Observando Mundu

Crímen Económico Ta Aumentando na Europa

“Desde 1998, crímen económico a bira mas pió,” segun un informe aceptá dor di parlamentarionan dje Conseho di Europa. Kico ta crímen económico? E informe for di e Comité di Asuntunan i Desaroyo Económico ta mencioná “traficacion di hende, droga ilegal i otro contrabanda, falsificacion, daño na medio ambiente, crímen via Internet, fraude di belasting, labamentu di placa, corupcion i mal uso di influencia i poder pa haci negoshi.” Dor cu nan a ripará cu e clase di crímen aki ta hañando mas coneccion cu política, e informe ta advertí: “Por ta masha bon cu e boluntad di Europa pa bringa contra crímen económico lo mengua i cu nan lo perde e bataya contra dje.” Autor dje informe, Vera Squarcialupi di Italia, a bisa: “E forsa di ley, esta e poder vital di un sociedad civilisá, lo ta e promé cu ta sufri.”

Sobrebibiendo Accidente di Avion

E korant di Cánada National Post ta declará: “Mas cu 95% di pasahero ta sobrebibí accidente di avion comercial.” Segun Post, un estudio di Hunta Nacional di Siguridad den Transporte di Merca a descubrí cu mayoria pasahero ta sobrebibí asta “accidentenan serio” cu ta causa daño considerabel n’e avion. Art LaFlamme, director general di aviacion civil na e departamento di Transporte na Cánada, ta splica: “Mayoria accidente ta tuma lugá ora e avion ta baha of subi. E clase di accidentenan aki no ta haña hopi publicidad i mayoria di nan tin hopi sobrebibiente. P’esei, nos ta pone hopi énfasis riba duna instruccion tocante siguridad.” Hende cu ta biaha frecuentemente tin tendencia di no presta atencion na e instruccionnan di siguridad. Pero manera un bocero di aerolinea a bisa: “Ta masha importante pa hende presta atencion. Den caso di un emergencia, nan bida lo dependé di e instruccionnan aki.”

“Tecno-Stres”

E revista di Cánada Maclean ta informá cu “tecno-stres”—e frustracion cu ta bini dor dje preshon pa usa tecnologia nobo—ta aumentando. E causanan cu e análisis ta señalá na dje ta varia di “e proceso sin final di siña con pa usa tecnologianan nobo te n’e distincion vago cu ta existí entre trabou i bida na cas debí na inovacionnan manera e-mail, sigui-mi (‘call-forwarding’) i telefon celular.” Con bo por trata cu e problema aki? Expertonan ta recomendá pa pone límite. Determiná si uso di un aparato nobo di berdad lo simplificá bo bida, of si esei ta hacié mas complicá. Corda cu bo mester invertí tempu pa siña un tecnologia nobo suficiente bon pa bo por probechá di tur su beneficionan. “Apartá tempu tur dia pa paga e aparato,” i dedicá tempu na otro prioridadnan. “Hende ta cometé un fayo fundamental ora nan ta cuminsá nan dia habriendo nan e-mail, en bes di pega na un plan di accion,” e experto di productividad di Vancouver, Dan Stamp ta remarcá. “Nan ta dedicá e mihó ora i mei di dia na cosnan completamente inesencial.”

Muchanan Ta Skirbi Nan Propio Buki

E korant Zambia Daily Mail ta informá cu den un esfuerso pa promové lesamentu, ta animá muchanan di scol na Zambia pa skirbi nan propio bukinan corticu i pinta plachi den nan. “Mayoria biblioteca na scol tin literatura riba cosnan i situacionnan cu ta completamente desconocí pa e muchanan di Zambia,” segun un informe di gobiernu. “E echo cu muchanan ta skirbi nan propio bukinan tin e bentaha cu e bukinan ta na nan nivel i ta trata tópico cu ta interesá nan.” Kisas algun dje cuentanan por bira parti dje biblioteca na scol of di klas, ser lesá na radio of asta ser publicá. Daily Mail ta remarcá: “Esaki ta un manera masha barata pa acumulá literatura ya cu ta pen cu blachi so ta necesario. Tambe e ta un manera pa usa un recurso cu tin na abundancia (alumno) pa crea un recurso cu ta scars i caru (buki).”

E Podernan Curativo di Honing

Fuera di cu honing tin un smak delicioso, pa hopi tempu e ta conocí pa su podernan curativo. Segun e korant The Australian, un tim di investigacion di universidad di Queensland i di Sydney a mustra di con honing ta un matadó eficas di bacteria. Ora mescla honing cu awa i pon’é riba herida i kemadura, un enzima den e honing cu ta reaccioná riba e sucu ta producí dioxogen cu ta conocí pa su uso den clorox. E kímico aki no solamente ta mata bacterianan manera Staphylococcus aureus pero tambe e ta yuda e tehido renobá su mes.