E “Trucknan” Microscópico di Bo Curpa

Cincu dia pasá e tabata un cel cu un núcleo. Pero despues di un periodo intenso di madurá i multiplicá, haciendo contraccionnan vigoroso, e cel a saca su núcleo afó. Awor e yama un reticulocit. Kico esei ta? Esei ta un cel di sanger corá cu no a madurá ainda i cu ta cla pa drenta bo circulacion di sanger. Aki dos pa cuater dia lo e transformá bira un cel di sanger corá completamente madurá.

 E cel chikitu aki ta casi mescos cu un truck. E baki cu e ta usa pa hiba “carga” ta hemoglobina, un proteina cu ta transportá oxígeno. Dokternan ta calculá cu durante e cuater lunanan cu su bida ta dura, e “truck” lo biaha aproximadamente 250 kilometer den bo curpa. Tin rond di 10 mil miyon ader fini-fini den bo curpa, i na tur nan tin un largura cu ta dos bes e omtrek di nos planeta. Bo tin mester di biyones di cel corá (eritrocit) den bo sanger pa hiba oxígeno na tur parti dje curpa.

E “truck” chikirititu aki ta casi semper den movecion den bo circulacion di sanger. Su velocidad ta varia segun e circunstancia. Ora e cel ta den e sanger cu ta sali for dje curason, e ta riba “autopista” (e aorta) i ta alcansá su velocidad máximo di 120 centimeter pa seconde. Segun cu e cel corá ta drenta e “hanchinan,” su velocidad ta baha gradualmente te na un promedio di 0,3 milimeter pa seconde den e adernan fini-fini cu no tin salida.

E Orígen di Cel di Sanger

Cerca adultonan normal, mayoria cel di sanger ta ser producí den e tuti di wesu. Tur dia, pa cada liber di bo peso, bo tuti di wesu ta producí mil miyon cel corá, 400 miyon cel blancu (granulocit) i mil miyon plaketa. Esaki ta compensá e cantidad corespondiente di cel cu bo ta perde tur dia. Cerca un adulto normal, cada seconde miyones di cel corá ta ser destruí i remplasá.

Pa e cel corá cu no a madurá ainda sali for dje tuti di wesu i drenta e circulacion di sanger, e ta bai n’e muraya di adernan chikitu den e tuti di wesu i ta primi pasa dor di un buracu chikitu cu yama porio di migracion, i asina e ta drenta den e sanger. Durante tres dia mas lo e sigui producí hemoglobina. Pero despues, ora e bira un cel di sanger corá madurá (esta un eritrocit), lo e stop cu e actividad ei.

Circulacion di Sistema i Circulacion Pulmonar

Dokternan di siglo 17 a establecé cu tin dos tipo di circulacion di sanger. Den e circulacion di sistema, e “trucknan” microscópico di bo curpa, esta e celnan corá, ta sali for dje curason bai n’e tehidonan dje curpa. Einan e celnan ta entregá oxígeno i ta recogé sushi den forma di kooldioxide. Nan ta yama e proceso aki respiracion interno. Caba e celnan corá ta bolbe bek n’e curason. Den e circulacion pulmonar, ta manda e “trucknan” n’e pulmonnan. Ei nan ta descargá e sushi i ta bolbe haña un cargamentu di oxígeno. Pues circulacion pulmonar ta laga e curpa hala rosea.

Ora Cu No Tin Suficiente Cel

Tin biaha tin mas tiki cel corá cu normal. Dokternan ta yama e condicion aki anemia. E por tin vários causa. Entre nan por ta: (1) un defecto den e produccion of den e proceso pa cel di sanger corá bira maduro, (2) un aumento den nan destruccion i (3) sangramentu pisá. Tambe hende por haña anemia dor di inflamacion persistente of di tumor.

Un hende por hañ’é cu problema ora e tin sea muchu hopi of muchu tiki heru den sanger. Ora tin muchu tiki heru, e celnan corá no por madurá den un manera normal. Como resultado e celnan lo ta mas chikitu i mas bleek cu normal. Den hopi caso, remedi di heru lo corigí e defecto aki. Tin biaha e nivel di heru den sanger ta muchu haltu. Esaki por sosodé ora cel corá sker, loke ta laga heru drenta den bo curpa. Esei ta venená tur órgano dje curpa progresivamente. E problema ta serio foral ora e curason venená. Pashentnan cu ta sufri dje malesa aki casi semper ta muri di problema crónico di curason.

Nos lo por yena hopi buki splicando tur e trabou cu e celnan di sanger den nos curpa ta haci. Pero ta bisto cu e manera maraviyoso i complicá cu nan ta—describí solamente en parte den e artículo aki—ta realsá e sabiduria di Esun cu a diseñá i crea bida. Un adoradó di antigwedad dje gran Creador inteligente a bisa: “Pa medio di dje nos tin bida i ta move i ta existí.”—Echonan 17:28.