Comprendé Kico Ta Artrítis

“ORA DI BAI DRUMI, MI TA YORA ORA MI WAK MI MANNAN I PIANAN DESFIGURÁ.”—MIDORI, HAPON.

ARTRÍTIS a tormentá hende pa siglonan. Momianan di Egipto ta duna evidencia cu e malesa a existí siglonan pasá. Parce cu e exploradó Cristofel Columbus a sufri di artrítis. I awe tin miyones di hende cuné. Kico precis e malesa debilitante aki ta?

E palabra “artrítis” ta bini di palabranan griego cu ta nificá “skarnirnan inflamá” i ta relacioná cu un grupo di mas cu 100 malesa di  reumatismo. * E malesanan aki por afectá no solamente skarnir, sino tambe músculo, wesu, pees, i cabuya (gewrichtsband) cu ta wanta e skarnirnan. Algun forma di artrítis por daña bo cueru, órganonan interno i asta bo bista. Laga nos concentrá riba dos malesa comunmente conectá cu artrítis: artrítis reumático (RA) i osteoartrítis of artrítis degenerativo (OA).

E Diseño di Skarnir

Un skarnir ta caminda dos wesu ta topa. Un skarnir sinovial tin manera un sacu firme rond di dje cu ta proteh’é i want’é. (Wak e plachi na página 4.) E sacu dje skarnir ta furá cu un flishi sinovial. E flishi aki ta producí un líkido lebelebe. Den e sacu dje skarnir, e dos puntanan di wesu ta cubrí cu un tehido lisu i elástico conocí como kraakbeen. Esaki ta prevení cu bo wesunan ta feila contra otro. Tambe e kraakbeen ta funcioná manera un ‘shock absorber,’ manera un cusinchi na punta di bo wesunan cu den un forma balansá ta plama e intensidad di preshon pa tur wesu.

Por ehempel, ora bo ta cana, core of bula, e preshon cu ta cai riba bo heup i rudia por ta cuater pa ocho biaha e peso di bo curpa! Maske cu e músculonan i pees cu tin rond dje wesunan ta absorbá gran parti dje impacto, e kraakbeen ta yuda bo wesunan wanta e carga aki dor cu e ta bai aden manera un spons.

Artrítis Reumático

Den caso di artrítis reumático (AR), e curpa su sistema di resistí malesa ta lansa un atake formal contra e skarnirnan. Pa un of otro motibu desconocí, un gran cantidad di cel di sanger ta basha bai den e holnan di skarnir. Entre e celnan ei tin T cel, cu ta esnan clave den e curpa su sistema di resistí malesa. Esaki ta provocá un avalancha di reaccion kímico cu ta inflamá e skarnir. E celnan sinovial por cuminsá reproducí na forma descontrolá, i forma un masa di tehido manera un tumor cu ta ser yamá pannus. Na su turno e pannus ta producí enzimanan destructivo cu ta destruí e kraakbeen. Como consecuencia di esei, e wesunan ta cuminsá pega na otro, loke ta limitá movecion i causa dolor insoportabel. Tambe e proceso destructivo aki ta swak cabuya, pees i músculo, i e skarnir ta bira instabil i ta sali parcialmente for di lugá, loke ta resultá hopi bes den un aparencia desfigurá, tur trocí. Por lo general AR ta afectá e mésun skarnirnan na cada banda, por ehempel, ámbos pols, rudia i pia. Mas cu 50 porciento di persona diagnosticá cu AR ta saca tambe bulto of bòlòbònchi bou di cueru. Tin ta haña anemia i nan wowo i garganta ta seca i haci dolor. Otro síntomanan cu ta compañá AR ta cansancio i síntomanan di griep, manera keintura i dolor di músculo.

AR ta varia mashá pa loke ta su efecto, e manera cu e ta cuminsá i e tempu cu e ta dura. Tin hende cu por cuminsá sinti dolor i bira stijf lentamente durante un periodo di simannan i asta añanan. Cerca un otro, e por cuminsá di ripiente. Cerca algun hende AR ta dura un par di luna i despues ta bai sin haci daño notabel. Otro hende ta pasa dor di periodonan cu e malesa aki ta lanta pisá, siguí pa periodonan cu e síntomanan ta mengua i cu nan ta sinti bon. I cerca algun pashent e malesa ta sigui activo pa hopi aña, i sin misericordia ta haci nan inválido.

Ken ta core riesgo di haña AR? Dr. Michael Schiff ta bisa: “E ta mas comun cerca hende muher entre 40 pa 60 aña.” Sin embargo, Schiff ta sigui bisa cu “e por afectá tur hende na cualkier edad, tantu mucha como hende homber.”  Hende cu tin famia cu artrítis reumático ta core mas riesgo. Ademas tin vários estudio ta indicá cu factornan importante di alto riesgo ta si un persona ta muchu gordo, ta huma of a yega di tuma transfusion di sanger.

Osteoartrítis

E revista Western Journal of Medicine ta bisa cu osteoartrítis “den hopi manera ta mescos cu e weer: presente tur caminda, hopi bes sin cu ta ripar’é, i tin biaha cu efectonan dramático.” Distinto di AR, rara bes osteoartrítis (OA) ta plama pa otro partinan di curpa, sino mas bien e ta concentrá su influencia destructivo den un of dos skarnir. Segun cu poco-poco e kraakbeen ta gasta, wesu ta cuminsá feila riba wesu. Esaki ta ser compañá pa pidanan di wesu cu ta crece cu yama osteofit. Tambe por forma kiste, i e wesu ta bira mas diki i ta cuminsá troce bira desfigurá. Otro síntomanan ta entre otro konoshi na e skarnirnan di dede, bo ta tende con wesu ta raspa i feila riba otro den e skarnirnan cu tin artrítis i kram di músculo. Huntu cu esei e skarnirnan ta haci dolor, ta bira stijf i no por move bon mas.

Ántes expertonan a kere cu OA tabata djis un consecuencia mas di behes. Sin embargo, ya pa hopi tempu caba nan no ta pensa asina. The American Journal of Medicine ta bisa: “No tin evidencia cu un skarnir normal cu ser someté na preshonnan comun i coriente lo daña den transcurso di bida di un hende.” Pues ta kico ta causa osteoartrítis anto? Segun e revista británico The Lancet, intentonan pa comprendé su causa exacto ta “yen di controversia.” Tin investigadó ta di opinion cu na promé instante e wesu ta haña fractura masha chikitu. Esaki na su turno ta pone pidanan di wesu crece i ta daña e kraakbeen. Otronan ta pensa cu OA ta cuminsá den e kraakbeen mes. Nan ta razoná cu segun cu e kraakbeen ta degenerá i ta fraña, e wesu bou di dje ta haña mas preshon. Anto cambionan structural ta tuma lugá segun cu e curpa ta purba drecha e kraakbeen dañá.

Ken ta core riesgo di haña OA? Aunke riba su mes edad so no ta e causa di OA, hopi biaha ta segun cu edad ta subi e kraakbeen di skarnir ta gasta. Otro hende cu ta core riesgo por ta esnan cu tin algu abnormal den e forma cu e superficie di nan skarnirnan ta topa otro of nan músculonan di pia i di bel ta swak, nan pianan no ta pareu of nan wes’i lomba ta fo’i lugá. Otro cos cu por contribuí na osteoartrítis ta lesionnan causá na un skarnir sea dor di accidente of dor di traha un trabou caminda e mésun movecion continuo ta usa e skarnir di mas. Una bes cu e skarnir cuminsá bai atras, si e persona ta muchu gordo esei por empeorá OA.

Dr. Tim Spector ta bisa: “Osteoartrítis ta un malesa complicá cu tin cierto factornan di riesgo cu ta dependé definitivamente di bo ambiente pero tambe hende tin hopi chens di hañ’é di famia.” Foral hende muher riba 40 aña cu den nan famia tin casonan dje malesa, tin hopi chens di haña OA. Distinto for di osteoporósis cu ta ser causá dor di wesu fofo, ta ora hende tin wesu pisá nan ta haña OA. Tin investigadó ta mencioná tambe como factor falta di vitamina C i D i daño causá dor di reaccionnan kímico cu nan ta yama vrije zuurstofradicalen.

Tratamentu

Tratamentu pa artrítis por lo general ta encerá un combinacion di remedi, ehercicio i  cambio den estilo di bida. Un fisioterapista kisas ta cuminsá cu un programa di ehercicio curativo. Tal bes e programa ta incorporá ehercicionan cu ta laga bo move henter bo curpa, of cu ta pone preshon riba bo músculonan of ehercicionan di aerobic of di hisa peso. Tin prueba cu esakinan ta mengua un cantidad di síntoma, incluso dolor di skarnir i hinchamentu, cansancio, malestar i depresion. Asta cerca hende di edad e beneficionan di haci ehercicio ta bisto. Ehercicio por yuda cu e wesunan no ta bira fofo. Tin hende ta bisa cu nan a logra haña poco alivio for di dolor dor di aplicá vários forma di compres friu i cayente i dor di acupuntura. *

Un rasgo principal di trata artrítis ta loke bo ta come, ya cu un hende por aliviá e dolor di skarnir considerablemente dor di baha peso. Tin expertonan ta bisa cu ta bon pa baha man na cuminda procesá i vet saturá i come cuminda cu hopi calcio, manera berdura di blachi berde scur, fruta frescu i piscá di awa friu cu tin hopi vet ácido cu nan ta yama omega-3. Esaki no solamente ta yuda pa perde peso sino tambe ta reducí dolor. Con asina? Wel tin experto ta bisa cu tal dieta ta stroba e proceso di inflamacion. Tin otronan ta bisa cu dietanan cu ta eliminá carni, productonan di lechi, trigu i berdura dje famia Solanaceae, manera tomati, batata, promenton i berehein, tambe a yuda algun hende.

Den algun caso dokter ta recomendá un procedura cu yama artroscopie. Esaki ta ora cu e ciruhano ta hinca un instrumento den e skarnirnan i cu esei e ta kita e flishi sinovial cu ta producí e enzimanan destructivo. Sin embargo, e procedura aki su eficacia ta limitá ya cu hopi bes e skarnir ta bolbe inflamá. Un operacion hopi mas drástico ta artroplastiek. Esaki ta ora nan ta remplasá henter e skarnir (generalmente un heup of un rudia) cu un skarnir artificial. E  operacion aki su efecto ta dura un 10 pa 15 aña i hopi bes ta masha eficas pa eliminá dolor.

Último tempu dokternan a purba tratamentunan cu ta encerá ménos cortamentu di curpa, manera viscosupplementatie, cu ta encerá spuit un substancia pegahoso direct den un skarnir. Generalmente nan ta haci esaki cu rudia. Segun algun estudio europeo, dokternan tabatin un grado di éxito tambe ora nan a spuit den e skarnirnan substancianan cu ta stimulá e kraakbeen pa drecha su mes.

Aunke hende no a haña ningun remedi cu ta cura artrítis, hopi remedi ta reducí dolor i inflamacion, i ta parce cu algun ta baha e velocidad cu cua e malesa ta desaroyá. Tin un arsenal di remedi cu dokternan ta usa pa duna alivio for dje síntomanan debilitador di artrítis. Esakinan ta entre otro remedi pa pasa dolor, terapia di corticosteroid, remedi antiinflamatorio sin steroid (NSAID), remedi antireumatismo cu efecto di duracion largu (DMARD), remedi cu ta suprimí inmunidad, incluso algun biológico, i otronan cu genéticamente a ser manipulá pa interferí cu e reaccion di inmunidad. Sin embargo, kisas bo tin cu paga un prijs haltu pa haña alivio, ya cu tur e tipo di remedinan aki por causa efectonan secundario grave. Ta un reto tantu p’e pashent como p’e dokter pa evaluá e posibel beneficionan contra e riesgonan.

Con algun hende cu a sufri dje efectonan dañino di artrítis a logra trata cu e malesa doloroso aki?

[Nota]

[Komentario na página 6]

UN PERSONA TA CORE MAS RIESGO DI DESAROYÁ ARTRÍTIS REUMÁTICO SI E TA MUCHU GORDO, TA HUMA OF A YEGA DI TUMA TRANSFUSION DI SANGER

[Kuadro/Plachi na página 8]

TERAPIANAN ALTERNATIVO

Tin algun producto terapeutico cu hende ta kere ta mas safe, i cu tin ménos efecto secundario cu e tratamentunan tradicional. Entre esakinan ta e proteina oral collagen tipo II, cu algun investigadó ta bisa a logra baha skarnir hinchá i mengua e dolor di artrítis reumático (AR). Den ki manera? Dor di frena proteinanan destructivo cu ta stimulá inflamacion, esta interleukin-1 i tumornecrosefactor-α. Segun informe, tin un par di substancia nutritivo natural cu tambe a demostrá di tin cierto abilidad di frena e mésun elementonan destructivo aki. Nan ta entre otro vitamina E, vitamina C, niacinamida, zeta di piscá cu tin un concentracion haltu di eikosapentaeenzuur i gammalinoleenzuur, bernagiezaadolie, i teunisbloemolie. Na China, nan tin años ta usa un remedi di yerba Tripterygium wilfordii Hook F. Segun informe e tabatin cierto éxito den baha e efectonan di AR.

 [Diagram na página 4]

(Pa e teksto den su formato kompleto, wak e publikashon)

SKARNIR SANO

BEURS

MÚSCULO

KRAAKBEEN

PEES

SACU DI SKARNIR

FLISHI SINOVIAL

LÍKIDO SINOVIAL

WESU

SKARNIR CU ARTRÍTIS REUMÁTICO

PÉRDIDA DI ESPACIO

DESTRUCCION DI WESU I KRAAKBEEN

FLISHI SINOVIAL INFLAMÁ

SKARNIR CU TIN OSTEOARTRÍTIS

PIDANAN LOS DI KRAAKBEEN

DESTRUCCION DI KRAAKBEEN

PIDA WESU CU A CRECE

[Rekonosementu]

Fuente: Arthritis Foundation

[Plachinan na página 7]

Artrítis por afectá hende di tur edad

[Plachinan na página 8]

Un programa di ehercicio i di come apropiadamente por duna un tiki alivio