fenómeno aki “un tendencia mortal.” Un hóben rabiá ta drenta su scol cu un arma mortal scondí i ta basha bala riba su compañeronan di scol i e maestronan. E tipo di incidentenan trágico ei a cuminsá parce asina normal na Merca cu un red di noticia na television a describí e tendencia aki como “un explosion di violencia.”

Afortunadamente, te ainda tiramentu na scol ta algu cu ta sosodé relativamente poco. Asina mes, e crímennan mas recien causá pa rabia ta mustra precis cuantu rabia algun hóben realmente tin. Kico ta provocá e atakenan di rabia ei? Evidentemente algun di e hóbennan aki a rabia pa motibu di un inhusticia of abusu di poder cu nan a experenciá na man di hende cu tin autoridad. Ta obvio cu otronan a rabia dor cu continuamente nan pareunan ta tenta nan. Dor cu nan tabata tenta un mucha homber di 12 aña pasobra e ta gordo, el a tira su compañero di klas i despues a tira su mes.

Mester admití sí cu mayoria hóben probablemente nunca ta pensa seriamente di participá den violencia extremo asina. Sin embargo, no ta fácil pa lucha contra e sintimentu di angustia i dolor cu ta lanta ora bo ta víctima di racismo, abusu of tentamentu cruel. Refleccionando riba tempu cu e tabata bai scol, Ben ta bisa: “Semper mi tabata mas corticu cu mayoria mucha di mi edad. I dor cu mi cabes tabata completamente feitá, constantemente otro muchanan tabata tenta mi i dal mi den mi cabes. Esaki tabata pone mi rabia mashá. Loke a haci e asuntu pió ta cu ora mi a bai busca yudansa cerca hende cu tin autoridad, nan tabata ignorá mi. Esei a haci mi furioso!” Ben ta agregá: “E echo cu mi no por a haña un revolver ta e único motibu pakico mi no a tira e hendenan aki.”

Con bo mester considerá hóbennan cu ta busca manera pa paga esnan cu a ofendé nan bek? I kico bo mester haci si bo mes ta víctima di maltrato? Pa un contesta, considerá loke e Palabra di Dios tin di bisa.

Dominio Propio—Un Señal di Fortalesa!

Maltrato i inhusticia sigur no ta nada nobo. Un escritor di Bijbel a duna e conseho aki: “Laga rabia para i bandoná furia; no mustra bo mes excitá solamente pa haci malu.” (Salmo  37:8) Demasiado biaha, furia ta encerá un perdementu di dominio propio i e ta ser expresá sin tene cuenta cu e consecuencianan. Permití bo mes bira “excitá” por resultá den un explosion di furia! Den kico esaki por resultá?

Considerá e ehempel bíblico di Cain cu Abel. “Cain a yena cu hopi rabia” contra su ruman Abel. E resultado tabata cu “miéntras cu nan tabata den e cunucu, Cain a procedé na atacá Abel su ruman i mat’é.” (Génesis 4:5, 8) Un otro caso di furia descontrolá tabatin di haber cu Rey Saul. Debí cu e tabata yalurs riba e hazañanan militar dje hóben David, realmente el a tira su lansa no riba David so, sino tambe riba su propio yu homber Jonatan!—1 Samuel 18:11; 19:10; 20:30-34.

Ta cierto cu tin bes un persona tin bon motibu pa ta rabiá. Pero asta den un caso asina, indignacion hustificá por resultá den maldad si e no ser controlá. Por ehempel, Simeon cu Levi sigur tabatin derecho di ta rabiá cu Síkem ora nan a haña sa cu el a violá nan ruman muher Dina. Pero en bes di keda trankil, nan a provocá rabia violento, manera nan palabranan despues a mustra: “Un hende tin mag di trata nos ruman muher como prostituta?” (Génesis 34:31) I ora nan rabia a yega na punto di explotá, ‘cada un a coge su spada i a bai sin cu niun hende a sospechá nada na e stad i a mata tur homber’ cu tabata biba den e pueblo di Síkem. Nan furia tabata contagioso pasobra “e otro yu hombernan di Jacob” a djoin nan den e atake pa asesiná tur homber. (Génesis 34:25-27) Añanan despues, ainda Jacob, tata di Simeon i Levi, a condená nan rabia descontrolá.—Génesis 49:5-7.

Esaki ta siña nos un punto importante: Rabia descontrolá ta un señal no di fortalesa, sino di debilidad. Proverbionan 16:32 ta bisa: “Esun cu ta tarda pa rabia ta mihó cu un homber poderoso, i esun cu ta controlá su spiritu ta mihó cu esun cu ta capturá un stad.”

E Bobedad di Tuma Vengansa

P’esei, e Scritura ta duna nos e conseho aki: “No paga malu cu malu na ningun hende. . . . No venga boso mes.” (Romanonan 12:17, 19) Tuma vengansa ta malu sea cu e ta den forma di violencia físico of djis palabranan cruel. Na mésun tempu, tal vengansa simplemente no ta práctico i ta un bobedad. Pasobra generalmente violencia ta hiba na mas violencia. (Mateo 26:52) I hopi bes palabra cruel ta resultá den mas palabra cruel. Corda tambe cu hopi bes rabia no tin un motibu válido. Por ehempel, con bo por sa sigur cu e persona cu a ofendé bo, a hacié pa malu? Por ta cu simplemente e persona ei a actua sin pensa? I asta si tin malicia den e asuntu, tuma vengansa ta e mihó solucion den e situacion aki?

Considerá loke Beibel Santu ta bisa na Eclesiástes 7:21 i 22: “No tuma na serio tur palabra ku wòrdu papiá, pa bo no tende bo sirbidó maldishonábo. Pasobra den bo kurason bo sa ku hopi biaha abo mes tambe a maldishoná otro hende.” Sí, no ta dushi cu hende ta papia malu di bo. Pero Bijbel ta reconocé cu esei ta parti di bida. No ta cierto cu probablemente bo a yega di bisa cosnan tocante otro hende cu lo tabata mihó pa no papia? Pues, pakico bo ta cla pa rabia of cunsumí ora un persona bisa algu malu di bo? Ora hende ta tenta bo hopi bes e mihó cos pa haci ta simplemente ignor’é.

Asina tambe, ta un bobedad pa core rabia of cunsumí ora bo ta pensa cu hende a trata bo malu. Un tiener cu yama David ta corda kico a pasa ora e tabata hunga basketball huntu cu algun compañero cristian. “Un hende di e otro tim a dal mi cu bala,” David ta bisa. Concluyendo mesora cu ta pa malu el a hacié, David a tuma vengansa i a manda e bala bek riba e otro hungadó. “Mi tabata hopi rabiá,” David ta admití. Pero promé cu cosnan a bira pió, David a haci oracion na Jehova. El a bisa den su mes: ‘Ta cu mi ruman cristian mi kier bringa? No por!’ Despues nan tur dos a pidi otro despensa.

Den situacionnan asina, ta bon pa corda riba e ehempel di Jesucristo. “Ora nan a zundr’é, e no a zundra bek. Ora e tabata sufri, e no a menasá.” (1 Pedro 2:23) Sí, ora bo ta bou di tension, en bes di reaccioná, haci oracion na  Dios i pidié pa yuda bo mantené dominio propio. Di un manera generoso ‘lo e duna spiritu santu na esnan cu ta pidié.’ (Lucas 11:13) En bes di tuma vengansa ora un hende ofendé bo, kisas e mihó cos pa haci ta acercá e persona i papia tocante e asuntu. (Mateo 5:23, 24) Of si bo ta víctima di un forma serio di intimidacion continuo, kisas na man di un abusador na scol, no busca confrontacion cu lo por bira violento. En bes di esei, bo tin cu tuma medidanan apropiado pa protehá bo mes. *

Un Hóben Cu A Rechasá Rabia

Hopi hóben a aplicá e consehonan bíblico aki cu bon resultado. Por ehempel, na un edad hopi yong nan a pone Catrina pa adopcion. E ta bisa: “Mi tabatin problema cu rabia pasobra mi no por a comprendé di con mi mama cu a haña mi a bandoná mi. Pues mi tabata baha mi rabia riba mi mama di criansa. Pa un of otro motibu bobo, mi tabata kere cu si mi ofend’é, realmente mi tabata tuma vengansa di mi mama cu a haña mi. P’esei mi tabata haci tur sorto di cos: zundra, sapatiá i haña atakenan di beis. Dal porta duru tabata mi faborito. Tambe mi tabata bisa: ‘Mi tin rabia riba bo!’ Tur esei pasobra mi tabata rabiá. Ora mi wak atras, mi no por kere cu mi tabata haci e cosnan ei.”

Kico a yuda Catrina controlá su rabia? E ta respondé: “Lesa Bijbel! Esaki ta hopi importante pasobra Jehova sa con nos ta sinti.” Tambe Catrina a haña consuelo ora e cu su famia a lesa artículonan di Spierta! cu a trata cu precis e situacion di su famia. * “Nos tur por a sinta huntu i comprendé loke otro ta sinti,” e ta corda.

Bo tambe por siña controlá bo sintimentunan di rabia. Ora hende ta tenta bo, haci abusu di bo of maltratá bo, corda e palabranan di Beibel Santu na Salmo 4:4: “Rabia, ma no haci piká.” E palabranan ei por yuda bo evitá cu rabia destructivo ta dominá bo.

[Nota]

[Plachi na página 15]

Ora hende ta tenta bo, hopi bes e mihó cos pa haci ta simplemente ignor’é