Observando Mundu

“Sneu-Conditioning”

E korant di Hapon Asahi Evening News ta informá cu awor hende ta usa sneu como un fuente nobo di energia durante zomer. E stad Bibai na Hokkaido, den nort di Hapon, su zomernan ta corticu i cayente i den winter ta cai hopi sneu. En bes di benta e sneu afó, obreronan ta almacen’é den depósito. Anto durante zomer nan ta “laga aire circulá den un depósito grandi yen di sneu, caba nan ta sak’é como aire friu similar na loke nan ta usa pa frishider,” segun e korant. Nan ta usa e aire friu aki pa fria edificionan ekipá cu “sneu-conditioning,” esta, sistemanan di airecondicioná specialmente diseñá pa traha a base di sneu. Un beneficio adicional ta cu e depósitonan aki yen di sneu tin nivelnan haltu di humedad cu ta yuda purificá e aire dor di absorbá stòf i holó.

Tuberculósis Mortal Resistente na Remedi

Segun e korant Star di Johannesburg: “Un forma di tuberculósis mortal resistente na vários remedi (MDRTB), i cu ta creciendo, tin e capacidad di eliminá famianan completo.” I “den transcurso dje próximo añanan lo e surpasá e cantidad di casonan di tuberculósis normal (TB),” na Sur África. Segun e Asociacion Nacional Sur Africano di Tuberculósis, pashentnan di TB por desaroyá MDRTB si nan stop di usa nan remedinan muchu trempan of si nan ta usa nan de bes en cuando. Anto e tipo mas mortal aki di TB resistente na remedi por ser transmití na hende cu nunca a haña TB. Ta costa 20 bes mas tantu pa trat’é cu pa trata TB normal i e tratamentu ta ménos exitoso. Mitar dje pashentnan cu tin TB resistente na remedi ta muri. Segun e informe, e crísis di TB na Sur África “ta saliendo for di man apesar cu tin tratamentu di TB grátis.” Dos tercera parti dje poblacion tin TB inactivo cu fácilmente por ser activá dor dje vírus di HIV.

49 Aña Ta un Edad Peligroso?

‘Tene cuidou, hombernan di 49 aña,’ e korant Asahi Shimbun a spierta. Na Hapon mas homber dje edad aki ta ser arestá pa asesinato i intento di asesinato cu cualkier otro edad. Tambe pa loke ta trata causa daño físico na otro hende, hombernan di 49 aña ta den top. Despues ta bini hombernan di 47 aña, siguí pa esnan di 48 aña, anto caba esnan di 45 aña. Di con asina tantu homber den e edadnan aki? Hombernan cu ta yegando 50 aña ta na un punto crucial den bida, segun un sikiatra di Tokio. E ta bisa: “Nan yunan ta bira independiente, nan tin cu cuida nan mayornan di edad i nan relacion cu nan casá ta bira difícil. Nan ta na un etapa cu nan no tin pleno control riba nan impulsonan, i tin ta actua impulsivo asta ora nan por mira di antemano cu esei ta peligroso.” E korant ta bisa cu hipotek, placa pa paga scol, preshon na trabou, kitamentu di hende fo’i trabou i empleo instabil, tambe ta causa tension den bida di hombernan entre 47 pa 50 aña.

Mal Memoria Ta Falta di Tecnologia?

Segun e korant The Sunday Times di Londen, tin dokternan na Hapon, Merca i Gran Bretania cu a cuminsá culpa tecnologia di computer pa e memoria hopi malu cu adultonan hóben tin. Ta trata di tecnologia manera agenda electrónico i programanan di computer cu ta traha mapa dje ruta mas fácil pa yega un caminda. Segun e dokternan aki, aparatonan electrónico moderno ta pone trahadónan haci ménos uso di nan celebro pa solucioná problema. Como consecuencia e trahadónan ei, asta esnan di 20’picu i 30’picu aña, no por corda nomber, ni palabra skirbí ni afsprak. Dr. David Cantor dje Instituto di Servicionan Sicológico na Atlanta, Georgia, ta bisa: “Hopi experto ta kere cu algun hende tin problema pa absorbá informacion nobo debí n’e sobreabundancia di informacion . . . E hendenan aki ta lubidá cos pasobra pa cuminsá, nan ta muchu distraí pa absorbá algu.” Dr. Takashi Tsukiyama di Tokio ta comentá cu e problemanan aki “no tin nada di haci cu edad, sino nan tin di haber cu [bo] estilo di bida, por ehempel e echo cu bo no ta usa bo celebro suficiente.”

“Un Problema Serio di Salú Público”

Segun estadísticanan di gobiernu, suicidio ta na di ocho lugá como e causa principal di  morto na Merca. Anualmente mas cu 30.000 mericano ta cometé suicidio, i tur aña mas cu 650.000 ta purba mata nan curpa. Tin mas cu tres suicidio pa cada dos asesinato, segun e servicio di noticia Reuters. Tantu gruponan público como privá ta referí na suicidio como “un problema serio di salú público.” David Satcher, hefe di departamento di salubridad mericano, ta bisa: “Masha tiki hende ta keda sin topa cu e tragedia di suicidio den nan bida.” Algun dje factornan asociá cu suicidio ta entre otro, “depresion, sintimentunan di desesperacion i impotencia, i uso di alcohol i otro droga,” segun Reuters.

Ignorancia Bíblico

Aunke tradicionalmente hende tin masha respet pa Bijbel na Merca, un estudio recien a descubrí cu ta 16 porciento so di hende cu ta yama nan mes cristian einan ta bisa cu nan ta lesa Bijbel tur dia. Segun un informe den e korant The Sun Herald di Biloxi, Mississippi, Merca, un otro encuesta a mustra cu solamente 2 di cada 10 hende por a mencioná nomber dje persona cu a duna e Sermon Riba Ceru. Ademas, esnan entrevistá por a mencioná solamente tres of cuater dje Dies Mandamentunan.

Djus di Grapefruit i Remedi

Bebe remedi cu bo ta haña riba recept cu djus di grapefruit por aumentá “e riesgo di efectonan secundario, i den algun caso, [causa] reaccionnan serio,” segun e boletin UC Berkeley Wellness Letter. E remedinan principal cu ta causa esei ta entre otro remedinan cu ta baha colesterol, remedinan pa preshon haltu conocí como ‘calcium channel blockers’ i cierto trankilisante. Sin embargo, ta interesante cu no ta tur hende ta reaccioná malu riba e mescla, i no ta tur djus di grapefruit ta causa e problema. Segun e Wellness Letter, “si bo ta usa remedi i ta bebe djus di grapefruit, bo tin cu chek cu bo boticario tocante e posibel influencia cu esei tin.”

Memoria di Olefante?

Investigadónan cu ta traha den Parke Nacional Amboseli di Kenya a descubrí cu un punto clave pa tounan di olefante sobrebibí ta e memoria dje hembra mas bieu. Science News ta informá: “E olefantenan mas bieu den un tou, hembranan di por lo ménos 55 aña, ta mihó den distinguí olefante amigu for di olefante desconocí cu . . . e hembranan di 35 aña.” Dor cu e hembranan mas bieu ta corda e yamadanan pa haci contacto, cu ta un gruñamentu na un frecuencia abou, nan sa ora un yamada ta desconocí i mesora ta reuní e tou den un posicion di defensa. E informe ta bisa cu “un hembra típico ta reconocé rond di 100 olefante su pareu, na nan yamada.” Pues ora yagdónan ilegal mata un hembra bieu, esei ta nificá cu henter e tou a perde un mangasina grandi di informacion.

Asesino Number Unu

“Alcohol ta mata 55.000 hóben pa aña,” e korant frances Le Figaro ta informá. Segun Organisacion Mundial di Salú (OMS), alcohol ta e asesino principal di hombernan europeo entre 15 pa 29 aña i ta hunga un papel den 25 porciento di tur morto. Esaki ta incluí morto causá pa “buracheria, accidente di tráfico, suicidio i homicidio,” segun e korant. Foral den algun pais di Oost Europa e situacion ta hopi serio. Einan “un tercera parti di hóbennan ta condená na muri djis akí como resultado di demasiado consumo di alcohol.” Na un conferencia na Stockholm, Suecia, dr. Gro Harlem Brundtland, directora general di OMS, a denunciá e promocion agresivo cu productornan di alcohol ta haci. Propaganda ta pone cu ta mas i mas difícil pa hóbennan adoptá “un actitud balansá i saludabel pa cu alcohol.”

Con Bo Por Ta Felis

“E clave pa un bida satisfaciente no ta dependé di un cuenta bancario cu hopi cen. Al contrario, ser ricu, popular i prominente ta e manera ménos probabel pa haña satisfaccion,” segun un investigacion nobo di sicólogonan. Kennon Sheldon di Universidad di Missouri-Columbia, na Merca, ta bisa: “Den culturanan occidental, hopi propaganda ta duna e idea cu nos mester ta bunita, popular i ricu. Podisé esei ta bon pa bende producto, pero esnan cu ta bai tras di esei no ta e hendenan di mas felis.” Manera The Independent di Londen a informá, un estudio di mas cu 700 studiante universitario a revelá cu segun e studiantenan, “respet propio” i “tene un relacion cerá cu otro hende” tabata e factornan mas importante den nan felicidad. Placa tabata e motibu cu ménos nan a mencioná pa felicidad. Segun e korant, a bini un fin n’e creencia di cu ‘hende cu ta kere cu placa no por cumpra felicidad ta pasobra nan no sa ki bentaha e tin.’