Yudansa pa Hende Muher Maltratá

KICO un persona por haci pa yuda hende muher cu ta víctima di violencia? Na promé lugá bo tin cu comprendé loke nan ta pasando aden. Hopi bes e daño cu esnan cu ta maltratá nan casá ta causa no ta físico so. E ta encerá hopi biaha menasa i intimidacion verbal, di manera cu e víctima ta sinti cu e no ta bal nada ni no por haci nada.

Tuma por ehempel Roxana, cu den e promé artículo a conta loke a pasa cuné. Tin bes su esposo ta usa palabra como arma. Roxana ta conta: “E ta yama mi tur sorto di cos. E ta bisa mi: ‘Ni scol bo no a caba. Con lo bo por cria e muchanan sin mi? Bo ta un mal mama i floho. Bo ta kere cu gobiernu lo laga bo keda cu e muchanan si bo bai laga mi?’”

E casá di Roxana ta mantené su dominio dor di tin tur placa bou di control. E no ta permití Roxana usa e auto, i ta yam’é henter dia pa wak kico e ta haciendo. Si Roxana expresá kico lo e preferá, su esposo ta haña un atake di rabia. Como resultado, Roxana a siña pa nunca expresá su opinion.

Manera nos por mira, maltrato di casá ta un tópico complicá. Pa duna sosten, scucha cu compasion. Corda, hopi bes ta basta difícil pa un víctima papia di loke ta sosodé cuné. Bo meta mester ta pa fortalecé e víctima segun cu e ta trata cu e situacion na su propio paso.

Tin hende muher maltratá kisas mester busca yudansa di autoridad. Tin bes, un etapa di crísis—por ehempel ora polis intervení—por pone un homber cu ta maltratá su casá mira e seriedad di su accionnan. Sin embargo, ta cierto cu hopi bes cualkier motivacion pa cambia ta disparcé despues cu e crísis pasa.

 E esposa maltratá tin cu bai laga su esposo? Bijbel no ta trata separacion matrimonial como algu leve. Sin embargo, e no ta obligá un esposa maltratá keda cu un hende homber cu ta pone su salú of asta su bida na peliger. Apostel cristian Pablo a skirbi: “Si realmente e bai, lagu’e keda sin casa of, si no, reconciliá cu su esposo.” (1 Corintionan 7:10-16) Ya cu Bijbel no ta prohibí separacion den circunstancia extremo, loke un hende muher haci den e caso aki ta un decision personal. (Galationan 6:5) Ningun hende no mester persuadí un esposa p’e bandoná su esposo, ni ningun hende mester preshoná un hende muher maltratá p’e keda cu un hende homber cu ta maltrat’é miéntras cu su salú, bida i spiritualidad ta na peliger.

Tin Speransa pa Homber Cu Ta Cometé Maltrato?

Maltrato di casá ta un violacion flagrante di principio bíblico. Na Efesionan 4:29 i 31, nos ta lesa: “No laga ningun dicho putrí sali for di boso boca . . . Boso kita tur amargura malicioso i furia i rabia i griteria i abla ofensivo for di boso, huntu cu tur maldad.”

Ningun esposo cu ta pretendé di ta sigui Cristo por realmente bisa cu e ta stima su esposa si e ta maltrat’é. Si e maltratá su esposa, cuantu tur su otro bon obranan lo bal? Un “golpiadó” no ta cualificá pa haña privilegionan special den e congregacion cristian. (1 Timoteo 3:3; 1 Corintionan 13:1-3) En realidad, cualkier persona cu ta profesá di ta cristian, cu bes tras bes i sin arepentí ta entregá na atake di rabia por ser expulsá for di e congregacion cristian.—Galationan 5:19-21; 2 Juan 9, 10.

Hende homber violento por cambia nan comportacion? Tin cu a cambia. Sin embargo, generalmente un persona cu ta maltratá su casá no ta cambia a ménos cu e (1) admití cu su conducta no ta bon, (2) kier cambia su bida, i (3) busca yudansa. Testigonan di Jehova a ripará cu Bijbel por tin un influencia poderoso pa yuda un hende cambia. Hopi hende interesá cu a studia Bijbel cu Testigonan di Jehova a desaroyá un deseo fuerte pa agradá Dios. E studiantenan nobo aki ta siña cu Jehova Dios ‘Su alma sigur ta odia cualkier persona cu ta stima violencia.’ (Salmo 11:5) Naturalmente, pa un persona cu ta maltratá su casá cambia su comportacion, mas ta necesario cu stop di dal so. Tambe e ta encerá adoptá un actitud completamente nobo pa cu su esposa.

Ora un hende homber gana conocimentu di Dios, e ta siña mira su esposa no como un criá sino como un “yudante” i no como un hende inferior sino como un hende cu mester ser ‘onrá.’ (Génesis 2:18; 1 Pedro 3:7) Tambe e ta siña con pa mustra compasion i e importancia di scucha e punto di bista di su esposa. (Génesis 21:12; Eclesiástes 4:1) E programa di studio di Bijbel cu Testigonan di Jehova ta ofrecé a yuda hopi pareha. Den e famia cristian no tin lugá pa un tirano of un abusadó.—Efesionan 5:25, 28, 29.

“E palabra di Dios ta bibu i ta ehercé poder.” (Hebreonan 4:12) Pues, e sabiduria cu tin den Bijbel por yuda parehanan analisá e problemanan cu nan ta enfrentá i duna nan curashi pa trata cu esakinan. Mas ainda, Bijbel ta contené e speransa sigur i animador cu hende lo mira un mundu sin violencia ora cu Jehova su Rey celestial ta goberná riba henter humanidad obediente. Bijbel ta bisa: “Lo e libra esun pober cu ta sclama pa yudansa, tambe esun afligí i ken cu no tin yudante. For di opresion i for di violencia lo e rescatá nan alma.”—Salmo 72:12, 14.

[Komentario na página 12]

Den e famia cristian no tin lugá pa un tirano of un abusadó

 [Plachi na página 8]

Corigiendo Ideanan Robes

• Esposa cu ta ser maltratá ta responsabel p’e accionnan di nan esposo.

Hopi persona cu ta maltratá nan casá no ta aceptá di ta responsabel pa nan accionnan, pretendiendo cu ta nan esposa ta provocá nan. Asta algun amigu di e famia kisas ta aceptá e idea cu e esposa ta un hende difícil, pues no ta nada straño cu su esposo ta perde dominio de bes en cuando. Pero esaki ta mescos cu culpa e víctima i hustificá e agresor. En realidad esposanan maltratá hopi bes ta haci un tremendo esfuerso pa calma nan esposo. Ademas, bou di ningun circunstancia un persona ta hustificá pa golpia su casá. E buki The Batterer—A Psychological Profile (E Característicanan Sicológico di un Persona Cu Ta Cometé Maltrato) ta declará: “Hende homber cu corte ta ordená pa busca tratamentu pa motibu cu nan ta maltratá nan casá ta adicto na violencia. Nan ta us’é como un medio pa saca rabia i depresion, un manera pa dominá i resolvé conflicto, i pa reducí tension. . . . Hopi bes nan no por ni reconocé nan responsabilidad p’e violencia of tuma e problema na serio.”

• Alcohol ta pone un hende homber golpia su casá.

Ta berdad cu tin hende homber ta mas violento ora nan bebe. Pero ta razonabel pa culpa alcohol? Den su buki When Violence Begins at Home (Ora Violencia Ta Cuminsá na Cas) K. J. Wilson ta skirbi: “Ora esun cu ta maltratá su casá ta bou di influencia di alcohol esei ta dun’é un motibu pa hustificá su comportacion i tira e culpa riba un otro cos i no culpa su mes.” E ta sigui bisa: “Den nos sociedad ta parce cu hende ta mustra comprension mas lihé si e persona cu ta cometé violencia doméstico ta bou di influencia di alcohol. Un hende muher por keda sin mira su partner e ora ei como un hende cu ta cometé maltrato, i en bes di esei ta mir’é como un hende cu ta bebe pisá of un alcohólico.” Wilson ta señalá cu tal pensamentu por duna un hende muher e speransa falsu di cu “si e hende homber djis stop di bebe, e violencia lo caba.”

Awendia, hopi investigadó ta considerá bebementu i maltrato como dos problema separá di otro. Al fin i al cabo, mayoria hende homber cu ta usa droga of bebe di mas no ta golpia nan partner. E escritornan di When Men Batter Women (Ora Hende Homber Ta Golpia Hende Muher) a remarcá: “Básicamente maltrato ta sigui ser cometí pa motibu di e éxito cu esaki ta duna den controlá, intimidá i dominá e hende muher maltratá. . . . Bebementu di mas i uso di droga ta parti dje estilo di bida dje persona cu ta cometé maltrato. Pero lo ta robes pa asumí cu ta e uso di droga of alcohol ta causa e violencia.”

• Hende cu ta cometé maltrato ta violento cu tur hendey.

Hopi bes esun cu ta cometé maltrato por ta un amigu masha agradabel pa otro hende. E ta comportá su mes di dos manera completamente diferente. Esaki ta e motibu cu amigu i famianan ta haña e historianan di su violencia difícil pa kere. Sin embargo, berdad ta cu e homber cu ta maltratá su casá ta scoge brutalidad como un medio pa dominá su casá.

• Hende muher no ta protestá contra maltrato.

Probablemente, e idea aki ta bini dor cu hende no ta comprendé e situacion vulnerabel cu un hende muher cu no tin caminda di bai, ta aden. Kisas e esposa maltratá tin amigunan cu por tum’é den cas pa un of dos siman, pero kico lo e haci despues di esei? Haña un trabou i paga huur di cas i na mésun tempu cuida e yunan, ta prospectonan cu por desanim’é. I kisas ley ta prohibié di hui bai cu e yunan. Tin hende muher cu a purba bai pero nan casá a busca nan te haña nan i trece nan bek, sea a la fuersa of cu palabra dushi. Amigunan cu no ta comprendé esei kisas ta kere ekibocadamente cu un muher asina no a oponé e maltrato.