E Impresionante Palu di Tule

DJE CORESPONSAL DI SPIERTA! NA MÉXICO

E PALUNAN mas haltu na mundu ta palu di secoya di California, cu por midi mas cu 110 meter haltu. Sin embargo, e siprès mexicano, un famia di secoya, tin e record pa loke ta hanchura. E ehemplar mas famoso dje palu aki ta situá 13 kilometer oost dje ciudad Oaxaca, México, den e pueblo di Santa María del Tule. E ta conocí como e palu di Tule. Su base ta midi 46 meter hanchu. Pa duna bo un idea di su tamaño, lo tin mester di por lo ménos 30 hende pará cu brasa di span pa rondoná e troncon, i mas di 500 hende lo por sconde bou di su sombra!

Nan ta calculá cu e palu di Tule tin mas cu 2.000 aña bieu. Ora cu nan a corta su ramanan na 1996, nan a kita 10 ton di palu morto. Hende local ta yama e palu El Gigante. Na México e sorto aki ta conocí como ahuehuete, cu na idioma nahuatl ta nificá “e bieu di awa,” ya cu generalmente e ta crece cant’i awa of den lugánan cu moeras.